الموضوع: اليوم .. انتهاء استيراد السيارات بمنطقة بورسعيد الحرة

دكتور احمد تحياتي وانا سعيد جدا بمشاركتك في الموضوع ده

وبما ان الخلاف في الراي لا يفسد للود قضية اسمحلي اعلق علي راي حضرتك

انا مستغرب من كلمة "يحيا العدل" .....

هو العدل لو في نظر الناس اني لو باكل عيش و أخويا بياكل كيك يبقى اتمنى انه يتفقر و ياكل عيش حاف زيي !!!؟؟؟؟؟

و أنا كده أنام مستريح بقى علشان بقينا في الهوا سوا ؟؟؟؟

طبعا الفكرة مش كده ابدا ابدا
ولا يؤمن احدكم حتي يحب لاخيه ما يحب لنفسه

لكن حضرتك كطبيب مثلا بتفتح عيادة وتدفع (ضرائب) وبتشتري سيارة وبتدفع (جمارك) وتتسوق لبيتك وبتدفع (ضريبة مبيعات ورسوم وجمارك) .......الخ وفي النهاية حضرتك بتشتغل علشان تعيش
والمفترض ان الحكومة بتاخد الفلوس اللي حضرتك دفعتها وانا كمان وغيرنا كتير علشتان تعمل طرق ومدارس وبنية اساسية في المنصورة والقاهرة واسكندرية وبورسعيد كمان!!

بورسعيد المدينة الجميلة كحقيقة مجردة لا تنتج كمصدر اساسي للدخل وانما هي تعتمد علي التجارة الوسيطة بلا اي قيمة مضافة ولا يدفع اهلها ضرائب ولا جمارك مثل باقي سكان المحروسة او دعنا نقول كحد ادني ليس بمستوي باقي سكان المحروسة ولكن مع ذلك لها نصيب من البنية الاساسية كسائر مدن الجمهورية ومحافظاتها

ولا اريد تكرار ما كتبت قبلا ولكن باختصار كل الاهداف التي انشات من اجلها المنطقة الحرة في بورسعيد من جزب الاستثمارات وانشاء المصانع وتشغيل ابناء البلد لم تنجح ولم يتحقق اي منها اي شئ
واختزلت القضية في السلع الرخيصة والسيارات بدون جمارك والاستيراد للسلع الاستهلاكية
وماسورة التهريب التي تعد اوسع من قناة السويس!!

وعليه فان مشروع انشاء المنطقة الحرة في بورسعيد مشروع فاشل من الناحية الاقتصادية والاستثمارية
ومشروع معوق وضار من الناحية الاجتماعية نتيجت تلاشي فرص العمل الجاد المنتج تقريبا داخل المحافظة.
يا سيدي ظروف انشاء المنطقة الحرة قتلت فكرة انشاء اي مصنع لانه ببساطة لن يستطيع المنافسة
الي جانب اغراء اصحاب رؤوس الاموال بالاتجار في التجارة الوسيطة لسهولتها وسرعة دوران راس المال وكبر حجم العائد..

وبالتالي يجب تصحيح هذا الخطا

الواحد كان بينزل بورسعيد الجميلة يتمشى في السوق و يهزر مع التجار و يشتري هدوم و شيكولاته من اللي كنا ما بنشوفهومش من الا من السفرية للسفرية
و تقعد في سونستا تتفرج على المراكب رايحة جاية قدامة من شباك الأوضه
و تنزل تتمشى في الطرح و كانت متعة بس تتفرج على العربيات و كنت بابقى مبسوط اني باشوف العربيات النظيفة دي راكبها مصريين و كان نفسي تبقى مصر كلها كده
مش اتمنى ان النعمة تزول !!!!!!
و اصحابي البورسعيدية اللي كل يوم واحد يجيب سيفيك ونفضل نستنى لحااد بالليل متأخر علشان نجربها ....

حضرتك الغاء المنطقة الحرة مش معناه ازالة بورسعيد من الوجود لا سمح الله
وليه التشاؤم ده ان سمحتلي بهذا التعبير
لو فرضنا جدلا جدلا ان بورسعيد في اللحظة دي مش منطقة حرة!
ايه اللي حيتغير في الحجات اللي حضرتك قلتها؟؟؟؟
لا شئ تقريبا سوي ان حضرتك حتشتري الشيكولاتة بزيادة 5% جمارك و 10% ضريبة مبيعات بمجموع تقريبي 15% يعني باكو الشيكولاتة حيبقي ب 4.5 جنيه بدل 4 جنيه علي اقصي تقدير وحضرتك حتقدر تشتري الملابس بزيادة 20% - رسم الحماية الحالي (في ظل الجات قبل اكتمالها) وبنفس السعر الحالي بعد اكتمالها
واصحاب سيادتك حيخلوك تجرب السيفيك بردوا بعد ما يدفعوا الجمارك وممكن ده ياثر علي عددهم شوية

وحيكون عندك نفس الفرصة الحالية انك تقعد في سونستا تتفرج على المراكب رايحة جاية قدامك من شباك الأوضه و تنزل تتمشى في الطرح بردو

و دلوقتي بقى تشوفهم و شغلهم واقف و قرفانين و مش عارفين عربياتهم دي هاتتصادر و لا هايدفعوهم جماركها قسط و لا كاش و بأثر رجعى و لا هايسيبوهم و لا هايعملو فيهم ايه

هنا مربط الفرس تفتكر حضرتك اصحاب رؤوس الاموال من التجار لما يتركوا مجال التجارة الوسيطة والتهريب حيعملوا ايه؟؟؟
مش حيقعدوا في البيت طبعا!
اكيد كل واحد حيفتح مشروع او مصنع او علي الاقل حيغير نشاطه. وده معناه فرص عمل ونشاط
انا مبقلش ان الحياه بمبي بس ده عامل زي فطام الطفل الرضيع نعم مؤلم لكن ضروري

الموضوع ولا هو اقتصاد ولا بطيخ

الموضوع ان الشعب البطل خد جايزة بطولته لسنوات
و بعدين الشعب ده "غلط" يبقى يتربى و يتأدب و تتقفل السكك في وشه
و تشتغل أوناش البلدية تكسر ارصفته وواجهات محلاته
و نقطع باب رزقه التجاري
مش علشان يرجع زي باقي مصر ...لأ
و أكتر

قلبي معاكي يا بورسعيد يا أحلى بلد و أجمل هوا و أجدع اصحاب

رغم عدم ارتياحي للهجة حضرتك اللي كلها مرارة وشئ من التضخيم الغير علمي
لكن اسمحلي اوضح التالي:
1- الابطال اللي ضحوا بروحهم في الحروب كانوا بيدفعوا عن مصر مش عن المنطقة الحرة ولا عن بورسعيد لوحدها
2- لو كانت المنطقة الحرة تمن لدم الناس دي يبقي تمن رخيص وميرضيش حد
3- الاتجار بدم الابطال دول والمزايدة عليه فقط لمحاولة الابقاء علي الوضع الحالي شئ لا يرضاه الله ابدا خصوصا ان في ناس كتير ضحت بارواحها من قنا واسيوط والقاهرة والعريش وطول مصر وعرضها ويمكن عددهم اضعاف ضحايا بورسعيد
4- انا شخص احسب علي اليسار المصري (المعارضة) لكن حكاية الانتقام والاغتيال والكلام ده انا بعتبره غير مقبول وغير مقنع وغير منطقي
السبب اقتصادي بحت واللي مش عايز يشوف الحقيقة هو حر
5- انا زرت بورسعيد والاسماعيلية قبل كده واستمتعت بزيارتي جدا وحبيت الاسماعيلية اكتر واعجبت بجو بورسعيد وشوارعها وبساطتها وربنا يخليها لينا ولمصر (بورسعيد الجميلة مش المنطقة الحرة)

النقاش معك متعة
تحياتي