الموضوع: لو حد عنده استفسار عن الدهانات و الديكور و النقاشه عامه

المشاركة الأصلية كتبت بواسطة طارق _عبد السلام

عاجز عن الشكر يابشمهندس
هو عشوائى وكان شكل الرخام فعلا ومدى لمعه كأنه زجاج
وهعمله على حائط 3 متر فى 8 متر والحائط متشطب قبل كده بلاستيك يوتن
لو امكن طريقه فرده يعنى انا عندى فكره كويسه فى استخدام سكينه المعجون
يعنى تجهيز الحائط وفرد المعجون وتشطيبه والكميه والنوع لو تسمح بس بالتفصيل الممل :)

اسف على التأخير فى الرد
مبدئيا حضرتك هتختار لون المعجون الرخامى من اى مركز و هتجيب 2 جالون معجون متلون جاهز كمبيوتر و تمن الجالون حوالى 230 جنيه ده سعر جالون معجون ستوكو يوتن
و هتجيب برضه جالون واحد بﻻستيك بنفس درجه اللون بس ده لو لون فاتح او قريب من الدرجه اللى مدهون بيها الحائط اما لو لون غامق حضرتك تشترى جالونين
هنبتدى ندهن البﻻستيك اﻻول بس طبعا بعد التأكد ان الحائط سليم من غير اى مشاكل سواء وش او وشين حسب اللون اللى مختاره فاتح او غامق و بعد ما ينشف صنفره بصنفره ناعمه 180 مثﻻ
بعد كده ﻻزم حضرتك تكون بتعرف تفرد كويس بسكينه المعجون و اﻻ تجيب نقاش افضل بدل ما تهدر خامات على الفاضى
نبدأ اول خطوات فرد المعجون
هتبدأ تفرد سكينه افقيه على الحائط بالكامل و تسيبه يشد ينشف يعنى ساعه كده و ﻻ حاجه و خلى بالك متحطش معجون كتير اوى متربيش على الحيطه وش خفيف معجون
ثم تفرد سكينه رأسيه للحائط كله و برضه تسيبه ينشف
تفرد بالسكينه بشكل عشوائى غير منتظم نهائيا بمعنى تاخد حته معجون بالسكينه و تفردها على الحائط فى اماكن متفرقه و متقاربه جدا و تمسح الزوائد بسكينه حجمها كبير شويه و الموضوع تنفذه علىىالحائط بالكامل و تسيب في سحبه السكينه سمك خفيف شويه
و نبدأ بعد كده ننعم الحائط علشان يعطى الشكل النهائى بالمسح الدائرى بالسكينه على الجنب بالكامل حتى يعطى الشكل و الملمس المطﻻوب
اى توضيح لكﻻمى لو فى اى نقطه مش واضحه قولى و انا افسرها اكتر

المشاركة الأصلية كتبت بواسطة البليهيس

متشكره لحضرتك بس عندي سؤالين....
1_ لازم اغطي المعجون وكل ما احتاج اخد ولا عادي يبقي الغطي مكشوف طوال وقت العمل واول ما اخلص ابقي اغطبه انا جيباه يوتن ومش عوزاه ينشف مني
2_السيلر ينفع احطه بعد المعجون علي الوش البطانه ولا بيتحط بس علي المحاره
3_ اسمه ايه الدهان اللي بيتحط بعد الوش النهائي للبلاستيك علشان يحمبه ويبقي بيلمع وهل تطبيقه بالروله عادي ولا بالفرشه ولا ازاي

اسف للتأخير فى الرد
1 المعجون ﻻزم يبقى متغطى و تكشفى الغطاء عند الحاجه علشان ما ينشفش
2 السيلار فعﻻ فى بعض النقاشين بتستعمله كبطانه بدل البﻻستيك بس هو فى اﻻساس بيكون قبل المعجون فقط
3 مفيش حاجه بتحط بعد الدهان النهائى اﻻ لو حضرتك تقصدى خامه ديكوريه معينه اوصفيهالى و انا اشرحها لحضرتك
تحت امر حضرتك فى اى استفسار تانى

المشاركة الأصلية كتبت بواسطة mtak

موضوع ندمت انى اول مره اخد بالى منه

بما انى فى السويس معاك

و كمان نفس العربيه :) , ايه الظروف الحلوه دى

هارخم عليك فى الاسئله

عاوز ادهن غرفه الاولاد بس عاوز اعملها بايدى

هل لازم اصنفر الاول و بعدين معجون و لا ممكن ادهن على الدهان على طول

الاوضه دهانها كويس و مفيهوش رطوبه (الحوائط اساسا اسمنت مسلح (حوائط جاهزه)

الوله اللى اجيبها تكون ناعمه و لا خشنه

اجيب الحاجه من شارع سوهاج و لا دهانات المسلم و لا يوتن على اول الكورنيش

ممكن تقولى ميزانيه كل واحده هاتعمل كام

انا عاوز دهان اطفال و هاعمله بايدى علشان يطلع خلطبيطه و بيبقى لها وقع تانى على النفس و بتحس بالفرحه

بمعنى اخر عاوز العب و افنن :)

يا باشا نورت الموضوع و انا تحت امرك فى اى حاجه
مش ﻻزم صنفره عادى ممكن تدهن على طول طالما الدهان كويس بس يفضل تصنفر بصنفره ناعمه 180 مثﻻ
الروله عادى هتجيب روله عاديه الفتله الخضراء او فى واحده بتبقى صفرا بخطوط سودا كلها المهم تكون روله عاديه فتله متوسطه
طبعا انا برشح يوتن علشان انا اعرفها كويس و ضامنها بس حضرتك حسب راحنك النفسيه بس بﻻش شارع سوهاج يوتن بفروعه التﻻته درش ابراج الصفوه او المغربل خلف مكتبه الكيال او المغربل شارع بورسعيد امام كوبرى حوض الدرس الجديد اللى ترتاحله ممكن تروحه و فى المسلم سايبس فى السويس
و حضرتك ممكن تقولى تفاصيل اكتر عن مساحه الغرفه و اﻻلوان تقريبا لونها ايه علشان افيدك بأسعار تقريبيه او ممكن برضه تنورنى فى اى فرع من يوتن المغربل و تسأل عليا
تحت امرك فى اى استفسار تانى

المشاركة الأصلية كتبت بواسطة البليهيس

.....يا باشمهندس رحت فين محتجين ردك جزاك الله كل خير وكده زودت علي نفسك سؤال تاني هههههه انت حر كل ما تتاخر الاسئله هتزيد........كنت عوزه اعرف راي حضرتك لو واحنا بنمعجن لقينا الحفره عميقه حبتين وداخله جوه كده خاصة الاماكن اللي جنب الحمام كده اكيد المعجون مش حينفع احط فيلر لغاية ما املاها ولا اعمل اسمن بشوية ميه املاها ولما تنشف امعجنها زي الباقي لانها حتبقي كده في نفس المستوي ولا اعمل ايه:0002014a:

تؤمرينى يا فندم و اسف للتأخير مره تانيه ههههه
اﻻفضل لو عميقه ترميها بجبس و اسمنت ابيض لسرعه الجفاف او جبس لوحده
تحت امرك فى اى استفسار اخر