مشروع جديد إشترك ولو برأيك

**ZALABANY** · 27-01-2009 10:19 AM

النهارده لقيت ياجماعه على مصراوي اعلان عن واحد ممكن يوصل ناس في طريقه وهو رايح الشغل من المعادي لمدينة نصر وده الرابط
http://masrawy.com/Classfied/detail.aspx?code=1740977
والله فكره حلوه جدا وموجوده في كل دول الخليج كمان الناس توصل بعض حتى لو بمقابل هايكون اقل كتير من اللي هاياخده التاكس وهانريح بعض والزحمه ممكن تقل
الفكره ان كل واحد ساكن في مكان يقول انا بتحرك من المكان ده الساعه كذا وبمر على الأماكن الفلانيه وممكن ياخد في طريقه الناس اللي ساكنين قريب من الأماكن دي بالاتفاق وطبعا يكون في مقابل لده على الأقل بنزين الراجل يعني الراجل اللي عامل الإعلان ده بياخد خمسه جنيه من اللي بيركب معاه من المعادي لمدينة نصر لو فكرت تركب تاكس هاتدفع 20 جنيه لو الفكره دي لاقت قبول ممكن يكون المنتدى بتاعنا نواه للموضوع ده وهاتبقى كمان مفيده جدا للناس اللي ما معاهاش عربيات
الموضوع ممكن ناس تأيده وممكن ناس تعارضه خلينا نشوف ايه ايجابياته وسلبياته وامكانية تطبيقه حتى لو على مستوى أعضاء منتدانا

**fadynabil** · 27-01-2009 10:41 AM

بجد موضوع ظريف جداً .. بس صوابعك مش زي بعضيها ومش كل الناس كويسه ومضمونه

... بمعني أنا مش ضامن اللي ممكن يركب معايا ممكن يكون حرامي أو ماشابه ذلك

وأعتقد إن الموضوع ده هيبقي سهل أوي بالنسبه للناس دي

بصراحة االموضوع ممتاز جدا .. بس صعب أوي مع الشعب بتاعنا

**karimone** · 27-01-2009 10:50 AM

هي مشكلته فعلاً ان الواحد مايضمنش اللي هايركب معاه

بس هي فكره حلوه و قابله للتنفيذ مع اخذ الاحتياطات الكافيه

**kh_talaat** · 27-01-2009 11:34 AM

فكره حلوه وبالنسبة للضمان .. ممكن صاحب العربيه يشترط التعارف على اللي هيركبوا معاه كل يوم يعني يشوف بطاقاتهم ويعرف بيشتغلوا فين وكارنيه الشغل ويبقى الموضوع أساسه التعارف عشان ميباقش في حساسيه في السؤال

**rockana9112007** · 27-01-2009 11:44 AM

ياجماعة هو اللى هيركب دة هيبقى عبيط .فى حياتنا العادية بنقابل ناس اشكال والوان واكيد عندنا فراسة تخلينا نعرف نوايا اللى قدامنا
المهم انا كانت ليا فكرة مشابهة بس الحمد لله فشلت بسبب الخوف
انا من سكان اكتوبر وشغلى كان فى القاهرة وكذالك اختى واولاد خالتى ساكنين فى حى جنبنا ولد وبنت وكذالك بيشتغلو فى القاهرة مع اختلاف المناطق يعنى انا كان شغلى جنب معهد ناصر واختى ماسبيرو وابن خالتى شغلة فى الدقى وبنت خالتى شغلهااا فى مدينة نصر.وكلنا بننزل نركب الصبح مواصلات تقريبااا فى وقت واحد .لما جيت حسبت المبلغ الشهرى اللى بندفعة مجتمعين لسواقين الميكروباصات من 1200الى 1500 ودة بصراحة قسط عربية محترمة جداا .فبدل ماندفعو فى المواصلات ندفعو فى قسط عربية بس فى النهاية العربية فى الاخر هتبقى ملكنا ونقدر نبيعها ونتقاسم ثمنها ودة يبقى استثمار كويس جدااا
لان مهما دفعتى فى الميكروباصات مش هيحصل ان حد هيقولك ان ليك سهم فى الميكروباص.لحد هنا والفكرة جميلة جدااااا
خصوصاااا ان محدش فينا لوحده يقدر يشترى عربية ويتحمل قسطهاااا بمفردة
طبعاا انطرحت اسئلة زى مين اللى العربية هتكون بأسمة ومين اللى هيسوق ونفترض واحد فينا عاوز يروح مشوار والتانى لأ او واحد اتأخر والتانى عاوز يروح بدرى وكلام من دة كتير
المهم قررنا فى النهاية نلغى الموضوع درءاااا للمشاكل
ياريت تقولولى رايكم فى فكرتى عشان فى ناس قالولى دة فكر اشتراكى بتاع الملكية المشتركة والفكر دة اثبت فشلة من زمان
خالص تحياتى لصاحب الموضوع وبعتذر لو كنت خرجت برا الموضوع بتاعة

**HeMa_LanCeR** · 27-01-2009 11:53 AM

المشاركة الأصلية كتبت بواسطة rockana9112007

ياجماعة هو اللى هيركب دة هيبقى عبيط .فى حياتنا العادية بنقابل ناس اشكال والوان واكيد عندنا فراسة تخلينا نعرف نوايا اللى قدامنا
المهم انا كانت ليا فكرة مشابهة بس الحمد لله فشلت بسبب الخوف
انا من سكان اكتوبر وشغلى كان فى القاهرة وكذالك اختى واولاد خالتى ساكنين فى حى جنبنا ولد وبنت وكذالك بيشتغلو فى القاهرة مع اختلاف المناطق يعنى انا كان شغلى جنب معهد ناصر واختى ماسبيرو وابن خالتى شغلة فى الدقى وبنت خالتى شغلهااا فى مدينة نصر.وكلنا بننزل نركب الصبح مواصلات تقريبااا فى وقت واحد .لما جيت حسبت المبلغ الشهرى اللى بندفعة مجتمعين لسواقين الميكروباصات من 1200الى 1500 ودة بصراحة قسط عربية محترمة جداا .فبدل ماندفعو فى المواصلات ندفعو فى قسط عربية بس فى النهاية العربية فى الاخر هتبقى ملكنا ونقدر نبيعها ونتقاسم ثمنها ودة يبقى استثمار كويس جدااا
لان مهما دفعتى فى الميكروباصات مش هيحصل ان حد هيقولك ان ليك سهم فى الميكروباص.لحد هنا والفكرة جميلة جدااااا
خصوصاااا ان محدش فينا لوحده يقدر يشترى عربية ويتحمل قسطهاااا بمفردة
طبعاا انطرحت اسئلة زى مين اللى العربية هتكون بأسمة ومين اللى هيسوق ونفترض واحد فينا عاوز يروح مشوار والتانى لأ او واحد اتأخر والتانى عاوز يروح بدرى وكلام من دة كتير
المهم قررنا فى النهاية نلغى الموضوع درءاااا للمشاكل
ياريت تقولولى رايكم فى فكرتى عشان فى ناس قالولى دة فكر اشتراكى بتاع الملكية المشتركة والفكر دة اثبت فشلة من زمان
خالص تحياتى لصاحب الموضوع وبعتذر لو كنت خرجت برا الموضوع بتاعة

للأسف انتو حورتوا الموضوع لمنطق تاني
حضرتك بتقول الفلوس دي بتدفعها لميكروباص (كلام جميل)
يبقي العربيه لو جت هتاخد كل واحد وتوصله لحد شغله مين بقي اللي هيسوق ان شاء الله حتي كل واحد يوم مش هتفرق خالص
طيب ما وانت في الميكروباص حضرتك بتقعد ومش بتسوق خالص
وبالنسبه لو حب حد يروح مشوار فا طبعا ده خارج عن الموضوع خالص
علشان حضرتك مابتدفعش فلوس الميكروباص وبترجع تخرج بليل فا الميكروباص بيوصلك تاني بليل مش كده باردو
يعني العربيه دي تكون لمشوار الشغل فقط لا غير
وممكن بقي اللي هيكون عليه الدور يسوق تفضل معاه العربيه لحد تاني يوم الصبح ويشوف مين اللي هيسوق ويديهالو
وهكذا هيكون في تاعون مستمر
بس يكون في دماغكم انها بدل الميكروباص بس يعني دي مش ملاكي

**silver_som3a** · 27-01-2009 11:56 AM

كنت ادفعهم قسط اتنين لانوس.....ولا اتخنقتوا بقي تبقوا مش قرايب

**smsmbakr** · 27-01-2009 12:04 PM

ياجماعة دي حاجة حلوة
بس في حاجة
دلوقتي لو ركب الناس كل يوم يبقى بالكتير قوي هما 4 افراد كل يوم ياعني مش هيبقى في فكر للحرامية انها تركب
ياعني الواحد مش هيجيب عربية تويوتا 14 راكب ويمشي بيها

**Rsarabia** · 27-01-2009 01:31 PM

و تثق ازاى اللى راكب معاك دا مش معاه مسدس ولا مطوة و عاوز فلوسك او عاوز يسرق عربيتك او واحد serial killer عاوز يقطعك 37 حتة و يرميك فى الشارع ويقول اللى يجمعه تانى يبقى الكسبان

**kh_talaat** · 27-01-2009 02:13 PM

المشاركة الأصلية كتبت بواسطة Rsarabia

و تثق ازاى اللى راكب معاك دا مش معاه مسدس ولا مطوة و عاوز فلوسك او عاوز يسرق عربيتك او واحد serial killer عاوز يقطعك 37 حتة و يرميك فى الشارع ويقول اللى يجمعه تانى يبقى الكسبان

هههههههههههههههه