الموضوع: جوان وش السلندر

المشاركة الأصلية كتبت بواسطة tananybasha

جوان وش السلندر و متطلبات تغييره
1. جوان وش المانى - مش اى حاجة تانى -
2. جوان مانفو
3. جوان فرن
4. جوان مشترك الشكمان
5. جوان غطاء تكيهات
6. بوجيهات 2 شمعه جى ام بلاش حاجة تانى
7. جركن زيت معفن عشان تنضف بيه دورة الموتور بعد التقفيل و جركن الزيت النوعية اللى انت بتستخدمها بقى
8. انت فكيت بقى يبقى بالمرة
0 سير كاتينة المانى و البلية - اذا كان فيها حاجة ( خشنة او بتلق )
0 سير عمومى للعربية
0 فك طلمبة المياه بس عليها لو معرقه ماية من الخرم اللى فوق اوعى حد يقللك دى عايزة حشو او شوية سيلكون و هتبقى زى الفل - شيل و ارمى - لحسن اكثر سير الكاتينة بيتقطع من خشونة طلمبة الماية .
نبدأ الشغل بقى
1. الميكانيكى يفصل البطارية و كل فيش الموتور و يعلمها
2. يفك غطا وش التكسهات بس الأول
3. يفك مسامير المنافو فى الهاف انجكشن - او - وحد الأنجكشن بس براحة و النبى
4. يفك المصفحة ثم مشترك الشكامان
5. لازم يتفك الفلتر بتاع العربية و صح عشان فية كاوتشات بصواميل عشرة مساكة و هاتخنق الميكانيكى لو اتقطعت مش هاتلاقيها و بتاعات البيجو ال 405 كبيره عليها عشان نختصر الحوار ده
6. نفك بقى الكاتينة و السير العمومى و بلاستيك وش التقسيمة بس بردو بالرحة عشان المكان بتاعهم مقرف و عرة بيتكسرمنك و متنساش تفك قاعدة الأهتزاز اليمين و شداد الموتور لو بعد 1995
7. نفك مسامير وش السلندر و دول 10 مسامير بالتمام و الكمال اللى يعصلج معاك مفيش داعى للعافية اديله wd 40 و سيبوه 10 دقايق و هايجى معاك بدل ما المسمار يتكسر فى الفارغة و تحتاج خرط و موال تانى .
8. ربنا كرمنا طلعنا الوش من غير دق و لا تخبيط عشان ده انتومونيا تفضل تلخلخ فيه لغاية ما يطلع
9. نبص عليه من تحت لو مجارى المياه مصدية - لا قدر الله - هتخوش فى موال تانى لأن الوش هيكون مفقع و بدل ما هتقشطة بس هتضطر تملاة الأول و يتفرز و بعدين يتقشط و على البركة هيرجع جديد و تعمل حسابك فى طقم صباب فرنساوى من امريكان ستارز فى شاميبليون لو 1600 و لو 2000 اعتقد بردو عندهم بس يومها مسألتش
10 . الخراط يكبس وش السلندر عشان يشوفة لو مشرخ و لا حاجة و يبدأ يخلص سواء قشط او ملو و فريزة و قشط و صبابات ( حسب الحالة التى يشخصها طبيبك الخاص ) نبتدى نسقط الشغل دة فى المكنة بس بلاش السيلكون على جوان وش السلندر - الكله احسن و انضف
11 . دارات الماكنة بعد ما كلة اتكشف علية و تمام التمام و فل الفل
فيه هنا احتمالين لا ثالث لهم :
1. ان الماكنه تدور رايقة و انعم من الفابريكة والله يباركلك قفل و اتكل على الله و ماحدش يجيلك فى حاجة وحشة بس غير زيت بعد 500 كم عايز الرايش بتاع الخراطة ما يخربش الدنيا و راجع موضوع افضل زيت للأوبل لأنها أراء مهمة
2. لاتلاقى صوت زى بتاع التاكيهات - عارف هتقول الراجل ده حمار - الأوبل على كستبنات زيت - هاقولك انا قولت زى صوت ترزيع التاكيهات ما تتخضش و الميكانيكى يشتغلك
دى حاجه اسمها بلابل الشواكيش - اللى مريح عليها الشاكوش - بتبقى من الشغل فيها اللى اتهرى و عايز يتغير و ده بيظهر خاصة فى حالة تغيير الصبابات
تعمل ايه انت بقى يا عم تأخد الميكانيكى من ايده و تنزل على وكالة البلح تخش اول شارع هتلاقى محلين بتوع اوبل على اليمين سيب اول واحد خش على التانى قلله عايز بلابل شواكيش اوبل هيطلعلك كذا واحد بس على البلبله من ورا فية واخده اكبر من التانية فى الداير بتاع الكستبان خد ام فتحة اصغر لو 1600 و الأكبر لو 2000 جرب و هتلاقى العربية انعم من الغسيل بداونى
نجيب بقى للتكلفة و ده المهم جداً طبعاً
بص يا سيدى انا الورقة دى معايا فى البيت اجيبهالكم بكرة و نحط التكلفة بالنكلة و السحتوت


ارجو ان اكون اغطيت شرح جيد لهذه المشكلة و الله ولى التوفيق

بصراحة انت ماسيبتش حاجة ربنا يبارك لك