هو لو كل اللى معاه 130 ألف اصطرلينى اشترا البتاعة دى ، كتير من مشاكلنا هنا هتتحل حتى لو احنا ماجبناهاش:
ليه باه؟ لأن المواكب كلها هتبقى هوائية تفاديا للزحام وده هيخف نص مشاكل المرور فى البلد،
كمان كل الشركات فى القرية الزكية هجيب النموذج الاوتوبيسى من البتاعة دى وبالتالى مشكلة المحور هتتحل
كما لما بتوع الميكروباس بدل ما يشترو الميكروباص التويوتا ب 160 ألف جنيه ويجيبو مكانه البتاعة دى بمليون جنيه، وبدل ما ياخدو الأجرة 2 جنيه ياخدوها 15 ، فيه زباين كتير عندها استعداد تسيب عربياتها وتدفع 15 جنيه فى مقابل انها توصل بسرعة من التجمع الخامس الى المهندسين، يبقى فيه ميكروباصات كتير هتختفى ، وتخيلو بأه لما يبقى فيه تاكسى العاصمة من البتاعة دى، واسعاف من البتاعة دى علشنا يلمو الناس الميتين فى الحوادث والناس اللى ماشية فى الشارع متعطلش المرور علشان تتفرج عليهم
كل ده هيساهم فى حل مشكلة المرور تماما حتى لو مش فى مقدورىة او مقدروك اننا نشترى البتاعة دى
لكن تعالو باه نفكر شوية فى البلاوى اللى ممكن تتسبب فيها البتاعة دى
تخيل تبقى قاعد فى امان الله فى الدور الخامس تلاقى فجأة طرخ طريخ قزاز البلكون اتدشدش، وتلاقى سبويلر محترم راكب على كنبة الصالون، وتلاقى شاب لطيف طالع من تحت ترابيزة الأنتريه يقول لك(لامؤاخذة، اصلى كنت واخد المفاتيح من ورا بابا وانا لسة مش بعرف اسوق كويس) او تلاقى اللى طالع من تحت الترابيزة استاذ/ابراهيم او سيد او حسين ما، بيحاول يطلع ابنه اللى كان مقعده قدامه على الديريكسيون، او تكون ماشى فى الشارع فى امان الله تلاقى اللى نازل عليك من السما بنفس الطريقة التى يتبعها القضاء المستعجل، قال ايه بياخد غرزة من تحت عربية تانية مغلسه عليه
او تسمع صوت كهزيم الرعد فى اجواز الفضاء فتبص تلاقى واحد سائق ميكروايرباص لبس فى سواق ايرتوكتوك وتلاقى شظايا الاتنين نازل على عربيتك لتحول سقفها الى عجة
او مثلا وبعد 20 سنة لما العربيات دى تقدم، نسمع عن عن مشروع لاحلال الايرتاكسى القديم وذلك لتقليل لتقليل الخسائر فى الأرواح بسبب تعطل سيارات الايرتاكسى وسقوطها على الشوارع والمارة"زرع بصل" ، اما بالنسبة لسيارات الايركارجو ، اللى هتشيل رمل ولظ فان الزلط الذى سيقع من صناديقها لن يكتفى بخدش زجاج السيارة الماشية على الأرض وانما ستحوله سرعة سقوطه الى رصاصة تفتح نافوخ من تسقط عليه لتصيبه فى مقتل،
وعلى ذلك فان هذة السيارات كما انها ستحل مشاكل فانها ستسبب مشاكل اخرى،
عموما بكرة نطير فوق الحيطة ونشوف الزيطة
المفضلات