الموضوع: خبطنى أخدت مفتاحه ومشيت !

إمبارح مينى باص ماشى قدامى خبط العربية اللى قدامه ، صاحب العربية نزل يتخانق معاه ، سواق المينى باص مارضيش ينزل وقام راجع ورا عشان يطلع منه فخبطنى وخبط عربية تانية جنبى عشان يوسع لنفسه وبعدين مشى عادى جدا كأنه سايق مركب فى البحر

جريت وكسرت عليه وأول حاجة عملتها من غير ولا كلمة فتحت باب عربيته وأخدت المفتاح من الكونتاكت عافية كدة وهو لسة مش مجمع أنا بعمل إيه ، وبعدين روحت على عربيتى أشوف إيه التلفيات وأنا متأكد خلاص إن هو هينزل ويجى ورايا ، لقيت الرفرف بقا منديل كلينكس والإكصدام فيه شوية تلفيات من الجنب ، طبعاً البيه بدأ نظرية خدوهم بالصوت وبيقوللى أنا ماخبطكش دى مخبوطة من الأول ! والعربيتين التانيين اللى هو خبطهم معايا لسة واقفين أصلاً ! للأسف شتمتوا وهو راجل كبير بس غاظنى أوى إنه كداب وبجح ، وقلتلوا يا رخصك ومحضر يا تدفع وتخلص دلوقتى ، طبعاً البيه مارضيش وزعيق وهات المفاتيح وكلام فارغ والركاب نزلوا وبقت المشكلة معايا أنا عشان واخد المفاتيح ومعطل الطريق والركاب ، حصل خير جت فى الصاج قلتلهم هتصلحوها إنتم ؟ ماحدش نطق طبعاً ، لقيت مافيش منه رجا ركبت عربيتى وقلتله حصلنى على النقطة اللى فى الميدان عشان نعمل المحضر ، أنا زى أبوك ومش عارف إيه طب هات المفتاح الأول وبعدين نتفاهم وجرى ورا العربية يخبط عليها عشان الطريق كان زحمة وماشى بطىء ، سيبته فى الآخر ومشيت ومعايا المفاتيح لما لاقيته لسة بيكمل إستهبال وروحت عملت محضر برقم العربية وأنا عارف إن المحضر مش هيجيب حاجة بس قولت تحسباً عشان هو مايروحش يعمل محضر وخصوصأً إن الخبطة عندى أنا من قدام ، وقلت كفاية هيتعطل ساعة ولا إتنين ويضيع عليه دور وشوية فلوس ويمكن يجى ونش ويسحبله عربيته

المشكلة إنى حاسس بذنب كبير لأنى عطلت الطريق وكمان الركاب إضطروا ينزلوا بدرى (كنا قبل موقف عبد المنعم رياض على طول) ، بس أنا مش حاسس بأى ذنب ناحيته هو لأنه كذاب وسايق الهبل وخبط 3 عربيات منهم 2 بدون داعى خالص ، وأنا معتبر العطلة بتاعته هو والفردة ولا الإتنين اللى هيروحوا عليه قدام اللى عمله

المشكلة كمان إن المفاتيح لسة معايا ومش عارف أعمل فيها إيه ؟؟ أروح أسرق المينى بص !

بهزر طبعاً

إيه رأيكم هل أنا ظلمته ؟؟

تصرفك سليم تحدث مثلها كثيرا خصوصا ان السيارات الكبيرة مثل المينى باص واتوبيسات السياحه كبيرة وقوية اذا صدمت اى سيارة ملاكى فالخسائر فادحه فى الملاكى ام هما فلا اضرار لانها عالية وامتن قليلا
اما المفاتيح كنت تركتها فى القسم وتمشى وتتدعى انه رماها ورفض يمشى لانه هو المتضرر من الحادث كذبه بيضاء