الموضوع: موقف لا يحسد عليه

واحد صاحبى حصل معاه الموقف ده :
عنده عربية سكودا فيليشيا .. اخد عياله ومراته وراح مرسى مطروح علشان يقضى اسبوع هناك وطبعا العربية اتستفت من كل حاجة .. الاكل واللعب والحلل والكوبيات والايس تانك و الملابس وخلافه يعنى شنطة العربية مافيهاش مكان تحط فيه مسمار .. حلو الكلام .. اول ما وصل دور على شقة واستقر به الامر فى شقة ب 150 جنيه فى اليوم ودفع 900 جنيه مقدما تمن الاسبوع وبدأ المصيف مع اول يوم فى الشواطىء القريبة من الشقة على امل الذهاب الى الاماكن البعيدة ابتداء من اليوم التالى .. وفعلا مع بداية اليوم التالى اخد بعضة وراح على عجيبة....... قضى اليوم جميل من غير مشاكل وجاء موعد الانصراف .. الولد الصغير اخد منه المفاتيح بتاعة العربية وسبق علشان يفتح العربية واثناء جريه نحو العربية وقع منه المفتاح على الارض فالتقطه وكمل الجرى وتم فتح العربية والحاجة اتحطت فى الشنطة والناس كلها ركبت وبسم الله الرحمن الرحيم يللا بينا دور العربية .. مش عاوزة تدور .. دور تانى .. هب دارت وبعدين بطلت لوحدها .. حاول تانى مرة اتنين تلاته عشرة .. كل مرة تدور وتبطل .. تخيل انك مكانه ومعاك اولادك وانت فى شاطىء عجيبه فوق التل وحصل كدة حتعمل ايه .. الله يكون فى عونه فعلا .. المهم يعمل ايه يعمل ايه .. نزل ولاده ومراته ودور على ميكروباص يوصله وسط البلد هو وولاده .. طيب والعربية حيسيبها كده ده لو الليل دخل حييجى الصبح يلاقى يادوبك العفشة .. اخد بعضه وراح ناحية معسكر للجيش موجود هناك لقى هناك شوية عساكر جدعان .. الحكاية والرواية الموضوع كدا كدا وانتم منين احنا من اسكندرية طيب ممكن اسيب العربية قدامكم لغاية ما اوص العيال وسط البلد وارجع .. قالوا له وماله سيبها ولا يهمك .. المهم ساب العربية واتكل على الله .. وصل العيال واخد مواصلة وميكانيكى وراح على العربية فتح الكبوت والميكانيكى يجيبها يمين شمال ابدا .. قل له بص يابيه العمليه كبيرة ولازم تروح الورشه .. سابها لغاية الصبح ومع اول نور للصبح اخد بعضه وراح السوق عند العربيات النص نقل وسأل عن حد ييجى معاه يجر العربية .. اللى قال 200 واللى قال 150 المهم وصل مع واحد لغاية 130 جنيه .. راح معاه وجر العربية لغاية ورشة الميكانيكى .. اللى قال الرشاشات واللى قال الموتور عاوز عمرة واللى قال البنزين واللى واللى المهم العربية قعدت عند الميكانيكية خمس ايام اكلين شاربين فيها لدرجة انك ما تقدرش تفرق بين لون الصالون ولون الشارع من كتر البهدلة والوساخة .. المهم ان الميكانيكى يقول له ايه .. عيب يابيه العربية تطلع من مرسى مطروح من غير ما تتصلح والله ابدا وهات ياتجارب لحد ما اجازة الراجل خلصت وقرر انه يسافر فراح للميكانيكى وطلب منه انه يقفل العربية علشان يشحنها او يجرها الى الاسكندرية والميكانيكى راسه والف جزمه ان عيب العربية تطلع من مرسى مطروح متشاله مرابعة ولازم تطلع على رجليها .. المهم وبعد اقتاع اتقفلت العربية وراح الراجل يدور على عربية تنقله اسكندرية وبعد ما داخ .. لقى عربية توديه ب350 جنيه .. خراب من كل حته .. تخيل بقى حضرتك فى المأزق ده ومعاك ولادك ورايح تصيف ويحصل لك كده .. المهم وداها عند ميكانيكى وسابها عنده .. الميكانيكى اتصل به اخر النهار وقال له .. قول لى يابيه هو المفتاح بتاع العربية دى وقع منك قال له اه ساله قبل ما تدور العربية على طول قال له ايوه فقال له بس يابيه المفتاح بتاعك كان فيه شفرة ووقعت لما المفتاح وقع منك .. وهنا تذكر صاحبى ان المفتاح فعلا وقع وكان فيه من الجنب دائرة كدة جواها سوسته اعتقد انها بتاعة السنتر لوك اللى اصلا كان صاحبى شارى العربية بيها مش شغالة فلم يتنبه الى اهميتها .. وبعد محاولات ومناقشات ودوها عند واحد حيعمل لها شفرة جديدة ومفتاح واحد ب 700 جنيه .. انا طبعا تعاطفت جدا مع صاحبى ده وقات لو انا اللى كنت او اى واحد فى نفس مكانه وظروف العطل اللى حصل معاه يتهيأ لى كنت جرى لى حاجة .. وقلت احكى لكم الموقف ليكون درس لاى واحد فينا وكمان علشان اسألكم عن حد بيعمل الشفرات دى علشان ابعت صاحبى له علشان ينهى معاناته المسكين :lol: