شركة مصرية زودت الجيش الإسرائيلي بالغذاء أثناء عدوانه على غزة

**a_tantawy7** · 31-01-2009 10:02 PM

يا جماعة الشركة دي أنا عارفها كويس عشان كنت مفروض هعملهم اعلان التليفزيون بتاعهم بحكم عملي كمخرج تليفزيوني ,هما بتوع خضروات مجمدة ومقرهم في ميدان لبنان (رقم 4 أو 6 ميدان لبنان..مش فاكر بالظبط.), والشهادة لله أنا قعدت مع رئيس مجلس الادارة و نائبه أكتر من مرة و كان ناس-على ما يبدو متدينين- يعني من طريقة كلامهم والصلاة في وقتها وكده.مش عارف ليه مش قادر أصدق الخبر, عموما الله أعلم.

**EZABY** · 01-02-2009 12:28 AM

انا ياجماعه ليا رأي مختلف عارف انه مش هيعجب ناس كتير منكم بس دي وجهة نظري مش اكتر

انا شايف ان ده من اجمل الاخبار وياريت يكون صحيح
لأن باختصار امريكا وكل الدول الكبيره القويه اللي ليها كلمه مسموعه اصبحوا اقوياء لأننا بنشتري منتجاتهم
يعني تخيلوا لو كل الدول العربيه والاسلاميه اللي بيكرهوا امريكا كانوا مبيشتروش منتجات امريكيه
هل كانت امريكا كانت هتبقى بنفس القوه دي ؟
الأقتصاد القوي هو العمود الفقري للسياسه القويه
طب ولو المبيعات الامريكيه دي مش هتاثر لصالح امريكا امال احنا بنادي بالمقاطعه ليه؟
خلاصة الكلام ان انتاجنا وتصديرنا هو اللي هيجعل منا دوله قويه مش الشعارات والعواطف
وخصوصا بقى لما نصدر لدوله تتصنف كعدو لينا فده يعتبر انتصار اقتصادي هنحس بقيمته في حالة الحرب لاقدر الله
تخيلوا لو مصر حاربت اسرائيل وقطعت عنها الغاز والمؤن الغذائيه
تفتكروا ده في مصلحة مين؟
يارب نصدر لهم كل احتياجتهم الغذائيه والغاز والبترول كمان حتى ولو بالخساره لأنك لما تملك حياة الشعب ده مش هيقدر يواجهك

أحب افكركوا بحرب 73 وسلاح النفط العربي وقوة تاثيره الايجابي لمصلحة مصر في الحرب
لو كنا اياميها فكرنا بنفس المنطق ده وقلنا ازاي نديهم مصدر الطاقه وكلام زي ده
كنا فقدنا السلاح القوي اللي افادنا في حربنا عليهم

أسف على طول الرد

**Ahmed Samy** · 01-02-2009 02:47 AM

المشاركة الأصلية كتبت بواسطة EZABY

وخصوصا بقى لما نصدر لدوله تتصنف كعدو لينا فده يعتبر انتصار اقتصادي هنحس بقيمته في حالة الحرب لاقدر الله
تخيلوا لو مصر حاربت اسرائيل وقطعت عنها الغاز والمؤن الغذائيه
تفتكروا ده في مصلحة مين؟
يارب نصدر لهم كل احتياجتهم الغذائيه والغاز والبترول كمان حتى ولو بالخساره لأنك لما تملك حياة الشعب ده مش هيقدر يواجهك

هو حضرتك فاهم انهم معتمدين علينا اقتصاديا أو غذائيا ؟؟
هم للأسف أذكى من كده بكتير
دول بيشترو مؤونة الحرب من مصدر أرخص و أقرب للساحات المعارك يعني مش علشان مزنوقين لأ
علشان ده بديل أرخص و أسهل من الدعم اللوجستي للقوات داخل اسرائيل نفسها

أحب افكركوا بحرب 73 وسلاح النفط العربي وقوة تاثيره الايجابي لمصلحة مصر في الحرب
لو كنا اياميها فكرنا بنفس المنطق ده وقلنا ازاي نديهم مصدر الطاقه وكلام زي ده
كنا فقدنا السلاح القوي اللي افادنا في حربنا عليهم

كويس ان حضرتك فاكر اننا لما حاربنا (العرب و المسلمين) منعوا البترول علشانا
ما صدروش بترول زيينا و قال و الله دي حاجة كويسة

يعني كان المفروض نخلي عندنا دم و نوقف تصدير الهوا حتى

______________________
خارج النقاش الشخصي :

دولة عربية مسلمة و جارة و تمثل امتداد استراتيجي و خط من خطوط الدفاع عن البوابة الشرقية (لأن سينا مافيهاش ناس و لا قوات) و تقوم اسرائيل (العدو رقم 1) بعمليات عسكرية فيها تصل لقصف الشريط الحدودي و اختراق الأجواء و إصابة عسكريين مصريين

و مازلت أسمع الكثير من الترهات عن التطبيع و تنشيط التبادل

أه يا بطني

**mtageldeen** · 04-02-2009 03:09 PM

المشاركة الأصلية كتبت بواسطة Ahmed Samy

هو حضرتك فاهم انهم معتمدين علينا اقتصاديا أو غذائيا ؟؟
هم للأسف أذكى من كده بكتير
دول بيشترو مؤونة الحرب من مصدر أرخص و أقرب للساحات المعارك يعني مش علشان مزنوقين لأ
علشان ده بديل أرخص و أسهل من الدعم اللوجستي للقوات داخل اسرائيل نفسها

ونفس الشيء تفعله أمريكا بشراء البترول من الدول العربيه بدلا مما تملك للإحتفاظ بما لديها ولكي لا يتكرر موقف 73 ثانيةً