الى جميع العاملين بمجال الكومبيوتر, برجاء المساعدة...

**Abdallah** · 23-08-2007 10:51 PM

السلام عليكم جميعا واسف اذا كنت هاخد من وقتكم شوية...
الموضوع وما فيه هو انى اشتريت من حوالى 6 شهور دى فى دى رايتر نوعه ASUS وبعدين من حوالى 15 يوم وانا بغير الباور سبلاى الفنى ركب كابل الباور غلط فى الدى فى دى ومن بعدها مش عايز يقرأ اى اسطوانة مع انه بيشتغل عادى والباب بيفتح بس مش عايز يقرأ اى اسطوانة سواء دى فى دى او سى دى ...
بعته الضمان ردوا عليا وقلولى ان الجهاز برة الضمان لأن ضمانه 6 شهور فقط !!!!!
قلتلهم طيب صلحوه ردوا عليى بعد كام يوم وقالولى العدسة باظت ومش هينفع يتصلح!!!
طبعا انا مش فاهم ايه علاقة كهرباء غلط بعدسة الجهاز ومخنوق جدا من الموضوع كله ومش عارف اعمل ايه مع الناس دى...
الدى فى دى منسخش اكتر من 30 اسطوانة بالعدد ومعتقدش ان فى عدسة فى الدنيا ممكن تبوظ من 30 اسطوانة وفى نفس الوقت مش قادر افهم ليه ضمان الهباب دة 6 شهور بس مع ان معظم قطع الكمبيوتر بيبقى ضمانها 11 شهر!!!!
انا مش عارف اشتكيهم لجهاز حماية المستهلك ولا اعمل ايه بالظبط؟؟؟
الجهاز اشتريته من شركة صديق ليا بالمنصورة وهو بدوره واخدة من شركة " مترا " بالقاهرة.

شكرا لسعة صدركم واعذرونى اذا كنت اطلت عليكم لكن انا فعلا متضايق جدا ومش عارف ايه الى بيحصل فى الدنيا .

**Nader** · 24-08-2007 12:15 AM

هو فعلاً :للاسف: ضمان الـ CD ROM CD R/W و DVD R/W و الكومبو كلهم بقي 6 شهور ودة من اكتر من سنة، زماااان كان 12 قبل ما يبقي 11 و قبل ما يبقي6.

انا عندي نفس المشكلة بتلعتك بس مع CD /R/W وباظ من حوالي 4 سبيب وكان ناقص علي الضمان 4 شهور وكانت العدسة اتحرقت برضة "كهربة غير ثابتة" ومعرفوش يصلحوة في الضمان واخدت واحد تاني.

**ahmed1981** · 24-08-2007 12:08 PM

المشاركة الأصلية كتبت بواسطة Abdallah

طيب مفيش شركة بتبيع العدسات دى ؟؟

لما حصلت معايا المشكلة دي لفيت الدنيا عشان الاقي عدسة وملاقيتش
وبعدين لاقيت CD R/W قديم في البيت وفيه عدسة حلوة وفكيته وفكيت التاني وطلعت العدسة من الأولاني ولما جيت أحطها في التاني وقعت مني على السجاده ومن ساعتها مش لاقيها

وطبعا رحت إشتريت CD R/W جديد والحمد لله

**Nader** · 24-08-2007 05:03 PM

طيب مفيش شركة بتبيع العدسات دى ؟؟

هتدوخ يا عبد الله، اذا كان الوكيل مكانش عندة :? عليك وعلي مراكز الصيانة ممكن تلاقي عدسة مستعملة عندهم تتوافق مع الجهاز بتاعك ويركبوهالك.

**Karim_Monir** · 25-08-2007 05:01 AM

شوف يا عبدالله
ده في الغالب تشيب اتحرق مش العدسة ولا حاجة
بس كل المستوردين والفنين بيقولولك عدسة عشان ما يتعبوش نفسهم في التصليح لانك لازم تدور على واحد نفس الموديل وتشوف انهي تشيب اللي اتحرقت وده يستلزم انك تقيس مقاومات بوردة الجهاز حتة حتة ولو طلع تشيب الباور غالبا مالوش تصليح
اما عن الضمان فالشركات بقت بتستهبل ولما تجيب رايتر دور على ال NEC
افضل ناسخ دي فيدي في العالم المتاح في مصر
فعلا رائع
دور شوية وهاتلاقية ولما تلاقية صمم انك تاخد علية ضمان سنة
وتكتب ده على الفاتورة
لاني مابقتش اعترف بفواتيرهم وكلامهم الشفوي
لازم يكتبة بخط ايد ضمان 11 شهر ضد عيوب الصناعة

ربنا يوفقك