يا سيدى و لا رسالة خاصة و لا حاجة ، و مفيش اى خلاف احنا كلنا اخوات و بنفيد بعض و دى احلى حاجة فى المنتدى ، و ما خاب من استشار .
و شكرا ليك على ذوقك و حرصك على العلاقات بين اعضاء المنتدى
هو مكانش فى دماغى غير عربيتين مناسبين للمبلغ الموجود معى و هم
الكيا ريو و النيو اكسنت
الكيا ريو حلوة بس انا مش بحب شكلها اوى و كمان التابلوة بتاعها بحسة فقير شوية و تقليدى جدا عشان كدة استبعدتها
السيراتو عربية زى الفل بس الفرق بينها و بين الاكسنت 10000 جنية بردة و مفيش عوامل امان و لا ايرباج و لا abs , ebd و لو جبتها هتزنق شوية فى الفلوس.
بس لما شوفت البولو السيدان دى دماغى لفت يا جماعة العربية فخمة جدا و تقفيلها مش ممكن تقول علية صينى و فيها كل عوامل الامان بس بردة خايف من التوكيل و قطع الغيار و بعدين محدش عارف عنها حاجة .. على فكرة انا كان معايا اتنين زمايلى و احد معاة تويوتا 96 خلاص قرر يبيعها و يشترى البولو ، و واحد تانى كان مقرر يجيب الاكسنت معايا و كنا رايحين يوم الاحد نعمل الورق فى البنك .. بردة من ساعة ما شافها و هو متردد و كل 5 دقايق يسالنى دى و لا دى .. انا قلت اسأل اصحاب الخبرة فى المنتدى
بص أنا حاقولك على حاجة ظريفة جيداً
إنت تكلم توكيل فولكس و تسأل مثلاً على قطع الغيار ذي الفلتر والتيل و سييور والحاجات دي
و بعد كدة كلام غبور و إسأل على نفس الحجات و ابدء قارن فالسعر
و الله انا لسة من 5 دقايق مكلم توكيل فولكس على الرقم المختصر بتاعهم 19525 و غريبة جدا محدش رد !!!!!
هحاول تانى
نيو أكسنت
كلمت توكيل البولو و سألتة عن قطع الغيار قالى ان قطع الغيار الخارجية زى الاكصدامات و المرايات و الرفرف و الكبوت دى مش عندة و هتوصل على اخر الشهر .
و بالنسبة لقطع الغيار :
صيانة شاملة 1000 و دى بتتعمل عند 25000 عبارة عن فلتر هوا و فلتربنزين و فلتر زيت وتغيير الزيت
طقم الكاتينة 1500 جنية
صيانة ال 5000 450 جنية
طب وغبور
بالنسبة لغبور وجدت المشاركة دى كان عاملها ا/ حمادة المصرى :
قطع غيار تجاري لسه منزلش منها الا البادي من برا والفوانيس مش اصليين بس اسعارهم معقوله
نزل كمان تيل فرامل هاي تيك تعبان ب 90 جنيه مينفعش تشتريه
اسعار التوكيل
تيل امامي 350 جنيه
فلتر زيت ب 25 جنيه
فلتر هوا ب 70 او 80 جنييه تقريبا
فلتز بنزين تقريبا 250 بس هو المفروض مش بيتغيير الا لما تحصل فيه مشكله
البوجيهات ممكن تجيبها من اي مكان ب 40 جنيه وهي في التوكيل في حدود 60
نسيت اقول حاجة مهمة جدا
غبور عامل عرض خلال فترة المعرض و هو صيانة مجانية لاول 20000 كم شاملة سعر الزيوت و الفلتر و المصنعيات و قطع الغيار