سؤال بخصوص رخصة سيارة

**hossam_elwani** · 01-02-2009 01:34 AM

انا عندى عربية كان ترخيصها منتهى المهم رخصتها وجيت استلم الرخصة قلولى الكمبيوتر عطلان المهم حصلتلى شوية ظروف مرحتش الابعد اسبوعين رحت المرور عشان استلم الرخصة قلولى برضه الكمبيوتر عطلان انشغلت برضة شوية ورحت تانى بعد اسبوعين قلولى برضه الكمبيوتر عطلان دلوقتى عدى على انتهائى من اجراءات ترخيصها شهر ولم استلم الرخصة هل ممكن يكون فى اى اجراء تانى بعد غيابى الفترة دى او ممكن تحصل اى مشكلة (مستلمتش اى تصريح مؤقت والرخصة المنتهية فى الملف بتاع العربية .. عشان رخصة القيادة مسحوبة منى ايقاف 3 شهور)

**ahit** · 01-02-2009 03:00 AM

أكيد فيه تصريح لمدة معينة و يتجدد لغاية لما تستلم الرخصة

**yehia** · 01-02-2009 06:29 AM

حصل معايا الموضوع ده فى تراخيص مدينة نصر... من حوالى سنة....
أخذت رخصة ورقية زى بتاعة زمان قبل الكمبيوتر- مش تصريح مؤقت- ومشيت بيها عادى، وكان ممكن حتى مرجعش آخذ رخصة الكمبيوتربعد أسبوعين لأن أنا معايا رخصة رسمية وسارية ، لكن عشان حجمها كان كبير شوية وصعب الواحد يشيلها فى المحفظة رجعتلهم وأخذوا الرخصة الورقية وعملولى رخصة الكمبيوتر.....
إنت بس ادخل لرئيس الوحدة وفهمه الموضوع...وهو حيخليهم يطلعولك إما الرخصة الورقية أو الكمبيوتر

**M.Gamaledeen** · 01-02-2009 08:56 AM

طالما انك دفعت الضريبة والتأمين الإجباري وموجودين بملف العربية
ف ممكن تروح في أي وقت ولو الكمبيوتر عطلان لازم يدولك رخصة كارتون (تصريح مؤقت شهر أو 3 شهور) لكن مش مفروض انك تمشي من غير رخصة خالص

**merosss** · 01-02-2009 09:33 AM

المشاركة الأصلية كتبت بواسطة yehia

حصل معايا الموضوع ده فى تراخيص مدينة نصر... من حوالى سنة....
أخذت رخصة ورقية زى بتاعة زمان قبل الكمبيوتر- مش تصريح مؤقت- ومشيت بيها عادى، وكان ممكن حتى مرجعش آخذ رخصة الكمبيوتربعد أسبوعين لأن أنا معايا رخصة رسمية وسارية ، لكن عشان حجمها كان كبير شوية وصعب الواحد يشيلها فى المحفظة رجعتلهم وأخذوا الرخصة الورقية وعملولى رخصة الكمبيوتر.....
إنت بس ادخل لرئيس الوحدة وفهمه الموضوع...وهو حيخليهم يطلعولك إما الرخصة الورقية أو الكمبيوتر

انا حصل معايا الكلام دة بالضبط فى مرور حلوان وانا لسة ماشى بالرخصة الورقية عادى جدا وفى اى لجنة عادى بردة

**karimone** · 01-02-2009 10:11 AM

انا كمان حصل معايا الموضوع ده و مشيت بتصريح مؤقت لمدة شهر بعد كده جددولي شهر تاني علشان الكمبيوتر كان لسه بايظ... و بعد كده روحت استلمت الرخصه

بس ده كان في رخصة القيادة مش رخصة العربيه...مش عارف بيعملوا كده برده في رخص العربيات ولا إيه