عرض للطباعة
الأسبوع ده شفت عربيتين (واحدة جيتا و الثانية باسات) و علامة الفولكس اللى على الشنطة ورا متشالة و مكانها شكله وحش قوى.
الحقيقة حاجة تحسر، لماذا يفعل الناس هكذا، و ياترى أصحابها هيعملوا أيه؟ هل تباع هذه العلامة فى التوكيل أم اين و بكام؟
حد عنده فكرة أو مر بهذه التجربة (السيئة)؟؟
حسبي الله ونعم الوكيل اتسرقت العلامة الي في الشنطة امبارح من البولو , اجيبها من فين وبكام!!
ياباشا فى الفولكس وغير الفولكس !
الحقيقه هىه بتتسرق من على كل الأنواع ,وده علشان يلزقوها على التوكتوك(حسبنا الله ونعم الوكيل).
عندنا فى قسم الهوندا
اكتر الاعضاء مسروق علامتهم
احنا ممكن بقى نعمل حاجة حلوة اووى
لو لما نشوف توك توك وعليه علامة نضيفة
نقفشوا وناخد منه العلامة :d
ويطحن ضرب
هههههههههههههههههههه
هذا ما فعلته علامه البسات لقيتها على شنطه تاكسي شاهين نزلت اخدها منه و مشيت
انا العلامة اللي قدام في الجيتا اتسرقت قدام البيت ، التقليد ب 70 جنيه في شارع دمشق بمصر الجديدة و الأصلية عند الشهاوي بنفس الشارع ب 240 جنيه،
طبعا الفارق لصالح الأصلية باين خالص فاشتريتها و أمري لله :stink[1]:
المشكلة في الباسات لأن علامة الشنطة الخلفية مرتبطة بفتح الشنطة نفسها و بها سوكيت باور لزوم lock و سعرها 1200 جنيه يا باشا
حرام بجد انا كنت هعيط لما شفت المنظر وجاتلي حالة كأأبة من منظر الشنطة من غير العلامة ! عالعموم انا عملت حركة للعلامة الي قدام فكيتها وخرمتها من مكان داخلي وريطتها بسلك حديد
مش عارف العلامة الي ورا اجيباها صندوق حديد ولا اية !!
الي محسرني ان مفيش عربية فولكس مكروباص في شارع الهرم الا ملزوق وراها عالاقل علامة او اتنين !!!!
الناس دي هتفضل قلوبها سودة لامتة !!!
يا جماعة المنصورة بتعاني من الموضوع ده بشدة
انا الحمد لله كنت مركب علامة السكودا بتاعة الاوكتافيا و اتسرقت مرتين
و حلفت ما اجبش علامة تالتة
تعليمات:
1. متروحش اسكندرية
2. لو شفت عربية ملاكي القاهرة ومفيش علامة عليها يبقى صاحبها أكيد كان في اسكندرية
3. لو في جراج، إركن فيه
4. علامة الشنطة اتسرقت عندي من أمام فندق القوات المسلحة في العصافرة
5. في اليوم التالي لاحظت وجود كم هائل من العلامات على المكروباسات
في النهاية، ربنا ينتقم من الي بيعمل كده ويشل إيده أو يهديه وإن كنت بدعي فعلاً إن ربنا يهديه
مرة كنت بصلي التراويح وخرجت فلم أجد حذائي مع إنه كان ماركة وغالي بس دعيت للي خده ربنا يمتعه بيه. بس لم نزلت من الفندق لاقيت العلامة مسروقة دعيت على إلي خدها
الأصلي يوكل المضروب ......................
شكرا على المعلومات من الأخ mohamed hamdi
أنا أمس شفت علامات فولكس مسروقة على عربيتين تاكسى شاهين كان نفسى أنزل أتخانق مع سواقينهم
انا شوفت موتوسيكل حاطط ورا اتنين
والله العظيم اتنين
سألته وانا راكن ليه كده ؟
قاللي شاريهم
قولتلو دول بتوع عربيات مش اكسسوار شاريهم منين
قاللي من بتوع الكماليات (كداب في أصل وشه)
طب تشتري حاجة مسروقة من ناس ؟؟؟
قاللي : "كفاية عليهم العربيات, مستخسرين فينا العلامة على مكنة صيني!"
فهمتوا ليه البلد دي السرقة و افساد مقتنيات الغير كترت ليه
ما لو البلد محترمة
الكماين يمسكوا الناس ديه حيبطلوا يحطوها تاني
يا اخوانى العلامات المسروقه اغلبها راكب فى التوك توك لأن السواقين معجبين جدا بعلامه الفولكس و بيركبوهم مقلوبين كمان على اساس انهم - ام ان - مش فى دبليو و عموما ربنا يكون فى عون اصحاب الجيتا و الباسات لأنهم اغلى علامتين و يوفق الباقين .:I_angr1[1]:
ياجماعة الحل بسيط , انا ساكن في فيصل والعلامة مسروقة من يومين عالعموم انا متأكد انة واحد من اصحاب التوكتوك .انا مستني اخد اجازة بعد بكرة وانزل الشارع من الصبح والي اشوفة مركب علامة ومش هاسيبة الا لما اكون عاملة محضر وهخلية يلعن اليوم الي فكر يركب فية علامة مسروقة , اكيد هاقفش يجي خمسة ستة , وان شاء الله هاخد حقي .
ياريت ياجماعة كلنا نتصرف كدة . انا مش هتبلي بس هوة حرامي وانا اتسرقت ...
حسبي الله ونعم الوكيل ,,
انا والله شفت موتوسيكل في المنصوره عليه 11 علامة جيتا و دول اللي لحقت اعدهم,كنت هتجنن
يا جماعة اللي عاوز علامات مسروقة
و من المنصورة
يقف ربع ساعة في شارع البحر او المشاية حيلقطلوا خمسة ستة علامات
من عربيات التاكسي الشاهين
وللاسف كلها كانت لجيتا
و الله العظيم اللى بيحصل ده حرام. نفسى اعرف اللى بيعمل كده مستفاد أيه؟ و اللى بيخربش عربية جديدة بمفك و لا مفتاح من أولها لأخرها مستفيد أيه؟ و لماذا هذا فقط فى بلدنا؟ اخلاق الناس حصلها أيه!!!
حد يا عالم عنده تفسير؟؟!!!
الأخوة الأعزاء
شفت أمبارح منظر زعلنى , عربية أسبرانزا جديدة راكنة جة واد بفزبة عامل زى الشحط وما بيعرفش يسوق وراح داخل فى الباب الأولانى وبوظ حتة فى الباب الثانى والباب ما بقش ينفع وجةأبوة ولا صاحب الفزبة وخدوها ومشيوا ولا كأن حاجة حصلت وصاحب العربية يروح فى داهية , ولوكان صاحب العربية جة ساعتها ما كنتش سبتة . ما بقاش فية أحساس