الموضوع: بارقة امل من وسط الضلمة

والله كله اخلاق
بس اكتر الناس معندهاش زوق خالص

نفس الموضوع حصل معايا كنت راكن الـ 128 الله يرحمها في شارع الطيران جمب مرور رابعه وكنت في المرور بخلص حاجات وكنت حاطط عليها ورقة للبيع ولاقيت واحد بيتصل بيا وبيقولى تعالى عند العربية (انا قلت ده زبون جاى يشترى) المهم طلعت بسرعه لاقيته وشه جايب الوان ولاقيته بيقولى وانا بركن جمبك حكيت الباب من غير ما اقصد وقعد يتاسف جامد وساعتها فعلاً احرجنى بأدبه وذوقه وخلاني كل اما اقابل حد احكيله الموقف ده وكمان مزعلتش على العربية على الرغم من انها كانت لسه خارجه من سمكره ودوكو

فعلا موقف يفرح بجد

انا مرة كنت باخد يوتيرن وغصب عني حكيت في عربية راكنة على جنب وانا بلف لإن الشارع اصلا في الحتة دي ضيق جدا هي كانت حكة بسيطة قوي في الباب من تحت (الحتة الفيبر اللي في عربيتي عملت الحكة واتكسرت)
ركنت على جنب وفضلت واقفة شوية مش عارفة اعمل ايه ونزلت بصيت على عربيته وقعدت ابص حواليها يمكن الاقي صاحبها اعتذرله ولا حاجة مالقيتش حد.
بعدين ترددت كده شوية وبعدين الشيطان قعد يوسوسلي ويقوللي كبري دماغك وامشي لكن قلت لنفسي حرام ..... اعملي اللي عليكي لإنك هاتتحاسبي عليها قدام ربنا وهاتكون دين في رقبتك وكتبتله ورقة اني متأسفة ان عربيتي حكت في باب عربية حضرتك غصب عني وانا على استعداد اتحمل تكلفة اصلاحها على حسابي وكتبت رقم تليفون يقدر يوصللي عن طريقه وبعدين جيت احطها تحت المساحة خفت مايشوفهاش أو مياخدش باله منها أو حد تاني يسئ استخدامها فزنقتها في الباب عنده عشان يقدر يشوفها اول مايفتح عربيته.

واستنيت كذا يوم لكن محدش اتصل (معرفش بقي هو شافها ولاقاها مش مستاهلة ولا الورقة ضاعت ولا حصل ايه )
اينعم الحكة دي كانت بسيطة جدا وتكاد لا ترى اصلا بس قلت لازم اتحمل مسئولية خطأي واخلص ذمتي قدام ربنا.

لسه في امل طبعاً... ده اللي انا متأكد منه...