الموضوع: لو حد عنده استفسار عن الدهانات و الديكور و النقاشه عامه

بص يا باشا اللى انا اتعاملت معاهم و اعرفهم اﻻلمانى و السويسرى و هم افضل طبعا من الصينى بس اهم حاجه فى اختيارك ما تقلش عن سمك 8مم و معامل الخدش يبقى 32 فيما فوق و هو فعﻻ اختيار كويس للغرف
و لﻻسف مش بعرف فى السباكه فمش هقدر افيدك

المشاركة الأصلية كتبت بواسطة mr_vampire

الف شكر ياهندسة. لو حبيت استفسر عن حاجة تانية هجيلك . اوعا تزهق ها.

يا باشا تؤمرنى و براحتك خالص

المشاركة الأصلية كتبت بواسطة mmh666

السلام عليكم يا هندسة ربنا يجازيك خير على الموضوع ده إن شاء الله

ندخل فى الموضوع مباشرة
أنا اشتريت شقة الصافى بتاعها حوالى 105 متر فى مشروع سكنى هنا فى اسكندرية هستلمها كمان سنة ان شاء الله.... طبعا الشغل كله تجارى من نوع اقلب عشان نشوف مشروع غيره بداية من المحارة اللى فيها تنميل كتير رغم انى لسه هستلم الشقة كمان سنة و النقاشة التسليم هيكون بسكينتين معجون بس.

فأنا ناوى إن شاء الله أقولهم خليلكم سكينتين المعجون بتوعكم دول و هخصم تمنهم من دفعة الاستلام و أقوم أنا بموضوع النقاشة على أساس صحيح و بشغل نضيف يعيش.

دى الخطوات اللى ناوى اعملها على حسب قراءتى من النت و الأسئلة لكل خطوة و لو فيه اى غلط او نقصان يا ريت حضرتك تصححه و تنصح بيه:
1- المراشمة
(صنفرة بالحجر أم بسكينة المعجون أم بالصاروخ)
2- وش سيلر مائى
( إيه أحسن نوع ممكن أستخدمه اذا كان يوتن او اى نوع تانى مش يوتن)
3- وش معجون أسمنتى عشان التنميل بتاع المحارة
( إيه أحسن توع معجون أسمنتى موجود بالسوق يوتن و لا فيه انواع تانية)
4- 3 وش معجون
(ما الأفضل المعجون البلدى أم المعجون الجاهز و إيه أفضل نوع من اى من الاختيارين)
5- 3 وش بلاستيك
(ايه الانواع الموجودة من يوتن فينوماستيك أو اى نوع تانى من يوتن و ايه اللى حضرتك ترشحه للاستخدام)

أكيد هيكون فيه حيطان هتتعمل ستوك أنتيك و ليدى بيرل..... السؤال هنا ايه أحسن التصميمات اللى تمشى مع العفش المودرن؟
الشقة عبارة عن
1- 3 حجرات 3.8*3.4 و 3.4*3.8 و 4.3*3.4
2- ريسيبشن 9*3.3
3- صالة مدخل 2*2.8
4- طرقتين 110سم*3.4 م و 1*4.9
يوجد 4 أبواب عايز أرشهم أستر على لونهم أو بنى و لو فيه حاجة أفضل بموضوع الرش ده ممكن تنصحنى بيها.

عايز أعرف التكلفة للشقة كلها كام من الخامات اللى حضرتك هترشحها؟
و لو صنايعى هيقولى مقاولتها بالمصنعية و الخامات ممكن يقولى كام؟.... أو مصنعيته هو لوحده تكون كام من غير خامات؟

أسف للاطالة و لو فيه أيه أسئلة أخرى معلهش هنتقل عليك فيها
جزاك الله كل خير

ان شاء الله تستلم على خير
1 المراشمه بسكينه المعجون
2 السيﻻر المائى فى يوتن كويس اسمه بى فى ايه برايمر و بتاع glc برضه كويس
3 موضوع معجون اسمنتى ده غريب و مش عارف اظن انط تقصد بيه مهجونه الممتاز اللى هى بتبقى بودره و بتضرب و بتبقى قويه و بتستخدم اكتر للاماكن الخشنه اوى بس انا شايفها خطوه ما لهاش ﻻزمه
4 سكاكين المعجون 3 كويس و ممكن لو اامحاره وحشه تحتاج سكينه 4 و المعجون الجاهز احسن و اريح و فى معجون يوتن او سايبس او glc
5 البﻻستيك حضرتك تدى وش بطانه بس ما يبقاش تعبان اوى حاجه متوسطه فى يوتن اسمه ديروسان و بعدين تشطيب بوشين فينوماستيك بﻻستيك
رقم تقريبى خامات الشقه من المعجون للفنش حوائط تخش فى حوالى 3000 جنيه من غير ديكورات و ممكن تقل شويه بسيطه و موضوع المصنعيات ده بيفرق من مكان للتانى عندنا ممكن يخش فى حدود 5000جنيه حوائط بس بديكوراتها بس ديكورات فى المعقول
و بالنسبه للديكورات دى بحرها واسع جدا ﻻزم تحدد انت هتعمل ايه علشان اقدر افيدك اكتر و انا هحاول ارفع كام صوره فيهم شويه ديكورات لسه نىزلين موضه جداد من برشور يوتن
اى استفسار تانى انا معاك يا باشا ان شاء الله

المشاركة الأصلية كتبت بواسطة tza

لما يكون باب سلسله يا هندسة مدهون ابيض لاكيه كويس وعاوز اعمله باليدى جليز يكلف كام وهل الشكل النهائى هيكون كويس واشكرك كثير على ردك السابق جزاءاك الله كل خير ...

الموضوع هيتكلف تمن علبه الليدى جليز و بتكون فى حدود 80 جنيه او اقل شويه و بتجيب اداد بتدى شكل ثمره الخشب فى حدود 15 او 20 جنيه بتديك شكل ثمره الخشب و بتبقى شكلها معقول بس طبعا مش زى ثمره الطبيعيه ممكن ابقى اصورلك شكل اﻻداه علشان تبقى متخيل الشكل النهائى اللى بتطلعه بس اول ما اروح المركز عندى هصورهالك
تحت امرك فى اى استفسار تانى

دى بعض اشكال ديكورات جديده منزلاها يوتن علشان كنت قلت هعرض بعض اﻻشكال