الماتريكس غليت؟؟

**abdofawzy** · 21-08-2007 01:54 PM

السلام عليكم ورحمة الله
انا حاجز ماتريكس من حوالي 20 يوم و بسبب ظروف عملي ان بسافر بره مصر لفترات طويله ما استعجلتش و حجزتها من غبور الله يحرقه و قلت تيحي على راحتها
المهم عشان ان شاء الله قربت آجي مصر المحروسه اتصلت بالأخ الي حجزت عنده
قالي هتوصل الأسبوع الجاي سألته انا ممكن أأخذها بدون كاسيت و انذار؟
قالي ايوه طبعا و تاخدها بالسعر القديم قلته مش فاهم
قالي اصلها غليت 1000 جنيه المنوال و الأوتامتيك يعني لو هاخدها بدون كاسيت و انذار ب 80000 ولو الباكسيت و الأنذار ب 81000
الله يحرقه مستر غبور على رأي اخويا بايو جايبها من تركيا يعني وفر في الشحن
و كمان مركب كاسيت زباله و جهاز انذار راكب بطريقه وحشه جدا
و بعد كل ده بيغليها
الله يحرقه

**abdofawzy** · 21-08-2007 02:00 PM

نسيت ازود خدمة ما بعد البيع الي بيضرب بيها المثل

**hazem_khidr** · 21-08-2007 02:01 PM

حسبي الله و نعم الوكيل بس انا شاكك في كلام الموزع دا الصراحه ممكن يكون مستغل حضرتك علي اساس انك بره و مش عارف الاسعار؟
عموما مش فارقه كتير و ما تنرفزش نفسك علشان تعرف تستمتع بعربيتك انا معاك انها حاجه تجيب الضغط الصراحه لكن العيب مش عليه العيب علي اللي خلاه يعمل في الناس كده

**abdofawzy** · 21-08-2007 02:08 PM

يا استاذ حازم
ده معرض غبور فرع البطل احمد عبدالعزيز مش موزع

ده سعر الوكيل في المعارض اكيد هتوصل
83000

**hazem_khidr** · 21-08-2007 02:13 PM

يبقي تدفع يا باشا و امرك لله :| :|
حسبي الله و نعم الوكيل في مسيو غبور

**محمد حسين** · 22-08-2007 07:25 AM

سبحان الله يا جما عه انا نفسي افهم لما هو التوكيل سمعه وسمعة اونكل غبور زباله من اول مراكز الخدمه لغاية الاسعار الجميله اللي بيطلع بيها كل شويه يبقي خد التوكيل ازاي الا اذا كان اسم هيونداي اللي كان وحش وبعدين لما احلو في عين الناس غبور ركب ودلدل رجليه ولا هو فيه ايه ؟ ولا مفيش فايده في غبور؟

**Hazem Salah** · 22-08-2007 08:47 AM

بس بينى و بينك الماتريكس حلوة

**wael333** · 22-08-2007 11:16 AM

ايوة يا جماعة بس لما يكون توكيل معملتة زى مانتوا عارفين :x وبجيب العربيات باقل الأوبشن وبيلعب بالاسعار :twisted: (مع ان الدولار لم يتغير سعرة والجمارك زى ما هى والسيارة كمان موجودة) لماذا يغلى اسعارة :shock: ومع كل ذلك هناك اقبال من الناس :roll: . طيب ما فى عربيات كتير كويسة فى مثل هذة الاسعار بل من الممكن تكون احسن مثل ( optra, aveo, yaris M half op) لو كل الناس قطعت مركزة ولو لبعض ايام ولم يتهافتوا بهذا الشكل على سيارتة لكلنت هيونداى ضغطت علية وصلح من معاملتة الجميلة

**Tamer-Ezzat** · 23-08-2007 01:41 AM

متزعلش نفسك علشان تعرف تستمتع بالعربية أولا ..
غبور كنت حاجز عندة فيرنا بسعر 670000 وعند التسليم بقدرة قادر غليت 69000 وطبعاً أحلى زن تعال خلص لحسن حتزيد تانى ...
بعد الشراء بشهر ونصف نزل أعلان كبير جدا ... خبر لاسعاد الملايين فيرنا كاملة 65000 جم
نزل خبر اسعد الملايين واتعسنى فى كلمة ... بس مش مشكلة المهم انه اسعد الملايين .. بصراحة ساعتها حسيت ان جردل مية ساقعة أدلق علينا بس حسبتها بطريقة أخرى قلت كأن الواحد أجر عربية الشهر ونصف دة .. وكانت أيام رمضان وعيد ...
المهم ...
ربنا يديلك خيرها ويكفيك شرها

TEA

**Ahmed Anwer** · 26-08-2007 08:31 PM

كل القرف ده بيعمله غبور بمزاجه هو عمره مابيثبت سعر لازم السعر يطلع و ينزل ، يطلع الناس تجري تشتري قبل ما يزيد اكتر، بنزل برده الناس تجري تشتري عشان تلحق الفرصة ، غير بقه انه يملي السوق بموديل معين و يمنع موديل اخر بمزاجه عشان يعمل برستيج لبضاعته

ايوة يا جماعة بس لما يكون توكيل معملتة زى مانتوا عارفين وبجيب العربيات باقل الأوبشن وبيلعب بالاسعار (مع ان الدولار لم يتغير سعرة والجمارك زى ما هى والسيارة كمان موجودة) لماذا يغلى اسعارة ومع كل ذلك هناك اقبال من الناس . طيب ما فى عربيات كتير كويسة فى مثل هذة الاسعار بل من الممكن تكون احسن مثل ( optra, aveo, yaris M half op) لو كل الناس قطعت مركزة ولو لبعض ايام ولم يتهافتوا بهذا الشكل على سيارتة لكلنت هيونداى ضغطت علية وصلح من معاملتة الجميلة

معلهش بس تقريبا موديلات هيونداي في الفئة دي تقريبا مالهاش منافس قوي ده غير التنوع ما بين ميني فان و سيدان كبيرة و سيدان صغيرة و هاتشباك و تجميع محلي ، يعني كل اللي نفسك فيه و قطع الغيار مضمون توافرها واسم هيونداي اللي بقه ليه احترامه في مصر علي الأقل في الفئات الشعبية اللي مش فاخرة
صعب جدا هيونداي تغضب علي وكيل قوي زي غبور عاملها حجم المبيعات دي في مصر ، شوف غبور عمل ايه لهيونداي و وليد توفيق عمل ايه ل كيا