كل واحد فينا يحكى عن موقف فى حياته اتخبطت فيه العربية و كيف تم تصليحها

**LADA2107s** · 30-01-2009 12:54 AM

المشاركة الأصلية كتبت بواسطة dr_timo

ههههههه طيب فضايح بفضايح بقي هحكيلكم فضيحة من فضايحي كنت اول متعلمت مبعرفش اقف عالمطالع يعني لو مطلع ووقفت او العربية بطلت بتقوم متزحلقة مني لورا ففيوم بقي كنت رايح امون من البنزينة اللي جمبنا والبنزينة الرخمة دي ليها مطلع كدة ولاني بمون بنزين تمانين فالواحد بيضطر يقف فطابور والطابور بيقف علي المطلع دة فانا بقي وقفت عليه ودايس فرامل المهم جيت اطلع فقمت شايل من عالفرامل وجري جري جاي ادوس عالبنزين قامت العربية متزحلقة لورا عاللي ورايه ههههه وديب خبطته قمت دايس فرامل بسرعة بعد مكنت لمسته المهم الراجل نازل م العربية وانا مش عارف انزل اكلمه ههههههه عشان دايس عالفرامل ومش قادر اشيل رجلي من عليها كنت ناسي خالص ان في حاجة اسمها فرامل يد وبعدين الراجل نزل وجالي لقيته ضخم اوي قلت قشطة هنتضرب والحمد لله وبعدين الغرريبة لقيته هادي جدا وطيب اوي وبيقولي كدة مش تمسك فرامل قلتله معلش ولقيت عربيته بلونيز زي عربيتي فقلتله معلش بقي بولونيز بتدلع علي بولونيز فسكت ومشي انا لو منه كنت قلتلي لفظ ابيح يعني عشان بولونيز تعجنلي عربيتي هههههه ومشي رجع عربيته ورجع لورا شوية قمت شايل فرامل تاني وجاي ادوس بنزين قمت بردو نازل عليه هههههههه والله ساعتها بقي المفروض كان ضربني فقالي ياعم دوس فرامل قلتله مانا دايس قالي دوس بقي بنزين وبراحة عالدبرياج قلتله كدة عايز تلت رجول وانا عندي اتنين طيب اوطي امسك التالت بئيدي ولا اعمل اية ههههههههه قالي ياعم شيل من عالفرامل بسرعة ودوس بنزين قمت عامل كدة قام هوب العربية طلعت وخبطت في اللي قدامي ههههههههههههه توحفة والله ومصيبة سودة كا يوم ميعلم بيه الا ربنا والناس كلها اتفرجت عليا من ضاحك لساخر لشاتم في سره انا نفسي بعد ممونت قلتلي غور ياد ياغبي انت بقي من هنا متورنيش وشك تاني

دى من اكبر المشاكل اللى بتقابلنى فى حياتى......
ههههههههههههه... عشان كده وانا مروح كل يوم بقنع صحابى اللى مبيعرفوش يسوقوا وبيركبوا معايا واحنا مروحين ان المطلع ده بيأثر على العربية وانا مبحبش اخده عشان مضرش العربيه وبلف بيهم كل يوم من مكان مفيهوش مطالع ...... فى يوم واحنا قاعدين لقينا راجل معاه نوبيرا وابنه راكب جنبه وعنده حوالى 11 سنه ...... لما قاموا من الكافتريا الولد قال لابوه هات اطلع العربيه قاله ماشى ...... طبعا ضحكت وبقول لصحابى ها يطلعها من الركنه بس لانه مستحيل يعرف يطلع بيها المطلع ....... طبعا فى لحظه لقيت المعلم طلع المطلع وزى الفل ........ شكلى بقى تمام دلوقت

**dr_timo** · 30-01-2009 04:33 AM

المشاركة الأصلية كتبت بواسطة LADA2107s

دى من اكبر المشاكل اللى بتقابلنى فى حياتى......
ههههههههههههه... عشان كده وانا مروح كل يوم بقنع صحابى اللى مبيعرفوش يسوقوا وبيركبوا معايا واحنا مروحين ان المطلع ده بيأثر على العربية وانا مبحبش اخده عشان مضرش العربيه وبلف بيهم كل يوم من مكان مفيهوش مطالع ...... فى يوم واحنا قاعدين لقينا راجل معاه نوبيرا وابنه راكب جنبه وعنده حوالى 11 سنه ...... لما قاموا من الكافتريا الولد قال لابوه هات اطلع العربيه قاله ماشى ...... طبعا ضحكت وبقول لصحابى ها يطلعها من الركنه بس لانه مستحيل يعرف يطلع بيها المطلع ....... طبعا فى لحظه لقيت المعلم طلع المطلع وزى الفل ........ شكلى بقى تمام دلوقت

هههههههههههههه ههههههههههههه نفس الشعور اللي كنت بحسه لما اشوف كوبري واقف والاقي ميت عربية واقفين عادي ومتزحلقوش علي اللي وراهم زيي

**belal rashed** · 08-02-2009 03:32 PM

إيه يا جماعه خلاص كلنا فجأه بقت عنينا فى وسط راسنا وما بنخبطش.......... ولا محرجين نقول على أخطأنا.
من الشجاع القادم؟؟؟؟

**Osama_soliman** · 08-02-2009 11:52 PM

اخر خبطة خدتها "من فترة طويلة وانا الحمد لله محافظ على العربية" كان بسبب ارض مصر المحروسة

فجأة سمعت خبطة جامدة جدا من تحت العربية وكانت بسبب حفرة مش ظاهرة فى الشارع

وعاشت مصر حرة مستقلة

**HeMa_LanCeR** · 09-02-2009 12:20 AM

انا الحمد لله ما خبطش غير مره واحده
وكانت من كام شهر كده بس مش انا اللي غلطان
كان في قدامي عربيه نيسان صني في الاوتوستيراد
يعني كنت خارج من عباس وواقف في اليوترن علشان الف اتجاه حلوان كده
واحنا واقفيت وماشي واحد واحده
وبتاع الصني لاقيته مره واحده راح طاير وانا بقي وراه
وراح واقف مره واحده وانا باردو وراه بس المره دي كنت عنده في الشنطه
والعربيه لسه معلقتش نمر
طبعا اكصدامه اتدمر والشنطه اتخبطت
وانا بقي الكبوت انكمش (بس الحمد لله رديتها علي البارد وكأن مافيش حاجه)
والغريبه بقي ان الشبكه سليمه كلها ما عدا رجلها كلها اتكسرت بس وشها زي ماهو
وربنا يستر بقي الايام اللي جايه

**Demirell** · 09-02-2009 01:12 AM

مرة عربية والدي و والدتي كانوا مركونين ورا بعض تحت البيت (عربية والدي هي اللي قدام ) ....بصيت من البلكونة حسيت ان عربية والدي مش معدولة شوية....نزلت عشان أضبطها بس كنا بالليل متأخر وما كنتش شايف قدامي....جيت برجع بيها لورا حاجة بسيطة..لقيت العربية طرااخ! أنا ما كنتش مستوعب اللي حصل وقلت هنزل ألاقي عربية والدتي وشها متدمر!! نزلت لقيت الحمد لله العربية ما جرالهاش أي حاجة غير بس نقرتين صغيرين قوي في الاكصدام لون الدهان اتشال عندهم...بس اكصدام عربية والدي ما جرالوش أي حاجة!
طبعا ربنا ستر وما حكيتش لحد على حاجة

بس ساعتها حسيت بقمة الغباء! ومن يوميها وأنا لازم أبص على كل حاجة حوالين العربية قبل حتى ما أركبها....

مرة تانية أخويا كان ماشي بعربيته في شارع جانبي عند سيتي ستارز وفجأة طلعله واحد لسه بيتعلم السواقة من شارع تاني ودخل في الباب اليمين قدام....الغريب ان الواد ماكانش ماشي بسرعة انما رغم كده الباب عند أخويا اتخرم!!!
أخويا طبعا مارضيش يسيب الواد غير لما والده دفعله حق باب جديد للعربية :)

**karmoty** · 11-02-2009 02:41 AM

أولا شكرا يا Lada2107s على الموضوع الجامد جدا ده وهو بجانب انه بيلمس ناس كتير من اللي بيسوقو في مصر فهو كمان موضوع يضحك (في بعض الاحيان) ويارب ما يبليش حد في الطريق باي حاجة وحشة ويحفظنا كلنا.
المهم
أنا بقى هحكيلكم على مأساة ممكن تضحك حصلتلي كنت لسة متعلم جديد وتاني يوم من تطليع الرخصة وواخد اختي بوصلها مشوار وجاي من طريق جنب سور قصر القبة ولغبائي فوتت اول ملف قابلني وكنت هفوت تاني ملف وببص في المراية ملقتش حد ورايا وانا في طرف الشارع وقمت واخد اللفة من اقصى اليمين وخلاص بقى مكمل وألاقي فرملة طويييييييلة و ديييييييييب وطبعا الخبطة كلها جت في اخوكو والعربية لفت وخبطت في واحد من الاتجاه التاني وقعتله الاكصدام الامامي والمشكلة ان اللي خبطني 132 ومحصلوش حاجة وكان بيتخانق اما اخوكم فإتشالي البابين الشمال وطبعا الكراسي اتكسرت بس الحمد لله طلعت منها سليم.
بس كل ما بفتكر الحادثة دي با ترعب من فظاعة الموقف وربنا يكفينا ويكفيكو شر الحوادث.

**LADA2107s** · 21-02-2009 07:16 PM

المشاركة الأصلية كتبت بواسطة karmoty

أولا شكرا يا Lada2107s على الموضوع الجامد جدا ده وهو بجانب انه بيلمس ناس كتير من اللي بيسوقو في مصر فهو كمان موضوع يضحك (في بعض الاحيان) ويارب ما يبليش حد في الطريق باي حاجة وحشة ويحفظنا كلنا.
المهم
أنا بقى هحكيلكم على مأساة ممكن تضحك حصلتلي كنت لسة متعلم جديد وتاني يوم من تطليع الرخصة وواخد اختي بوصلها مشوار وجاي من طريق جنب سور قصر القبة ولغبائي فوتت اول ملف قابلني وكنت هفوت تاني ملف وببص في المراية ملقتش حد ورايا وانا في طرف الشارع وقمت واخد اللفة من اقصى اليمين وخلاص بقى مكمل وألاقي فرملة طويييييييلة و ديييييييييب وطبعا الخبطة كلها جت في اخوكو والعربية لفت وخبطت في واحد من الاتجاه التاني وقعتله الاكصدام الامامي والمشكلة ان اللي خبطني 132 ومحصلوش حاجة وكان بيتخانق اما اخوكم فإتشالي البابين الشمال وطبعا الكراسي اتكسرت بس الحمد لله طلعت منها سليم.
بس كل ما بفتكر الحادثة دي با ترعب من فظاعة الموقف وربنا يكفينا ويكفيكو شر الحوادث.

يانجم انا اللى عاوز اشكرك على مشاركتك ويارب يجعلها اخر الخبطات.....

انا شوفت موقف مره عمرى ما قادر انساه وموت من الضحك..... فيه مستشار ساكن فى شارع وانا معدى لقيته بيركن والعسكرى واقف وراه وبيقوله تعالى ... تعالى .... وكده يعنى ... المهم تاكسى معدى لقى الباشا بيركن راح واقف مكانه خالص..... المهم الراجل بيركن والعسكرى بيقوله تعالى فاضى تعالى ..... قام راجع بسرعه وخبط فى التاكسى..... اللى يضحك بقى ان العسكرى طلع جرى على سواق التاكسى ونزل فيه ضرب..

وهو يوقوله وانا مالى انا واقف مكانى بس المستشار نزل قاله حقك علينا وكده ومشاه

**belal rashed** · 19-03-2009 08:56 PM

-تك تك تك إصحى .
-إيه يا عم فيه إيه؟
-إنت عربيتك رقمها ......؟
-أيوه.
-إتخبطت بره فى الباركنج.
-طيب وأنا أعمل إيه ...سبنى أنام بقه.
-تنام إيه إنزل شوفها الناس لسه واقفين تحت.
هكذا دار الحوار بينى وبين أشرف حارس السكن عندنا فى الفندق الساعه 7:45 ص نزلت لقيت عربيه مرسيدس زلمكه بيضاء موديل 86 رقمها 22529 ملاكى القاهره (سايقها شاب 24 سنه )بدون داعى لذكر أسماء.
الشاب ده زى الباشا دخل الباركنج خبط كورولا 2008 من ورا راحت خبطه صنى 2009 راحت مريحه عليه (لانوس2006).
وكانت الأضرار كالتالى:
-كورولا=إكصدام خلفى+جوز رفارف+جوز فوانيس +شنطه .
-صنى=إكصدام خلفى+جوز رفارف+جوز فوانيس+شنطه+باب خلفى شمال+إعوجاج فى فردتين الشاسيه اللى ورا.
-لانوس=باب أمامى شمال+نغز بسيط فى الباب الخلفى شمال.
الحمد لله غن أنا كنت فى أخر القايمه.
على طول كلمت صديقى (حازم خضر)اللى وقف معايا جامد الصراحه اول لما نزلت المحله لحد لما عملنا العربيه ورجعت زى الأول الحمد لله.
-نسيت أقولكم إن الباشا بتاع المرسيدس إتشرخ عنده الإكصدام الأمامى وإتكسرله وش الفانوس.

**أشرف فتحى** · 19-03-2009 10:48 PM

اكبر خبطه اتعرضت لها كانت سنه 99 وكنت لسه معنديش عربيه ولا كنت انا اللى سايق
كنت لسه متعين جديد وسخن عشان اوريهم الهمه وجيت فى رمضان كنت فى مأموريه فى شارع القصر العينى ولازم ارجع المطار بالعهده اللى معايا
قمت وقفت تاكسى من اللى شكله حلو ولسه نازل ساعتها سويفت
وفوجئت بالسواق بيقوللى اربط الحزام
طبعا ايامها مكنش فى حزام ولا بتاع
المهم قولتله يا عم خليها على الله لانى اتكسفت اقله بيتربط ازاى؟
اربط الحزام عشان هانطير دلوقتى
وبدأ فعلا يطير لانى وعدته اديله 25 جنيه لو وصلنى فى ميعادى
المهم عند سور مجرى العيون فى تقاطع والدنيا كانت ممطره على خفيف
العسكرى قفل الاشاره علينا بيضرب فرامل العربيه فضلت تسرخ لغايه ما نزانا تحت عربه نقل جنود(عربيه امن مركزى) ونشن على الشاسيه اللى فى النص
طبعا عربيه الشرطه محصلهاش اى حاجه والسواق ربنا نجاه بالحزام والعبد لله هو اللى دخل فى الزجاج الامامى والعربيه اتدغدغت
وكانت النتيجه 4 غرز وشويه كدمات
بس الحمد لله