بدل فاقد الشهادة الاعفاء من الخدمة العسكرية

**ASHAALAN** · 26-01-2009 11:44 PM

عايز أطلع بدل فاقد الشهادة الاعفاء من الخدمة العسكرية. حد يعرف منين أو ازاي؟

**د./اليشع ثابت** · 26-01-2009 11:49 PM

المشاركة الأصلية كتبت بواسطة ashaalan

عايز أطلع بدل فاقد الشهادة الاعفاء من الخدمة العسكرية. حد يعرف منين أو ازاي؟

بتطلع من حى الزهور
للاسف مش متذكر فين تحديد دقيق
لانى عملتها من فترة بعيدة قوى كنت بصحح الاسم فقط
تقريبا حى الزهور على ما اتذكرا
و بالتوفيق إن شاء الله

**mo7amed_omara** · 27-01-2009 01:11 AM

من المكان اللى انت كنت مطلع منة اول وحدة اللى ضاعت منك
و بتروح بصورة منها و بتدفع مبلغ 18 جنية دة النظام هنا عندنا فى اليكس و اكيد كدة عندكو هناك

**walyas1** · 27-01-2009 01:25 AM

من الهايكستب اذا كنت من سكان القاهره اول طريق مصر اسماعيلية الصحراوى منطقة تجنيد القاهرة

**ASHAALAN** · 27-01-2009 11:00 AM

الف شكر يا شباب

**الطنطاوي** · 27-01-2009 01:15 PM

لابد من عمل محضر في قسم الشرطة أولاً بفقدان شهادة التجنيد

المسنتدات المطلوبة
صورة من المحضر + صورة من الشهادة المفقودة + صورة شخصية

تستخرج الشهادة الجديدة بعد يومين من التقديم

**elbaz45** · 27-01-2009 02:25 PM

بص يا باشا لانى لسه عامل الموضوع ده يدوبك من اسبوع فقط .

ولازم نفرق بين حالتين

أولا : لو معاك صورة واضحة من شهادة التجنيد واضح فيها الرقم بتاعك اللى هما بيسموه فى الجيش الرقم الثلاثى

فى الحالة دى تروح منطقة التجنيد اللى انت تابع ليها ومعاك صورة شهادة التجنيد اللى اتفقنا انه يبقى واضح فيها رقمك الثلاثى وكمان تاخد معاك صورة البطاقة وصورة شخصية وهيطلب منك تشترى ورقة وملف ب19 جنيه تقريبا هتملى البيانات اللى فيهم وبعدين هتيجى تستلم الشهادة بعدها بيومين تلاتة

ثانيا : لو مش معاك صورة شهادة التجنيد او لو معاك صورة ليها بس مش واضح فيها رقمك الثلاثى

يبقى فى الحالة دى لازم تروح الاول تعمل محضر فى القسم "اى قسم شرطة ومش شرط القسم اللى انت تابع ليه" وبتعمل محضر بدل فقد وبتبقى دباجة معروفة وفى الغالب بتلاقيهم كتبين ورقة فى القسم بالصيغة بتاعتها .
المهم هتاخد معاك المحضر وصورة البطاقة وصورة شخصية وتروح منطقة التجنيد اللى انت تابع ليها هتشترى برضه الورقتين والملف ب19 جنيه وتملى البيانات اللى فيهم وبعدين تديهومله وهتستلم برضه الشهادة بعدها بيومين تلاتة.

نصيحة غالية جدا
طبعا منطقة التجنيد فى الغالب بتبقى بعيدة عن محل سكن اى واحد فينا فبالتالى لو الراجل كتبلك فى الوصل انك تيجى تستلم الشهادة يوم 1 فبراير مثلا متروحش فى المعاد بالظبط لانك مش هتلاقيها خلصت وفى الغالب هتروح بعدها بيوم او اتنين عقبال ما تكون خلصت يعنى تروحله على 3 او 4 فبراير مثلا وده الاضمن.

وارجو اكون افدتك.

**ASHAALAN** · 27-01-2009 02:46 PM

الف شكر يا باشا

**ac_milan** · 16-09-2013 03:07 AM

السلام عليكم,
لازم بدل فاقد الإعفاء النهائي يكون من منطقتي التجنيدية؟أنا شغلي ف القاهرة,و المنطقة التجنيدية التابع ليها ف محافظة تانية,ينفع أعملها من السجلات العسكرية ف آخر عباس العقاد؟