تجربتى الواقعية بالتفصيل الممل والاحداث لل127(الايطالى)

**i_Am_Legend** · 21-01-2009 06:18 PM

1-سيارة اذا نظرنا لها سنشعر بمدى الحجم الصغير التى تتمتع به السيارة وهذا يساعدها على الركن فى اى مكان(فى مرة كنت راكن فى شارع شبرا وكنت فى البنك وكان ساعة ذروة وبعد ماخرجت من البنك واحد ب(لانوس) دخل يركن مكانى وقعد حوالى5 دقايق وماعرفش يركن وفى الاخر ركن صف تانى)2-الصالون الداخلى واسع وتتسع ل3 افرد بالغين بالخلف وممكن 2 على الكرسى الامامى ودة فى الطوارىء طبعاااا(فى عيد الاضحى اخوتى البنات 2 وبنت عمتى فى الخلف واولاد عمى ال2 فى الكرسى الامامى وكان فية حوالى 20 كيلو لحمة فى الشنطة غير الاستبن والكراكيب ورحنا مدينة نصر نودى اللحمة لناس قرايبنا)3-ثباتها ممتاز جدا (ببقى ماشى على اكتوبر وممكن الف اخد حاجة من على الكنبة اللى ورا او ممكن اكل وانا ماشى وسايب الدركسيون وممكن اركب الهاند فرى او اغير الاغانى وببقى بجرى عادى جدا)4-توفير البنزين انا مش عارف اد اية بصراحة بس هقولكم المشاوير وانتو احسبوا: يوم15\1\2009 (الخميس) اللى فات كان فيها 25 لتر بالظبط وكان 80 رحت من شبرا للعباسية عبدة باشا وروحت باليل على شبرا (الجمعة)كان خطوبة ابن عمتى رحت شبرا الخيمة وبعدين رحنا من عند عمتى على كوافير العروسة فى المؤسسة وبعدين لفنا وامريكانى وغربلة وعربيتى كانت اقل عربية فى الفرح 2لانسر و3كرولا والباقى كوكتيل المهم ماكنش فى فرق بينى وبينهم ماشى جمبهم عادى والوزن اللى كان فى العربية مافرقش خالص فى السحب والله ولعبت بالعربية وعملت بيها كل حاجة وكانها عربية حديثة وماهو فرح بقى والغرز كانت اوعى وشك والله كنت باخد الغرزة من قدام اتخن عربية فيهم ولا الهوا ماشى لفنا كتيررررررررررررررر وبعدين روحنا لمكان الفرح وبعد الفرح ما خلص لفنا كتييييييير ورحنا مركب على الكورنيش وبعدين انا روحت على شبرا(السبت)رحت عبدة باشا ورجعت على شبرا و(الاحد) كذلك(الاثنين) رحت (ابو وافية) انا ونبيل صاحبى علشان نكشف على الكلب بتاعة علشان كان تعبان جدا وهو مافيش ولا تاكسى رضى يقفلة ورحنا جمعية الرفق بالحيوان وبعدين رحعنا على شبرا وبعدين رحت عبدة باشا(الثلاثاء)من البيت لعبدة باشا(الاربع)شبرا-عبدة باشا-مصر والسودان-شبرا (وبعدين لمبة البنزين بقت بتنور وهذا يعنى ارحمنى بقى وحط بنزين وتقريبا كان فاضل حوالى 4لتر اية رايكم فى الاستهلاك يعنى ماحتطش بنزين من يوم-15\1لحد21\1 افتكر انها موفرة يعنى.5-قوة التحمل الخارجية للسيارة(اظن انكم فاكرين الحادثة اللى عملتها فى نفق احمد بدوى وخبطت لانسر ودفعتلة 500جنية اللى حصل عندة فانوس خلفى كامل واكصدام والشنطة ارفعت والرفرف دخل لجوة وحاجات تانية انا مش فاكرها انا اللى حصل عندى نقرة فى الكابوت حوالى 2سم والاكصدام علية البوية بتاعة اللانسر باللون الفضى تمام كدة.وهى تقريبا مش بتحتاج مصاريغ خالص غير البنزين والمياه فقط لاغير وتزويد الكاوتش كل 4-5 ايام. ودى قصة حياتى معاها عملت بيها كل حاجة ورحت بيها كل مكان وليا ذكريات معاها كتير ومستحيل ابيعها لو اية حصل ولما ربنا يكرمنى بفلوس هاجيب حاجة تناية عليها زيرو لكن ماتهونش عليا العشرة ابداااا دى فيروز الزرقا ياجماعة (على فكرة انا صوابعى نملت من كتر الكتابة)وارجو ان الموضوع يكون عجبكوا وانى ماكنتش تقيل فى سرد الحوار وياريت كل اللى معاه عربية بيحبها يحكلنا عن ذكرياتة معاها ومميزاتها

**haitham2008** · 21-01-2009 07:49 PM

ربنا يحميهالك ويكرمك بيها ويكفيك شرها

**mahmoud_magdy** · 21-01-2009 08:03 PM

ما شاء الله مبروك عليك
فعلا شكلها موفره في البنزين جدا
ممكن اعرف انت كنت شاريها بكام ؟
وهل تستحمل سفر كل لمدة 90 كيلو عالاقل مش يوميا ولكن كزا يوم في الاسبوع ؟
شكرا لك

**i_Am_Legend** · 21-01-2009 09:42 PM

المشاركة الأصلية كتبت بواسطة musiccairo

ما شاء الله مبروك عليك
فعلا شكلها موفره في البنزين جدا
ممكن اعرف انت كنت شاريها بكام ؟
وهل تستحمل سفر كل لمدة 90 كيلو عالاقل مش يوميا ولكن كزا يوم في الاسبوع ؟
شكرا لك

مش فاكر كنت جايبها بكام وبالنسبة للسفر ممكن تسافر انا النهاردة شفت واحدة اختها ملاكى اسكندرية وانا فى جمصة شفت منها كتير ملاكى القاهرة مع المصيفين فاكيد بتسافر وانا مرة واحدة رحت بيها اسكندرية فقط لاغير وكان معايا واحد صاحبى وقضينا يوم جامد وكان مطرة وبهدلة بس كان يوم لذيذذذذذذذذ

**mahmoud_magdy** · 21-01-2009 10:15 PM

شكرا لردك عليا
وربنا يباركلك فيها ان شاء الله

**Hesham A.Megid** · 21-01-2009 10:45 PM

المشاركة الأصلية كتبت بواسطة i_Am_Legend

1-3-ثباتها ممتاز جدا (ببقى ماشى على اكتوبر وممكن الف اخد حاجة من على الكنبة اللى ورا او ممكن اكل وانا ماشى وسايب الدركسيون وممكن اركب الهاند فرى او اغير الاغانى وببقى بجرى عادى جدا)

هو ده بقي مقياس الثبات دلوقتي؟!

علي كل حال، ربنا يباركلك فيها! :)

**zeyad1810** · 22-01-2009 01:02 AM

ربنا يباركلك فيها ويحفظهالك

**i_Am_Legend** · 22-01-2009 04:09 PM

[QUOTE=Hesham A.Megid;611075][FONT="Tahoma"]هو ده بقي مقياس الثبات دلوقتي؟!

علي كل حال، ربنا يباركلك فيها! :)

لا طبعا هى الفكرة مش كدة بس المعروف انها سيارة صغيرة وبتعوم على السرعات العالية وبلاش تمسكلى على الواحدة يعنى