و الله انت اللي سكره :)
سلام عليكم
1- هي حاجة مفروض بديهية , بس انا كنت باسوق 127 و متعود على العربية الصغيرة , و انا اصلا باسوق بقى لي شهرين بس
النهارده حاولت اركن ين عربيتين المسافة بينهم قليلة , و كانت النتيجة اني اتحشرت بينهم و قعدت المس في دي و في دي عشان اطلع تاني و كان وضع سيء , الدرس المستفاد ... واضح :(
2- مرة كنت باطلع من عربية تانية , لقيت طلع من قدامها واحدة بتعدي الشارع , الحمد لله فرملت و وقفت .. الدرس , اظن لما اجي اطلع من حد اظبط نفسي اني ابقي شايف الطريق كويس .. و لو فيه طريقه اصح يا ريت يا جماعة حد يصحح لي
الحوادث والحمد لله حادثتين فقط خلال 17 سنة سواقة والحمد لله / اما عن الحكات فحدث ولا حرج اكثر من 59874556565 حكة وانا مش مسئول عنهم - نتكلم على الحادثتين
الاولى كنت ماشى على الشمال على سرعة 80 تقريبا فى شارع الهرم فى يوم اجازة والطريق فاضى وواحد سمكرى اتبرع وطلع بعربيتة من اقصى اليمين الى منتصف عربيتى بالظبط والحمد لله ان الموضوع كله جه فى الباب بس - طبعا نزلت له واتعاملت معاه بهدوء جدا واخدت تليفونة ورخصتة وبطاقتة لغاية لما يصلح العربية (ده طبعا بعد تدخل كام واحد من الناس ولاد الحلال اللى اقنعونى انى لو قتلته مش هاستفيد حاجة غير ان العربية هاتتوسخ ويبقى الهم همين) والغريبة انى فى النهاية اديته ثمن الاصلاح بالكامل لأنه صعب عليه وكان بيقول انه طلع بسرعة علشان ابنه مريض
الدروس المستفيده مفيييييييييش
الحادثة التانية قلبا وقالبا انا المسئول عنها
كنت رايح عزاء فى زوجة واحد صاحبى وفعلا كنت متأثر جدا بالموضوع وكالمعتاد وقفت فى شارع الهرم عند كايرو مول تقريبا 20 دقيقة لغاية لما الاشاره فتحت وكانت قدامى واحده بهيونداى جيتز اعتقد انها كانت لسه خارجة من الاجنس / اول لما الطريق فتح الجيتز جريت وانا وراها كابس المهم كان جنبى واحد صاحبى وبنتكلم فى موضوع الوفاه وفجأه لاقيت الهانم اللى قدام وقفت ال ايه فى ناس وكانت بتعديهم
الحمد لله انى اخدت بالى فى اخر لحظة وكسرت يمين على الاخر والنتيجة تقريبا مبقاش عندى رفرف شمال بالاضافة ان الجيز اتكسر فيها فانوس والاكصدام - الغريب ان الست قعدت وهيه فى العربية تزعق وتهلل واول لما نزلت من العربية سبتنى وجريت !!!!!!!!
الدروس المستفده مهما كانت حالتك النفسية لازم تركز فى السواقة - مهما الاشاره طولت لازم تصبر / يا اخى ان الله مع الصابرين
معلش يا باشا بس أنا رأيي اللي أنت اللي غلطان يعني جرب أركن كدا في شارع الجامعة مثلن مش هتلاقي واحد بس خبط فيك هتلاقي اوتوبيسات على ترمكو على عربيات ملاكي يعني خليك أعد عادي في كرسي السواء وشوف كل حاجة من المرايات وخلاص وبرضو تبقى باصص على شمالك عادي لما يكون شارع زحمة كدا لكن دة أنت مسافة ما هتلف ورا هتلاقي ١٠٠ عربية جت وهيقولك أنا كنت ماشي أنت رجعت وموقفتش ليه !؟
((صنائع المعروف تقي مصارع الســـوء ))
الصدقة ، و أذكار الصباح و المساء ، و الدعاء الذي يرد القدر ، كلها تقي من الحوادث بإذن الله بعد الأخذ بالأسباب
و من ضمن الأخذ الأسباب ما نفعله الآن ، فنحن نتبادل الخبرات بدلا من أن نخوضها كل واحد بنفسه ، ونتقاسم الخسائر ...
بمعني أن كل فرد منا حدث له حادث و كان هو المخطيء فبالتأكيد سيحاول أن يتجنب السبب و أن ينتبه لكي لا يقع فيه مرة ثانية و غالبا ان وقع له حادث آخر فسيكون بسبب مختلف لأنه تعلم شيئا مما حدث له
و ان لم يكن هو المخطىء فسيكون أكثر توقعا لحدوث الخطأ من غيره و سيعمل حساب لخطأ الغير و سيحافظ علي مسافة مثلا بينه وبين من أمامه وهكذا
ونحن لا نستطيع أن نمنع القضاء ولكن نستطيع أن نعرف ما هي أكثر الأشياء التي يمكن أن تكون سببا لوقوع حادث و نتجنبها ،
و نستطيع أيضا أن ننصح بعضنا بها بدلا من أن نجربها بأنفسنا و في كل تجربة تكون هناك خسائر و هذا ما نسمية بالخبرة و الممارسة و كثرة التعرض للمواقف و الخبرات
وعند حدوث حادث بعد الأخذ بالأسباب لا نملك الا أن نقول كما علمنا الرسول صلي الله عليه وسلم : فعن ام سلمه رضي الله عنها قالت : سمعت رسول الله صلى الله عليه وسلم يقول : « ما من عبد تصيبه مصيبة ، فيقول : إنا لله وإنا إليه راجعون : اللهم أجرني في مصيبتي ، واخلف لي خيرا منها، إلا أجره الله تعالى في مصيبته وأخلف له خيرا منها .
انا شايف ان اهم حاجه في السواقي خاصة في مصر هي توقع اخطاء الاخرين دائما و توقع الأسواء من العربيات اللي ماشيه حواليك
برده في نقطه مفيده انك دايما حاول تبص قدام العربيه اللي قدامك علشان تعرف ايه اللي في طريقه و تبقي عارف هو ممكن يتصرف إزاي...
انا كان عندى ماروتى زيرو وماشية بيها ورايحة اودى الاولاد مدرستهم كنت انا فى الشارع الرئيسى وهو شارع هادى لانه فى مدينة جديدة ولسة طالعة من مطب ووصلت لسرعة 40 مثلا وعند تقاطع لقيت سواق مينى باص شركات طالع من الشارع الجانبى ومع انه طريقى وانا الاقرب للتقاطع البديهى انى اسرع واعدى وافضيله الطريق لقيته كبس من جهة اليمين وطبعا اضطريت ادخل معاه او قبله التقاطع عشان افاديه
لحد كدة وانا اتصرفت صح اما بعد ذلك طبعا كبرت فى دماغى وقررت الف العربية لفة كاملة عشان اسبقه واقف امامه واشتمه لانه كان هايعمل كارثة ونظر لحداثتى فى السواقة ولامكانيات العربية المتواضعة ماقدرتش اسيطر على الطارة وفعلا العربية لفت منى لفة كاملة وخبط نفس المينى باص ده فى الجنبوطبعا وش العربية عندى باظ وهو ولا كان حد لمسه
طبعا اتعلمت كتير من الموقف ده
اولا انى اامن نفسى قبل مااحاول اغلس على حد
ثانيا ان كل واحد لازم يبقى عارف امكانيات العربية
ومتاسفة انى طولت عليكم بس بجد هى حادثة تستحق الدراسة
طبعاً، طالما واضح انك بتركن لازم الوراك يستنى.
بس واضح من كلام حضرتك ان تركيزك كله بيبقى في الجهة اليمين (ناحية الرصيف).
المفروض ان تركيزك الأهم والأول ناحية الشارع. تتأكد الأول ان مفيش حد وراك قبل ما ترجع لورا وتكسر يمين. لو جت عربية ومردتش تقف تستناك، خليك مكانك واستناه يعدي. لقيت ان العربية اللي وراك لسة بعيد، ارجع لورا واكسر يمين لغاية لما تحس ان العربية الجاية قربت، اوقف واستنى. شوف هو هيستنى ولا يعدي ... وهكذا
يعني في الأساس انت باصص ناحية الشارع، لما تلاقي الشارع فاضي ساعتها تبص ناحية الرصيف.