للاسف معرفتش اساند حملة خليها تصدي ...واشتريت عربية نيو ماتريكس

**Hisham_ElFeky** · 23-01-2009 06:49 PM

الحمدلله الذي رزقني ....جبتها لوالدتي وهيا تعبانة شوية من العربية القديمة جدا( لادا ..والله هيا صبرت كتير وخدت وقتها) وكان لازم اجيبلها حاجة ضروري واستغليت فكرة المعرض انا كنت هجيبها من التوكيل بس المصرية عاملها ب ٩٧٥٠٠ علشان المعرض وحسيت انها مصلحة فقررت اشتري ...وبعتذر لحملة خليها تصدي علشان دي ظروف قهرية

بعد مباحاثات وبحث وشد وجذب اختارنا العربية بعد مناوشات من سوزوكي Sx 4 والسوران اختارنا المارتريكس
انا عارف التوكيل والحركات دي بس فيه واحد صحبي نصحني ب كارت اليت دا اللي هوا خدمة صيانة لحد باب البيت علشان والدتي صعب تتحرك كتير ولو فيه حاجة كبيرة لا قدر الله انا اللي هقوم بالواجب

استلمتها عاملة ٣٠ كيلو ودا بيقولي من جراجنا في العبور وحركات من دي ما علينا..المهم نفضت العربية بالكامل الحمد لله تمام الصاج زي الفل والكراسي وبصيت علي كل حاجة بس الملحوظة الوحيدة ان الموتور الكابوت مردوم تراب عايز غسلة موتور بس مش عارف اوديها التوكيل ولا اعمل ايه؟

فيه حاجة غريبة أوي مش عارف دا لاعادي ولا ايه
حوض الشنطة من جواه لونه دهبي ومش لون العربية (لونها أسود)؟؟؟

وغطا الاستبن مش ثابت دا عادي ولا بيتثبت من عند الكراسي كده؟؟
حطيت بنزين ٩٢ من بنزينة الميرغني وفجأة لاقيته بيقولي ٩٧ جنيه :) طبعا فواضح ان تنكها ٥٥ لتر تقريبا السيفيك ( ٤٥ لتر تقريبا)

المشوار من مصر الجديدة لشبرا

الانطباع جميل احساس انك ماش عالي كده برضو ليه هيبة ( اصل السفيك ان ببقا مرمي في الارض) بس بصراحة عفشتها انشف من السيفيك ( فينك يا كيمو)

المهم بقا وكله يركز وخصوصا رجالة الماتريكس...

عايز اعرف هعمل ايه في الموتور وترابه ؟

عايز اظبط العربية من جوا انا كده كده هروح لدوس (واخد بالك يا كريم) وهظبط لونين في الصالون وطبع هيكون معايا كريم منير بس لما سعادته يبقي فاضي؟

عايز اعرف مين بقا اللي عنده كل الحركات بتاعتها من مخدع محترم حتي لو غالي ( هيا فيها مخدع بس واطي اوي مش عارف ممكن نعمل دور تانى ولا لأ؟) و اكسسوار جامد ليها والشبكة العرضية بتاعتها؟

وموضوع الدفندارات بتاعتها انا عارف ان فيه اشكال كتير دي ممكن القيها فين؟

واخيرا نصايحكو أكيد هتفرق معايا كتير

ومستني الماتريكساوية اللي بقيت واحد منهم...

و

**kliken** · 23-01-2009 06:53 PM

الف مبروك و ربنا يديك خيرها و يكفيك شرها

**analyzer** · 23-01-2009 07:26 PM

الف مبروك ربنا يديكم خيرها ويكفيكم شرها

**Hisham_ElFeky** · 23-01-2009 07:38 PM

بارك الله فيكم يا شباب

**momenhamdy** · 23-01-2009 07:45 PM

الف مبروووووووووووووووك يا باشا
وربنا يديك خيرها و يكفيك شرها
وعايز ان شاء الله بعد اول صيانة تقيم محترم عنها
والف مبروك مره تانية

**د.محمد الشيخ** · 23-01-2009 07:57 PM

الف الف مبروك ..رزقك الله خيرها وابعد عنك شرها

بس هو مش المفروض تستلم العربية من الوكيل نظيفة من كله خاصة الموتور !!!

**Nader** · 23-01-2009 07:59 PM

الف مبروك يا اتش وربنا يبارك لكم فيها.

بالنسبة للموتور روح اي بنزينة وخلي العامل ينضفلك الحوض بالهواء المضغوط

من غير ما يقر اوي من العربية.

بالنسبة للدفندرات منصحكش بها وخصوصاً لان العربية هتكون مع الحاجة ومش هتعرف تتعامل مع المرور لان الدفندرات لازم تكون مثبوتة في الرخصة.

باقي الاستفسارات يفيدك فيها رجاله الماتريكس إن شاء الله.