::: موضوع مخصص عن معارض السيارات الغير محترمة :::

**omar-saad** · 24-01-2010 03:38 PM

هههههههههههههههههههههههه انا اصدى يا استاذ احمد على العربية اللى احسن منها لما تجيبها متنساش تدينى بيها لفة ولا خسارة فيا؟

**ahmed-moga** · 25-01-2010 07:45 PM

المشاركة الأصلية كتبت بواسطة momo_sunny

هههههههههههههههههههههههه انا اصدى يا استاذ احمد على العربية اللى احسن منها لما تجيبها متنساش تدينى بيها لفة ولا خسارة فيا؟

انت تأمر يافندم بس تيجي العربية ان شاء الله والعربية تحت امرك لفتين تلاتة اربعة زي ماانت عاوز غالي والطلب رخيص

**sv065** · 04-02-2010 11:40 PM

لاحول ولا قوة إلا بالله

حاجة زي دي ما يتسكتش عليها أبدا ...
دول بيتحلوا مال الناس بدون حق

ولازم جهاز حماية المستهلك يكون له وقفات حاسمة مع الناس دووول

**asd7778** · 24-02-2010 11:13 PM

المشاركة الأصلية كتبت بواسطة tamer_aj

علي فكرة برده نفس الكلام كان هيحصل معايا من معرض stop car اللي في شارع مصطفي النحاس, أنا كنت هاشتري من بنك ناصر عشان الفايدة بتاعته محترمة جدا, وهو في المجمل بنك محترم جدا, المهم قالولي في معرض stop إن البنك بيأخد 1500 جنية فا دول هانضفيهم علي ثمن العربية, وخلاص كنت هاخلص معاهم, لكن لجل ستر ربنا غيرت رأي في أخر لحظة بعد ماجبولي العربية لآني كنت حاسس بعملية نصب, عشان موضوع الألف و نص + 500 جنية عمولة العرض + الحلاوة بتاعت البياعة +300 جنية مصروفات بنكية, ده غير المكسب اللي حطينه علي ثمن العربية, فقررت إني أروح أشتري مباشرا من عز العرب و فعلا روحت جبت منهم عرض و رحت بيه البنك و أتفجأت إن مافيش أي 1500 جنيه زيادة علي ثمن العربية هما بس ال 300 جنية المصروفات البنكية وشكرا علي كده, والحمد لله فلت من عملية النصب بتاعت المعارض الغير محترمة بلإضافة لآني أشتريت العربية بسعرها الحقيقي زائد كمان تخفيض كان عامله عز العرب, فإحترسوا يا جماعة من هذه النوعية من المعارض.
م. تامر حافظ

فعلا يا جماعة كلام تامر سليم 100 فى 100 انا للاسف اتعرضت لنفس الموقف مع ستوب كار نصابين تماما

**asd7778** · 24-02-2010 11:44 PM

نصيحة عامة فى الشراء:
اولا لا تتعامل مع اى معرض والسلام والاحسن التوكيل مباشرا حتى لو حتدفع 1000 ج اكتر بس توفير 1000 او 2000 لا يساوى شئ فى حالة وقوع مشكلة فى العربيه

ثانيا والاهم فى حالة القسط افصل تماما ما بين المعرض والبنك يعنى حضرتك تروح البنك الى انت تختاره حسب حالتك وتشوف العرض ال يناسب يعنى موظف حكومى بنك ناصر بى تردد البنك الى مرتب بتحول ليه هو احسن بنك ليك عشان حيديك احسن عرض لا تجعل المعرض يتدخل تماما فى موضوع البنك او الـتأمين عشان ده سوق سمسره فى الاساس

**Dr.SherifMansy** · 25-02-2010 09:51 PM

أخوانى الأعزاء فى المنتدى...

بصراحة أول مرة آخد بالى من الموضوع ده و هو فعلا مهم جدا لتبادل الخبرات.

و برغم تأخرى اسمحوا لى اضيف تجربتى و اللى بفضل ربنا عدت على خير ..

بدأت الحدوتة بالبحث عن لانسر خليجى 1600 فول اوبشن علشان يكون فيها 2 ايرباج و abs & ebd ن و ده كان شرطى عند السؤال عن العربية فى أى معرض ..

أول محطة :

بعد ما عينى زغللت من كتر اعلانات المصرية للسيارات ، خطفت رجلى لفرع المعادى اللى على الكورنيش ، بعد مكالمات تليفونية خلتنى احس ان ميتسوبيشى موتورز عاملة خط انتاج لحسابهم ، و تأكيدهم ان الخليجى و المصرى بكل اشكاله عندهم ، حتى لو من المريخ عندهم برضه ، و لما رحت كانت الصدمة بعد الكلام المعسول و التسبيل و خلافه ، ان ماعندهمش اى عربية من اللى اسعارها مكتوبة فى الأعلانات (الأسعار اللى حطمت كل الأرقام القياسية فى الرخص عن باقى السوق) ... ليه ؟؟؟ لسه متباعة يا أفندم .... و بدأت احس بالأشتغالة لما عرفت انهم ما بيشتغلوش فى اللانسر الخليجى ، و انى لو عايزها هايبعت لسه بجيبها من الرواس و يحاسبنى عليها حسب سعرها (+ مكسبهم طبعا ... شوف الجمال و الحلاوة) ... و كملت صورة الخداع لما بدأت أسأل عن انواع تانية كنت حاططها بدائل بسبب تدنى سعرها عندهم عن السوق ... و كان نفس الرد "لسه متباعة يا أفندم" ... تقولشى عصابة بتغير منى قاعدين يشتروا كل عربية اختارها ؟؟؟
و بقية المسرحية الهزلية كانت لما سألت عن الهدايا اللى اعلنوا عنها ، و اللى هى كانت وقتها تليفزيون كبير كام بوصة و مش فاكر ثلاجة كمان ، و غيره و غيره ، و ساعتها حس الموظف انى بازنقه و مش ناوى اشترى فقال لى فى نفاد صبر ان دى على "العجل الكبير" اللى سعره فوق 400.000 جنيه (يا سلام ، ادفع المبلغ ده و آخد هدية ب3 أو 4 آلاف جنيه)..
و ختام المسرحية لما طلبت منه يفصل عربيتى السابقة (لانسر بطة 92) و بعد ما فلاها ، قال لى و كأنه بيكرمنى على الآخر ، دى تسوى من الآخر 22.000 بس ، طبعا سبتهم فى الحال (العربية اتفصلت تجارى 37.000 و اختى اخدتها بالسعر ده ، و كان ممكن تجيب أكتر لو لحد تانى) ... شوف الأمانة بتاعتهم يا أخى لحد فييييين ؟؟؟؟؟

**Dr.SherifMansy** · 25-02-2010 10:06 PM

تانى محطة :

معرض الطارق فى الدقى ، بعد ما رحت و وضحت طلبى بالتفصيل ، طلب منى افكر فى النيسان التيدا ، و لما شكرته و قلت له انى بافضل اللانسر البومة أولا ، و ثانيا مابحبش شكل التيدا ، و ثالثا و هو الأهم سعرها اعلى من مقدرتى ، و قعد يحاول معايا و لما فشل طلب منى عربون علشان يجيب العربية ، و دفعت العربون و وعدنى انها تكون موجودة تانى يوم لأنها هاتيجى من معرضهم التانى ، و بدون الخوض فى تفاصيل مملة بدأ نفس السيناريو بتاع "لسه ماجتش يافندم" ، "تيجى على الساعة 3 بعد الظهر" ، "طالما اتأخرت كده يبقى 9 بالليل" ، "معلهش بس أكيد بكره جاية" ، "أصل اللى انت عايزة خلص ، لكن الموزع عنده اختها و لكن باسبويلر و من غير ايرباجز" ، "جاية من اسكندرية بكرة تريلا عليها عربيتين بالمواصفات بتاعتك و حجزنا لك واحدة" ... الخ الخ
و لما نفد صبرى بعد 4 أيام مماطلة رحت و عينى بتطق شرار ، و تانى عرض على التيدا ، و لما رفضت عرض على انتظر ، و لما حس انى ممكن اعمل قلق و المعرض مليان ناس جاب لى فلوسى بهدوء و هو فى قمة الغيظ.
و بعدها قعدوا يتصلوا بى كذا يوم علشان اروح احجز لأن العربية جاية فى المراكب خلاص و لازم ادفع عربون تانى قبل سعرها ما يزيد

و طبعا قلت حقى برقبتى

**Dr.SherifMansy** · 25-02-2010 10:11 PM

ثالث محطة :

معرض فى آخر أحمد عرابى ناصية ش السودان (بعد ابو ذكرى أحمد عرابى) ، بس مش فاكر اسمه ، حاول يعمل معايا لعبة ادفع عربون و احجز و لكن لما طلبت منه اشوفها الأول قعد يماطل و يسوف و يقول لى انها فى فرع تانى لهم فى المعادى ، و غيره كلام كتير ، و اخيرا ان مافيش المواصفات دى فى عربية خليجى !!! (أمال انا راكب ابه دلوقت ؟؟) و قعد يحاول بشتى الطرق انه ياخد العربون ، و لكن على مين ... كنت أخدت الدرس
و الحمد لله انى سبتهم لأنى عرفت بعدين ان العربية اللى عنده مافيهاش abs أصلا ، و كمان سمعت كلام انه مش بيرد العربون ، أو مش بيرده كاملا .. مش فاكر بالضبط ..

دول الثلاث مقالب اللى ربنا برحمته و كرمه و فضله نجانى منهم.

و ربنا يحفظنا جميعا.

**gebreel** · 25-02-2010 11:16 PM

ده ايه السبهللة دي يا جماعة انا قريت 17 صفحة من الذهول المتواصل الضمير راح خلاص من عند الناس؟؟!! مبقاش فيه حاجة اسمها أأكل عيالي او اهلي حرام؟؟!! و مفيش احترام لتعب الناس في الفلوس خالص؟؟!! لا حول ولا قوة الا بالله و الحمد لله لأني كنت هقع مع بتوع Stop دوول في عربية قبل كدة و بردو نفس حوار الاصرار على البنك بس ابمرة دي علشان كان الاهلي كان الاصرار على فرع قصر انيل او وسط البلد حاجة كدة مش فاكر بالظبط و بردو نفس الحجة ان فيه حبايبهم و هيخلصوا الورق بسرعة

حاجة بردو على المصرية لما رحت علشان اقارن بين اللوجان و اللانوس على اساس اهم معرض كبير و عندو كل العربيات و قد كان العربيتين موجودين و كدة فتحت كبوت العربيتين و معاهم كبوت سيريون و كانت المفاجأات
1- كابوت اللوجان كان بيفتح من غير مافتحو من جوة (يعني مفتوح على طول حتى لو رزعتو من هنا لبكرة)
2- كان فيه اسلاك كهرباء غريبة كدة منعكشة في اغلب العربيات اللي بسيط على كبوتها و الموتور بتاعها و كدة و خصوصا السيريون كان صباح العك اللي في الضفيرة بتاعتها و باينة قوي
3- كنا رايحين يوم جمعة و بعد الصلاة و كان المعرض زحمة قوي و في وسط المعرض واحد من الناس المحترمين بتوع الsales بينده على عامل غلبان من اللي بينضفوا العربيات و بيقولو " خود يا ابن ال ............ة" في وسط عائلات و اطفال و ناس كبيرة في السن مما يدل على عدم احترام العميل بالمرة

-

الموضوع: ::: موضوع مخصص عن معارض السيارات الغير محترمة :::

LinkBack

أدوات الموضوع

عرض

-

-

-

-

-

-

-

المواضيع المتشابهه

حد يعرف معارض محترمة بتشتغل في الرينو المستعمل

موضوع مخصص للهجوم على الميجان

الإدارة المحترمة والإدارة الغير محترمة

الكلمات الدلالية لهذا الموضوع

المفضلات

المفضلات

ضوابط المشاركة