عرض للطباعة
بسم الله الرحمن الرحيم
كل الاقسام بما فيها الشيرى كمان كلهم عاملين تقرير عن السيارات بتاعتهم والسيارة اللى عاملة زى الرز محدش عمل عنها تقارير ولا شوفت ولا تقرير واحد عنها ياريت اللى يجيب لنا التقرير يتكلم عن :
اداء العربية سواء 1300 او 1100 سى سى
السرعة القصوى
العزم
عدد الاحصنة
المميزات :36_9_4:
العيوب :_Alshmokh08[1]:
الصيانة كدا يعنى
وياريت محدش يجيب مواضيع من المنتدى نفسه احنا عايزين كلام جديد:U_thin1[1]:
عشان لو عجب الادارة يتثبت ويبقى فايدة لكل الاعضاء
اخوكم يوسف
طبعا صعب جدا أنك تلاقى حد يعمل تقييم ليها لسبب بسيط وهو أنها قديمه جدااااااا و أصلا معظم الناس إللى معاهم العربية وأنا كنت واحد منهم ما يعرفوش حاجة عن الكلام إللى أنت طالبه ده بس أنا هاحاول أجوبك على قدر معلوماتى وخبرتى معاها.
بص يا سيدى الفاضل أنا إللى كانت معايا 1100 موديل 87 ودى أصلا كانت سيارة والدتى و متحافظ عليها جدا وحتى بعد ما خدتها كنت برضوا محافظ عليها قوى أو بمعنى أصح كنت بخاف منها وبعملها ألف حساب لحسن تعمل معايا حركة بايخه ولا حاجه (و بالرغم من كده برضوا عملت كتيييييييير) المهم أحاول أجاوبك على أسألتك .
السرعة القصوى : هى بصراحه كان أخرها 120 بس أنا ما كنتش بزود عن ال80 غير نادرا لأن أصلا بعد كده بيكون الثبات بتاعها ضايع وتحس أنها ممكن تركن على جنب وتفتح الباب إللى جنبك (من الأخر أنزل بالذوق)
العزم : عمرى ما فكرت فى الموضوع ده
الأحصنه : كان فى واحد مره قالى أنها حاجه وستين حصان بس مش متأكد .
المميزات : قطع غيارها تلاقيها عند أى سوبر ماركت - وبتديك فرصه عظيمه للتعرف أكثر على صنايعيه مصر بكافه أشكالهم - تحس أن إللى صمم العربيه دى ما كنش بيصمم عربيه ده كان بيصمم كنبه علشان الناس تقعد عليها فى الشارع ( وبصراحه مريحه جدا ) يعنى هتأخد ثواب بالهبل - تقدر تركنها فى أى حته ما حدش هيشيلها (بس أحتمال لو حطيت كاسيت كويس يتشال)- لو بتحب واحده هتعرف أنها بتحبك لشخصك مش لثروتك - مصر كلها بتحترمها جداااااااااااا.
العيوب : الكبااااااااااااااااااااا لن ( أحد أبرز وأهم العيوب فيها صعب أنك تلاقى 128 مش جايبه كبالن ) - مصر كلها بتفضل القعده عليها يعنى أعمل حسابك كل شويه شنطه وكبوت.
الصيانه : مش فاهم قصدك بصراحه بس تقريبا كده أنت تقصد التصليح لا أحب أطمنك أى صبى ميكانيكى ها يدخل من الكبوت يطلع من الشنطه و يقولك يا باشمهندس هارجعهالك عروسه ( وطبعا إللى بينكسر عمره ما هيتصلح ).
بس طبعا ده رأيى شخصى وعموما هى عربية كوميديه جدا لو ما كنتش من النوع إللى بيتنرفز بسرعة ( ودى بقى إللى بيسموها كوميديا سوداء) اه طبعا نسيت أكتب أهم ميزه فيها أنها بصراحه بتعلمك الصبر
أتمنى أكون قدرت أفيدك بس بصراحه أنت إللى فكرتنى :11:
بس تصدق يا يوسف ( لو تسمحلى أنى أقول يوسف كده من غير ألقاب)
برضه ليها معايا ذكريات جميله جدا و تحس كده أنها عامله زى مصر مش أحسن بلد فى الدنيا بس هى دى بلدك إللى أتربيت وكبرت فيها يعنى بالرغم من كل إللى فات ده برضوا بحبها جدااااااااااااااا
الف شكر يا جماعة بجد تعبتكم معايا طب ايه رأيكم فى الريتمو هى احسن ولا 128
اخوكم يوسف
والله العظيم ياجماعه انتم ظالمين العربيه دى لانها اصيله بجد بس انتو اللى مش واخدين بالكم لان كل واحد جايب عربيه ومش عاوز يصرف عليها قرش صاغ وعاوز يمشى بيها 20 سنه من غير مايصرف عليها قرش احمر ؟؟؟؟؟؟؟؟؟ وطبعا ده كلام ماينفعش
انتى تستنى العربيه لما تقع منك كلها وبعدين تقول ياريتنى ماجبتها
طيب ليه يعنى كده ليه ماتعملش ليها جدول صيانه زيها زى اى عربيه جديده ؟هو الواحد لما بيكون جايب عربيه جديده وليها ضمان مش كل يوم والتانى بيجرى على التوكيل ومش عارف فيها ايه النهارده وحصل معايا ايه وانا ماشى بيها طبعا الكلام ده بالنسبه للجديد فما بالكم بعربيه عمرها مثلا 20 او 25 او 30 سنه مش المفروض يعنى هاتروح لدكتور لو هى راجل بصحته هاتنهد برضو مافيش مانع من شويه مغص او تقلصات او ممكن يتكعبل وهو ماشى فى الشارع وتنكسر رجله وانتم مستكترين عليها كده والله العظيم حرام عليكم وبطلو بخل بقى لو مش قد العربيات بلاش تركبوها ووفرو فلوسكم وشوفو السرفيس والاوتوبيسات هاتعمل فيكم ايه وبعدها ان مبوستو كاوتش الفيات 128 ابقو تعالو قابلونى ؟؟؟ من واحد عنده اجمل 128 فى اسكندريه koko6997604@yahoo.com
:dontudear::dontudear::_Alshmokh08[1]::_Alshmokh08[1]::36_1_37[1]:
ياباشا العربية 128 لو حضرتك لميتها كلها اول متشتريها وعامل حسابك فى 2000 جنية زيادة عن سعر العربية تغيير بييه كل مايمكن تغييرة ,, بجد انت تضمن العربية دى 5 سنيين متوديهاش لميكانيكى الا عشان يربط العفشة زيها زى اى عربية حديثة
انما المشكلة معظم الى بيجيب 128 بيجبها عشان سعرها الرخيص او يتعلم عليها مثلا , انما لا 128 لو اساسيات سليمة تمام ومش عاملة حوادث وبتديها حقها هتاخد منها اداء وسرعة وثبات على الطريق مليون فى المية
انا بسافر بيها من الغردقة للقاهرة رايح جاى ولا عمرها عملتها معايا ولله الحمد (ولاكن كله بحسابة)
يا اساتذه 128 من انسب السيارات للشعب المصرى ( فروق اوزان - دخول ضعيفه) وممكن تلم اى شئ فيها بمنتهى السهوله وبالنسبه لفئنها السعريه فهى نمره 1
الف الف شكر يا جماعة تعبتكم معايا انا فعلا العربية بحترمها جدا وبحبها جدا وكفاية لما بتتروق وتتظبط الناس بتتفرج عليها ومبهورين بيها الناس اتعودت على اشكال البى ام والميرسيدس لكن لما العربية دى بتتروق بيبق لها طعم تانى وشكل تانى
اخوكم يوسف
انا كان معايا 128 موديل 2006
سعة المحرك: 1289
القدرة الحصانية: 62 حصان
العزم: 92 نيوتن\م
السرعة القصوى: 170كم\س
من 0-100: 14.2 ثانية
و الحمد لله بعتها :]:36_6_3[1]::F_eyeb1[1]: