مين اللي يقولي الشاسية مفتوح ولا لأ!!

**carter** · 02-02-2009 10:36 AM

السمكري ولا بتاع العفشة ولا بتاع ظبط الزوايا.
وهل فعلا جهاز ظبط الزوايا بيبين إن كان الشاسية مفتوح ولا لأ.
يا ريت أعرف خصوصاً إني رايح للثلاثة الفترة الجاية السمكري ألحم عنده شرخ في الحوض وبتاع العفشة أركب مساعدين أمام وبعد كده أظبط زوايا.

وسؤال كمان معلش ..
من متابعتي للمنتدى عرفت أن أفضل أنواع المساعدين المونرو الأسباني ونوع تاني ألماني (مش فاكر اسمه)

عايز أعرف تصميم الإتنين ..
بسمع إم فيه مساعين زيت وفيه مساعدين هوا وفيه الإثنين على بعض أيهم أفضل.
العربية 128 مو 79

ومشكووووووووووووورين مقدما

**carter** · 02-02-2009 10:40 AM

معلش نسيت .. العربية 128 مو 79

**shshtawy** · 02-02-2009 01:21 PM

واللهى انا اعرف ان فى بعض البنزينات بترفع العربيه وبتديك نتيجه شامله عن حاله الموتور والشاسيه
اما المساعدين هما المنرو افضل حاجه طبعا على حسب سمعى بس معرفش بقى حكايه الهواء والزيت دى

**ahmad5997** · 02-02-2009 01:50 PM

بص يا باشا
انا كانت معايا 28 وكانت مفتوحة شاسية
لو انت بتسأل مين اللي يقولك اذا كانت مفتوحة ولا لا ف مافيش حد هتروحلو من التلاتة اللي قولتهم دول او غيرهم مش هيقولك انها مفتوحة
بمعني ان ال 128 لما بتفتح شاسية اي حد بيشوفها بيعرف انها مفتوحة وذلك عن طريق اي شروخ في علب الشاسية او المسافة بين الركب بين المسمارين اللي في السينتر مش عراف تقريبا بتبقي 95 سم حاجة زي كده
المهم يا اما سمكري وهيقيس المسافة دي او بنزينة وبردو هتعمل نفس الحكاية
طبعا التصليح بيبقي عند السمكري وللأسف العربية هتصعب عليك قوي ساعتها لأنها بتحس انها بتتفكك من بعضها
ربنا معاك ويقويك عليها وانا في الخدمة

**carter** · 02-02-2009 02:28 PM

شكراً يا جماعة على الردود..
يا ترى ممكن حد يوصف لي بنزينة محترمة أكشف فيها على العربية؟
وليه يا أخ أحمد بتقول إن العربية هتصعب عليا ؟ تقصد لما السمكري يشتغل فيها؟ يا ريت تشرح لي الموضوع بالتفصيل.

**Abdo_Eldesokey** · 02-02-2009 03:26 PM

طب سؤال للخبراء في الـ 128 وعذاب الـ 128

الواحد يعمل إيه عشان يتجنب فتح الشاسيه ؟؟

**ahmad5997** · 19-02-2009 01:08 PM

المشاركة الأصلية كتبت بواسطة carter

شكراً يا جماعة على الردود..
يا ترى ممكن حد يوصف لي بنزينة محترمة أكشف فيها على العربية؟
وليه يا أخ أحمد بتقول إن العربية هتصعب عليا ؟ تقصد لما السمكري يشتغل فيها؟ يا ريت تشرح لي الموضوع بالتفصيل.

ببساطة جدااااا هو بيحط زرجينة ويفضل يشد عليها عشان تفتح مناطق معينة ويرزق بالمرزبة في مناطق تانية عشان تلم
ومن الممكن جداااااا ده ان ما كانش اكيد في شروخ هتبان جديدة ممكن مثلا عند الفاصل اللي في اخر الزجاج من تحت او في الركب
وبعد ما بيخلص خالص ويرفع مقاساته ويلحم علي كده بيسيب العربية مرفوعة زي ما هي لحد ما تنشف او عضمها يشد علي كده
طبعا هتصعب عليك اكتر واكتر لما تبص في الحوض بعد الموال ده لما تشوف اللحامات والارف اللي بقي جوة العربية

**ahmad5997** · 19-02-2009 01:10 PM

المشاركة الأصلية كتبت بواسطة Abdo_Eldesokey

طب سؤال للخبراء في الـ 128 وعذاب الـ 128

الواحد يعمل إيه عشان يتجنب فتح الشاسيه ؟؟

1-كن حذر جدااااااااااااااااا في المطبات اطلع علي المطب زي ما يكون ازاز وخايف انه يتكسر منك
2-ما تحملهاش كتير
3-بلاش السرعات العالية في الملفات
وربنا يسترها اولا واخيرا

**mezo73** · 19-02-2009 02:38 PM

دة العيب الاساسي في 128
انها بتفتح شاسية من المطباط والعيب دة اقل كتير في 127
المهم السمكرية كلهم عارفين مقاسات 128 بيقيس من البطاحة للبطاحة
و الحوض من جوا اكس بالورب من جوا يمين لبرا شمال والعكس
بس الاكيد طالما في شروخ تبقي فتحة شاسية
والفتحة بتبقي درجات
اكبر درجة فيها ان اكس من الاكسات بيخرج من مكانة
وفي الحالة دي يابيعمل زرجينة وبتفتح تاني غالبا او بيركب اكس اطول زي الريجاتا مثلا
والحل الثالث ينزل الموتور خالص ويلحم الشروخ ويغير علب
وفي ناس بتركب شداد علي البطاحات
بالنسبة للمساعدين في كذا نوع
منهم مثلا منرو - دلفي البولندي - بوجي - وفي انواع اخري اسباني والماني
المهم لوعاوز تركب ركب دلفي بولندي زيت
لانهم بيخلوا العربية طرية
وربنا معاك
علي فكرة انا كان عندي 127 توب الماني كانت تحفة لوحد عايز مساعدة فيها انا في الخدمة
انا دلوقتي انا معايا تمبرا من 4 سنين تقريبا

**casper1500** · 19-02-2009 06:56 PM

المشكلة دى حصلتلى و لسة عامل موضوع الزرجينة دة قريب
المفروض ان المسافة بين الفخدتين 85 سم لو كانت ازيد يبقى الشاسية مفتوح و السنكرى بيتفق مع الميكانيكي ييجي يشيل المكنة و الليلة اللي جوه الكبوت و يعمل الزرجينة و يظبط لحماته بس موضوع مقرف و لو متعملش صح هتلاقي العربية مش موزونة و تاكل كوتش و تصرخ و شغلنات ..
بالمناسبة ساعات العربية بتلقط بوية من جوه عشان اللحمات متبنش و يعفر البوية عشان تبان كأنها فبريكة