ياترى لو واحده ست خبطط عربيتك ايه ممكن يحصل
السلام عليكم
امبارح انا كنت فى مصر الجديده وانا ماشى قريب من مساكن شيراتون كان ورايا عربيه موديل حديث من العربيات الورق دى طبعا انا عربيتى فولكس بيتلز
المهم فى جنبى من الشمال وانا فى اقصى اليمين ماشيه العربيه دى لاكنها متأخرة عنى شويه فى المشى وشمالها خالص اتوبيس نقل عام
يعنى الملاكى فى اليمين والوسط والاتوبيس والنقل بقو هما اللى بيمشو فى الشمال اللى هى المفروض الحاره السريعه
المهم الاتوبيس رمى يمين على العربيه الحديثه راحت كسرت هى عليا راح الاكصدام الامامى بتاعها اتعلق فى الاكسدام الخلفى بتاعى طبعا اتخلع الاكصدام بتاعها وانا عربيتى اتجرحت شويه من الرفرف الخلفى المهم انا وقفت اشوف ايه الحكايه لانى ماحسيتش بالموضوع انا حسيت بحاجه رزعت
المهم نزلت المدام او الانسه لا اعلم وعماله تزعق فيا وماسه الموبايل بتاعها وتقريبا هتتصل بحد جامد فى البلد علشان يخرب بيتى انا حاولت على قد مااقدر انى اهديها وقلتلها ماتزعليش كل اللى هتطلبه هعمله بس انتى اهدى طبعا قالتلى لا فلوس ايه انت لازم تاخد بالك ولازم تصحى ولازم ولازم وقعد تدينى محاضرة فى فنون القياده برغم انها هى اللى غلطانه بس لو انا خرجت عن شعورى ممكن يتحكم عليا بالاعدام لان ممكن يكون ابوها بيشتغل فى مكان حساس ولا حاجه المهم فضلت اقولها حاضر وحاضر وحاضر لغايه ماسابت الموبايل ومشيت
ياتلرى لو انت مكانى تعمل ايه طبعا انا لا افضل العنف لان الموقف ده ممكن يحصل مع اختى او والدتى لاكن ماذا لو البنت ماسكتتش واتصلت وعملت وسوت
دى حاجه الحاجه التانيه مره خبطنى سائق مينى باص والله العظيم كان غلطان وكل الناس شهدت بكده لاكنه قبل اى كلام نزل وعايز طبعا يفترسنى ويشتم ويهلل
فهل الواحد وهو ماشى بعربيته بيحس انه فاقد الامان
انا كنت فى اليونان وشفت هناك حادثه اتكسر فيها 10 عربيات ولا حد منهم نزل قال اى كلمه جه موتسيكلات الشرطه واخدت ارقام الرخص علشان التأمين يصلح وخلاص
الا هنا فى مصر تلاقى الاثنين نازلين يضربو بعض وماتعرفش مين الظالم ومين المظلوم هو تقريبا بيقول اما اضربه قبل ماينزل هو يضربنى