الموضوع: الواحد خلاص جالة نقطة من البلد دة

يا جماعة الواحد بجد طهق من اللي بيتعمل فية في البلد دة

العربيات و مش عايزة ترخص و يقولك لا نية في تخفيض الاسعار و دة طبعا بسبب جشع التجار
دلوقتي العربيات انخفضت برة جامد يعني بيستوردوا موديلات 2009 باسعار اقل ب 50%
و ييجي هنا يبيعها بثمن اكتر من موديلا 2008
يعني السعر لسة متثبت

و المشكلة الكبيرة في البلد ان اي تاجر لازم يكسب ملا يقل عن 40% ربحية حتى لو حاجة ب ربع جنية
و هو دة اللي مبوظ البلد كلها

برة و في اي بلد تحترم الافراد يوجد رقابة على الاسعار لو التاجر زود شلن من غير مبرر بيروح ورا الشمس لكن هنا في مصر تروح مكان تلاقي الحاجة بتمن و لما تروح حتة معفنة تلاقي الحاجة هي هي بس ارخص بكتير ؟؟؟؟؟

لكن برة في الدول العربية مثلا تروح الصحراا تلاقي الحاجة بتمنها تطلع فوق الجبل تلاقيها بنفس السعر مش يفتكس و يقولك يا بية دة قليلة في السوق
يا بية الدولار زاد
و يعدوا يغنوا بالنغمة دة لحد ما الدولار نزل تلاقية ما ينزلش و لا شلن و يقولك يا بية الين زاد
يعني دلوقتي بقينا بس بنهتم بالين حاجة تشللللللللل


لكن احنا بلد الكوسة و السبوبة و المصالح

لو عايز تخلص حاجة تدفع فلوس و طول مانت في الشارع تلاقي سايس عايز فلوس كأ، الشارع بتاع ابوه و لا وارثة واللي في البنزينة عايزين فلوس و طول مانت بتعدي على لجان عمال تدفع فلوس و لو انت في مصلحة حكومية و مثلا الورق تمنة 13 ج تدي الراجل 15 مايديكش باقي و يقولك صباح الخير حتى و انت في السنما بردة مرة جة ياخد 5 جنية بكل بجاحة روحت قلبتها خناقة

و المرور مش بتنجح في الرخصة من غير رشوة
و لو عايز ترخص عربية تدفع رشوة

بجد لو كل واحد رضي باللي مقسوم ويراعي ربنا في مكسبة و يعمل شغلة مظبوط ما كنش دة حالنا

سيدي الفاضل ..
أنا بحكم عملي كنت تقريبا عايش بره مصر لفترة طويلة و كل تعاملاتي كانت مع أجانب و يهود و للأسف كنت مبسوط و مرتاح معاهم

و لما بدأت أستقر في مصر قولت أمشي زي ماالناس بره ماشية و خصوصا في موضوع القيادة ده , لكن لاقيت نفسي هاأضيع و الاكثر من كده أني مرة أتنصب عليا في طريق رأس غارب - الغردقة من لجنة مرور بحجة أني أتصورت رادار , و علي طول بعد ماسلمت الظابط الرخصة و مشيت الموبايل أشتغل و الكوسة بدأت و كانت النتيجة أن لا كان في رادار و لا يحزنون و لفيت تاني و رجعت للظابط و أخدت منه الرخصة و الوصل أتقطع أمام اللجنة كلها

ساعتها بس عرفت أن أحنا في بلد مافيهاش قانون و أن اللي فيها بيخافوا مابيختشوش