الموضوع: استفسارات عن مواتير المياه

من واقع خبرتى مع مواتير المياه فان كل شقة يلزم لها نصف حصان من قدرة موتور المياه مع مراعاه عامل التشتت، يعنى لو شقة واحدة هات موتور نص حصان، لو شقتين هات موتور حصان، لو تلات شقق هات 1.5 حصان، لكن لو اربع او خمس شقق ممكن برضه تجيب 1.5 حصان لان مش كل الشقق هتفتح المية فى وقت واحد، الحسبة تكون فى حدود عدد الشقق مضروبا فى 60% عامل تشتت مضوربا فى نصف حصان،
الحاجة التانية اوعى اوعى اوعى تركب موتور من غير اوتوماتيك وبالونة، يبقى كدة انت مستغنى عنه لأن عاجلا او آجلا ستأتى تلك اللحظة التى يشغله فيها احدهم وينساه شغال وهى ديتها ساعتين تلاتة وتلاقى الحاكم الميكانيكى بتاعه mechanical seal باظ والمتور جاب مية ، ما نسميه شعبيا باسم اوتوماتيك هو ببساطة وحدة بسيطة اسمها (pressure switch) او مفتاح ضغط، يشبه فى وظيفته حساس الزيت اللى فى موتور اى عربية اللى بيخلى لمبة الزيت تطفى لما ضغط الزيت يوصل للقدر المناسب، وظيفة مفتاح الضغط ده ان الموتور يشتغل لوحده لما الضغط فى الخط ينزل الى حد معين ويفصل لوحده لما الضغط يعلا الى حد معين ، وفيه جواه صامولتين واحدة بيتظبط منها ضغط الفصل والتانية بيتظبط منها ضغط التشغيل، اما البالونة فوظيفتها انها تحافظ على الضغط المرتفع لفترة علشان الموتور لما يفصل ما يشتغلش تانى غير بعد فترة زمنية كافية لانه يبرد ويريح، وكذلك لما يقوم ميفصلش بسرعة، يعنى اللى بيحصل لو البالونة اتخرمت والمتور شغال على الاتوماتيك انك بتلاقىالمتور بيشتغل ويفصل بمعدل 100 مرة فى الدقيقة الواحدة(الرقم واقعى وليس فيه اى مبالغة) لحد ما الموتور يتحرق ،والبالونة مكونة من وعاء معدنى بداخله بالونة مطاط، البالونة المطاط هى اللى بتتملى مية من الموتور، اما المسافة الفاصلة بينها وبنين الوعاءس المعدنى فيتم نفخها بالهواء على ضغط 2 بار(28 رطل على البوصة المربعة-مثل كاتش السيارات تماما) وذلك من خلال بلف نفخ موجود فى اعلى الوعاء المعدنى يشبه تماما بلف نفخ كاوتش السيارات ويتم نفخها اما عند بتاع الكاوتش او بمنفاخ يدوى او كهربى،وطبعا لتركيب اوتوماتيك وبالونة على الموتور لازم يركب معاهم عداد ضغط pressure gauge علشان تضبط عليه الأوتوماتيك، والبالونة والعداد والأتوماتيك جميعهم بيركبوا على وصلة واحدة تباع خصيصا لهذا الغرض، من المعلومات الخاطئة الشائعة ان البالونة والعداد والأوتوماتيك لابد من تركيبهم على الموتور مباشرة، هذة معلومة غير حقيقية لان البالونة والأوتوماتيك والعداد يمكن تركيبهم على اى مكان فى الخط بعد مخرج الموتور، انا شخصيا مركب الموتور فى الدور الأرضى فى منور العمارة ولكن مجموعة الأتوماتيك والبالونة والعداد مركبها عندى فى مدخل المياه فى حمام البيت فى الدور الخامس، وذلك لسهولة الصيانة ولسهولة تعديل وضع الأوتوماتيك ليناسب سحب المياه فى الأيام المختلفة(يعنى مثلا ظبطة طول الأسبوع ممكن تخلى الموتور يفضل ينحر ومايفصلش يوم الجمعة قبل الصلاه لأن كل شعب مصر بيكون فاتح الحنفيات فى تلك اللحظة وبالتالى سحب المياه ضعيف جدا ولذلك ممكن اقلل ضغط الفصل شوية يوم الجمعة وارجع اعدله بعد كدة فى دقيقة واحدة لأن الاوتوماتيك امام عينى) كما ان وجود الأتوماتيك فى البيت بيتيح ليا تشغيل الموتور مانيوال او اوتوماتيك(يعنى بشكل متصل او مع تغير ضغط المياه)، كل الفكرة انك لما تظبط ضغط الفصل والتشغيل فى الأوتوماتيك لازم تقللهم بمقدار 1 بار لكل ثلاثة ادوار ارتفاع بين النقطة اللى فيها الموتور والنقطة اللى فيها الأوتوماتيك، يعنى مثلا انا ظابط ضغط التشغيل عندى على 1 بار وضغط الفصل على 2.5 بار فى النقطة اللى الأوتوماتيك راكب فيها فى الدور الخامس، ده معناه ان الموتور بيشتغل فعليا عند 2.5 بار و يفصل عند 4 بار فى نقطة تركيبه فى الدور الأرضى لأن المية بيقل ضغطها 1 بار كل ما تطلع 10 أمتار ارتفاع (البار هو وحدة قياس الضغط وتساوى واحد ضغط جوى او وزن عمود من الزئبق ارتفاعه 76 سم او وزن عمود من الماء ارتفاعه 10متر و 30 سم)

لتركيب موتور لازم تركب صمام عدم رجوع قبل مدخل المتور وصمام عدم رجوع بعد مخرج المتور (اللى بيسموه شكبلف او سكس بلف) علشان يفضل الضغط بعد المتور ثابت لضبط تشغيل الأوتوماتيك ومحبس بلية قبل الموتور وآخر بعد المتور ، وكذلك خط بديل by passيتيح فك الموتور للصيانة فى اى وقت دون الحاجة لقطع المياه عن المكان ويكون الخط البديل به محبس عدم رجوع ومحبس بلية، يبقى لنا انه فى حالة شرائك لموتور غالى فلابد من شراء وحدة حماية ضد انقطاع المياه تمنع تشغيل الموتور بدون ماء حيث ان تشغيل الموتور والمياه مقطوعة كفيل بتدمير الحاكم الميكانيكى فى دقائق

جميع هذة المكونات وقطع غيارها موجودة فى شارع نجيب الريحانى المتفرع من شارع الجمهورية بجوار محطة مترو العتبة واسعارها بسيطة جدا، يعنى مثلا البالونة تمنها فى حدود 60 جنيه، غيار بالونة مطاطى 15 جنيه، اوتوماتيك متور ايطالى 25 جنيه، عداد ضغط 15 جنيه، وصلة اوتوماتيك موتور ايطالى 20 جنيه، بلف عدم رجوع 20 جنيه، محبس بلية 10 جنيه، حاكم ميكانيكى(ميكانيكال سيل) لموتور 1 حصان 15 جنيه ، موتور 1/2 حصان صينى 90 جنيه، موتور 1/2 حصان ايطالى 400 جنيه، موتور 1 حصان صينى من أول 180 جنيه ، موتور 1 حصان اتحاد اوروبى 300 جنيه، موتور 1 حصان ايطالى من أول 800 جنيه، وهكذا

الحاجة التانية اوعى اوعى اوعى تركب موتور من غير اوتوماتيك وبالونة، يبقى كدة انت مستغنى عنه لأن عاجلا او آجلا ستأتى تلك اللحظة التى يشغله فيها احدهم وينساه شغال وهى ديتها ساعتين تلاتة وتلاقى الحاكم الميكانيكى بتاعه mechanical seal باظ والمتور جاب مية ، ما نسميه شعبيا باسم اوتوماتيك هو ببساطة وحدة بسيطة اسمها (pressure switch)

أنا كنت مستني ردك بفارغ الصبر علشان أستمتع بالبربوزال الجميل ده و كأني بأتعلمه من أول و جديد في الكلية

بجد شرح تفصيلي رائع ماحدش يقدر عليه ألا سبعاوي

عموما انا قلت اللى حصل معى والماتور شغال بدون بالونه واوتوماتك والحمد لله زى الفل.
ووفرت تمنهم وهجيبب مفتاح تانى للحمام يعنى يشتغل من المطبخ والحمام
و الرأى الصح دايما بيكون للصنايعيه اللى شغالين فى المجال
واسف لجهلى

المشاركة الأصلية كتبت بواسطة memes

عموما انا قلت اللى حصل معى والماتور شغال بدون بالونه واوتوماتك والحمد لله زى الفل.
ووفرت تمنهم وهجيبب مفتاح تانى للحمام يعنى يشتغل من المطبخ والحمام
و الرأى الصح دايما بيكون للصنايعيه اللى شغالين فى المجال
واسف لجهلى

محدش اتهمك بالجهل لا سمح الله، كل ما قلناه ان الاتوماتيك يحمى الموتور من حادث محتمل لو حد نسيه شغال، قد تمر عشرة سنوات ومحدش ينسى الموتور شغال وبالتالى هيكون الانطباع هو ان(الموتور شغال زى الفل بدون الأوتوماتيك والبالونة) ، وقد يُنسى الموتور فى اول اسبوع من تركيبه ويحترق او يضرب مية بسبب عدم وجود الاوتوماتيك والبالونة

اما بخصوص اعتقادك انك وفرت تمن الاوتوماتيك والبالونة فانت فيه عامل مهم جدا مش واخده فى اعتبارك هو استهلاك الكهرباء، الموتور لما يفضل شغال نصف ساعة كاملة تمثل الفترة اللى بتاخد فيها دش، بالتأكيد هيستهلك كهرباء اكتر بكتير من انه يشتغل ما مجموعه 10 دقائق فقط من النص ساعة لو الاوتوماتيك والبالونة راكبين، الى جانب طبعا ان الموتور عمره الافتراضى ليس مالانهاية وانما محدد بعدد ساعات تشغيل انت بتستهلكها بشكل اسرع لما تشغل الموتور طوال فترة استخدامك للمياه ،وفيه تجربة واحدة لو كنت بتمر بيها يبقى حرام انك تتكلم فى توفير تمن الاوتوماتيك اساسا، هى انك تكون مشغل الغسالة الأوتوماتيك وتفضل قاعد جنبيها علشان خاطر كل ما هى تعبى مية تروح مشغل لها الموتور المذلة دى ميساويهاش تمن مليون بالونة ومليون اوتوماتيك، على فكرة انا عملت كل اللى انت عملته، ركبت الموتور الأول من غير اوتوماتيك، وبعدين ركبت مفتاح فى الحمام ومفتاح فى المطبخ(خد بالك ان ده ممكن يلخبط لك كهرباء البيت تماما لو مصدر الكهرباء فى الحمام على مفتاح عمومى غير مصدر الكهرباء فى المطبخ) وجربت حكاية انى اشغله من هنا واجى اطفيه من هناك ميطفيش، وبعدين لجأت لقصة المفتاح الديفيتيرى اللى ممكن تشغله من نقطة وتفصله من التانية، وبعيد لقيت ان كل ده وجع قلب ممنوش فايدة و100 جنيه بالونة وعداد والوصلة بتاعتهم ارحم من الهيصة دى كلها

اما باه النقطة اللى انا مختلف معاك فيها تماما هى حكاية ان اكتر واحد بيفهم فى مجال هو الصنايعى اللى شغال فيه، للأسف الشديد ان 80% من الصنايعية فى بلدنا حافظين مش فاهمين، هو حفظ حاجة معينة من الاسطى بتاعه من 115 سنة فاتوا ، والحاجة دى اتغيرت وظهر مكانها 100 حاجة جديدة وهو على قديمه مالوش دعوه وعايش فى مية البطيخ وعامل فيها طبيب جراح، انا بتكلم عن ثقة لأن تقريبا مافيش حاجة انا مبعملهاش بايدى، وشفت الفرق الشاسع بين شغلى لنفسى بإيدى وشغل الصنايعى، بالأضافة طبعا لان طبيعة دراستى وعملى تخلينى لا يمكن اسلم دماغى لصنايعى فى مجال الكهرباء او الميكانيكا، انا ممكن اسلم دماغى لفنى اشعة طبية او فنى علاج طبيعى لأن دى حاجات انا مدرستهاش، لكن فيما يتعلق بالكهرباء والميكانيكا ومن خلال تعاملى مع مئات الصنايعية فى مجال عملى وفى الحياه العادية وقدرتى على تقييم شغلهم اقدر اقول لك ان 80% منهم متأخرين ب 30 سنة عن واقع الحياه المعاصرة