الموضوع: اخير بعد اكتر من شهرين استلمت الرخصة بدل اللى اتسحبت

انا كنت من حوالى شهرين و نص رحت لشرم و انا راجع الرخصة اتسحبت عند راس سدر علشان السرعة(الله اعلم السرعة كام انا كنت ماشى 110 - 120) :? المهم كنت سالت الاخوة فى المنتدى وقتها اعمل ايه خاصة لما رحت المرور اجدد الوصل قالولى انهم بقالهم 3 شهور مفيش رخص بتيجى من جنوب سينا البعض قالى امشى قانونى و استنى و البعض قالى روح اعمل بدل فاقد و رايح نفسك و انا علشان اول كنت محتار و اخترت انى اجرب امشى قانونى مش عارف ايه اللى هيجرلى :? .
اول حاجة قعدت كل اسبوع اروح مرور محرم بك اجرى حوالين نسى لمدة ساعة و استحمل قلة ادب العساكر بتوع النيابة علشان اجدد الوصل و بعد اربع مرات واحد اشار عليا اروح اكلم رئيس وحدة الرخص المسحوبة و اطلب تصريح و الحمد لله بعد محاولتين وافق و الحق كان ذوق معايا (مش زى بتوع النيابة كان فاكر نفسه ... :twisted: . و لا بلاش) و بعد ماخدت الموافقة رحت على مرور طوسون (للى مش من الاسكندرية من غرب اسكندرية لاقصى الشرق) و بعد دوخة الست اللى قاعد على التشت (قصدى الشباك) فهمت اخيرا ايه اللى مطلوب بعد ما سألت الضابط و كل الموظفين اللى حواليها كأنها اول مرة بتعمل حاجة زى دى و اتعملت رخصة كأنها بدل فاقد بس لمده شهر واحد قلت الحمد لله اليوم ماراحش على الفاضى :D .
بعد الشهر رحت عملت نفس اللفة و المرة دى مكانتش احسن الناس فى محرم بك مش عارفين و الضابط كان راجل فى منتهى الذوق وافق انه بدل ما اجدد التصريح انى اطلع بدل فاقد و رحت لمرور طوسون و هناك كنت هاعمل جريمة لان الموظفات كل واحد ترفض الطلب و تقولى الورق ناقص و ارجع محرمبك تانى ، كلمت الضابط هناك قالى ورقك مضبوط قلهم انا موافق عليه و بعد ما الطلب عدى على 3 موظفات و كل واحد تدخل تكلم الضابط و انا ابتديت اتنرفز و قلت لهم ايه المشكلة قالتى واحده فيهم انتى عايز تخلص نفسك و احنا تبقى عندنا مشكلة لما الرخصة توصل ، قلت ماهى لو كانت مضاعتيش تبقى ليه موصلتيش بعد اكتر من شهرين هى جاية مشى و انا لو عايز اخلص نفسى ما كنت طلعت بدل فاقد من اول يوم
و اخير و بعد 4 ساعات خرجت و معايا الرخصة بدل فاقد :D :lol:

و الخلاصة النظام اثبت ان اللى يمشى عدل يتبهدل و اللى احسن من كده برضه مدفعتش مخالفة يعنى لو كانوا عملوها فورية كانو اخدوا الفلوس بدل البهدلة :x

المشاركة الأصلية كتبت بواسطة Ahmed Anwer

أنا فضلت بعربيتي القديمة سبع سنين ماشي بترخيص مؤقت كل ثلاث شهور ، عشان الورق يجي من مرور لمرور اخر داخل القاهرة و تقريبا الورق كان راكب حمار بس حتي لو راكب حمار كان هيوصل قبل سبع سنين و في الآخر صعبت عليهم و ادوني رخصة لحد ما الورق يوصل براحته

نفس اللي حصل معايا
والمشكلة متحلتش غير لما طلبت من المرور طلب إستعجال للمرور التاني أروح أسلمه بإيدي
ورحت لقيت الملف مكانه كإن محدش طلبه وأعطيت طلب الإستعجال للظابط ولقاهم نسيوا يختموهولي في مرور السلام (لابد يكون مختوم) لكن الظابط في مرور العجوزة كان محترم وقبله مني
وبعدها مفيش كام أسبوع رحنا لقينا الملف جه والحمد لله