المشاركة الأصلية كتبت بواسطة sab3aawy
اللعبة هى لعبة مين اللى نفسه اطول، لو اشعب استرجل مرة وطول باله العربيات هتنزل هتنزل،
لكن انا فاكر تجربة حصلت السنة اللى فاتت كان احد طرفيها هو الشعب، والشعب كان نفسه قصير ومطولش باله، بالتالى خد على دماغه فى صورة غلاء سعر المواد البتروليه
مشكلتنا اننا بنتحمس جدا لاى مشروع فى البداية لكن بعد شوية ننزل على مافيش او نتلخم فى حاجة تانية، وليس ادل على ذلك من قضية الاطباء المصريين التى انداست تحت جنازير دبابات غرة، اللى هتنداس بدورها كمان شهرين تحت عجلات العربيات اللى مش بترخص او تحت وابل الشتائم الموجهة لأى دولة اجنبية اهان احد وماطنيها مقدساتنا ، او تحت امطار الشجب والتنديد لصعوبة امتحانات الثانوية العامة...الخ
بس مع ذلك انا لسة عندى امل ولو بسيط ان الشعب يسترجل مرة ويتمسك بحاجة
يعنى انا هحكيلك مثال ظريف جدا، انا وبعض اصدقائى حاليا مقاطعين البضائع الأمريكية والاسرائيلية والدنماركية والسعودية ومقاطعين شراء السيارات الجديدة، وكل واحدة من دول لسبب، امريكا حتى يتضح موقفها الجديد فى قضايا الشرق الأوسط، اسرائيل لما ارتكبته فى حق المواطن الغزاوى(وليس حماس)، السعودية بسبب قضية الأطباء، الدنمارك لموقفها المتعنت من اهانة مقدساتنا،شراء سيارات جديدة مشاركة مع الحملة، تعتقد كام واحد من شعبنا يقدر يلتزم بموقف زى ده وميتخلاش عن قضية فيهم لصالح قضية اخرى تحتل قمة هرم الاهتمام فى وقتها،
لذلك فالقصة ببساطة هى لو ان الشعب استرجل مرة وتمسك بقضية المقاطعة التجار هتنخ هتنخ، لو الشعب نفسه انقطع مش بس هناخد على دماغنا، هناخد على كل جزء فى جسمنا يمكن لعصا التجار ان تطوله، العربيات هتغلى، قطع الغيار هتغلى، خدمات السيارات هتغلى، الدنيا هتولع، وهو ده الشئ اللى التجار بيلعبو عليه، ان الشعب نفسه قصير وانهم يقدروا يغطوا مصاريفهم لفترة ، بعدها هيطلعوه على جتتنا اخماسا واسداسا، فالأمل الوحيد حاليا ان الشعب يسترجل