علاج ناجح لشرخ فى الزجاج الأمامى
امبارح نزلت الصبح من البيت فوجئت بشرخ مخيف فى الزجاج الأمامى ... مبقتش متأكد هو كان موجود قبل كدة و مخدتش بالى منه لحد ما كبر بالشكل دة وللا حصل كله و العربية مركونة ... هو الشرخ كان أفقى و نافذ (مخترق سمك الزجاج كله) و طوله حوالى 20 سم و كان باين من منظره انه ناوى يكمل و ياخد عرض الزجاج بالكامل.
المهم رحت على الساعة 1 ظهراً تقريباً لورشة اسمها "د. خالد" فى شارع العيسوى قبل تقاطعه مع اسكندر ابراهيم بحوالى 50 متر ... هو المكان تحس انه مكتب نظيف مش ورشة ... سيراميك بالأرض و الحوائط، مكتب كبير و كراسى جلد و كمبيوتر متصل بالانترنت :)
المهم الفنى بدأ بتنظيف الزجاج و بعدين حط على الشرخ مادة شفافة شبه السليكون و حط فوقيها شريحة بلاستيك شفافة و بعدين عرض المادة دى لأشعة ultraviolet و سابها كدة حوالى ربع ساعة ... دة منظر عملية الاصلاح من خارج السيارة:
http://case30.com/20012009030.jpg
و دة المنظر من داخل السيارة:
http://case30.com/20012009031.jpg
للأسف مفتكرتش أصور الشرخ قبل الإصلاح عشان تشوفوه كان عامل ازاى ... لكن بعد انتهاء الإصلاح الشرخ اختفى تماماً ... مبقاش ظاهر منه غير خط سطحى رفيع جداً زى خربشة عمقها لا يزيد على ربع مللى أو أقل و متاخدش بالك منه إلا لو عارف مكان الشرخ كان فين ... اجمالى زمن التصليح حوالى ثلث ساعة، التكلفة 90 جنيه (بتعتمد على طول الشرخ) ... و بتحصل على شهادة ضمان مدى الحياة ان الشرخ ميظهرش تانى.
أنا عرفت الفنى على المنتدى و حاول يعمل تسجيل فيه لكن تقريباً كان فى مشكلة وقتها و حاولت أحصل منه على خصم لأعضاء نايل موتورز لكن بما ان الورشة دى فرع من عدة فروع فالقرار دة مش فى ايده للأسف. لكن حبيت أحكيلكو التجربة لأنها بسيطة و مبتاخدش وقت و نتيجتها ممتازة.