الى الاعضاء و كل من يشكو من الكارونة اليكم تجربتى
انا عربيتى 131 cl موديل 1983 وحدث كسر فى التاج و البنيول داخل الكرونة بسبب بلاعة مفتوحة فى مدينة نصرمش بسبب نقص الزيت لانى بكشف علية هوة و الفتيس مع كل غيار زيت و دة لازم مع اى عربية
وكان بداية المشوار فى التصليح
1-البحث عن حلول اصلاح العيب و تكلفة ومميذات و عيوب كل حل
أ- شراء كرونة استعمال131 فكرة تكلف 2500جنية و الضمان اسبوع تحت التجربة وبعد كدة لو ونت ميعرفكش
ب- تعديل الجرفنسية بالكامل وتعديل عمود الكردان بجرفنسية يبانى وفى الغالب تيوتا فكرة تكلف بالتعديل 1300الى1500جنية
ج- تغيير و اصلاح التاج و البنيول وهم اصل العيب داخل الكارونة ودى فكرة تكلف من 750 الى 1200 جنية حسب الشغل فى الكرونة القديمة
د- شراء جرفنسية شاهيش جديد وتعديل العربية علية ومش عايذ اقول يكلف كام و ان كان اضمن الحلول واريح واحد بالنسبة لل131 اوالشاهين
2- انا قررت الحل التالت لانى مقدرش على الحل الاخير وشفت فشل كتير و تجارب كتيرة مريرة مع ناس تانية فى الحلول الاول و الثانى والسبب
1- بيبان عيب الكرونة ممكن بعد يوم وممكن بعد شهر وفى الغالب بعد اكتر من اسبوع
2- تبتدى رحلة تانية مع البايع علشان تغير الكونة و الجرفنسية البايظ بواحد تانى و غير تكلفة الفك و التركيب على حسابك طبعا
3- تضييع الوقت و حرقة الاعصاب ومفيش ضمان ان الجديد يكون احسن وان الحل نهائى
4- ممكن بعد متتعب من المستعمل و الاستيراد ترجع فى الاخر تصلح الكرونة برضة
المهم ابتدى البحث عن فنى متخصص فى الحكاية دى و عرفت ان فية ورشة فى حدايق القبة متخصصة فى اصلاح الفتيس و الكرونة فقط
رحت و طلع معايا صاحب الورشة الحج حمدى وجرب العربية و اكد ان العيب فى التاج و البنيول
الاصلاح
1- البحث عن التاج و البنيول المناسب للعربية و طبعا الحلم العربي انة يكون اصلى اطالى او المانى
2- فى احسن تقدير الموجود التركى ولو لقيتة بس فية نوع منة محترم
3- بعد موافقة الحج حمدى على نوع قطع الغيار تم تحديد معاد للعمل ( الورشة على طول زحمة جدا وهوة يستاهل بسبب شغلة النظيف )
4- جة عليا الدور و رفعنا العربية و فكينا الجرفنسية من العربية
5- طلب الحج حمدى الكشف على اتجة الجرفنسية عند خرامخصوص هوة وصفة ليا
6- رحط لمكان عبارة عن مصنع خراطة و امكانيات على اعلى مستوى و فعلا استعدلو وظبطو الجرفنسية
7-بعد كدة فك الكارونة فى ورشة الحج حمدى و غسل الكرونة جيدا و تركيب قطع الغيار الجديدة و ظبط الخلوص التاج و البنيول وهى دى الحرفة فى الموضوع كلة (الخلوص)
8- تجميع الجرفنسية فى العربية و التقفيل و حط الزيت للكرونة
9- التجربة مفيش اى صوت
10- تغيير زيت الكرونة بعد 1000كيلو فى الورشة بعد تبصيم التاج و البنيول (علشان الرايش ينذل)
ملاحظاتى عن التجربة
1- هية ارخص حل ممكن (1200جنية بعد المصنعيات و الخراط و خلافة)
2- النيجة مرضية حتى الان (انا بعمل كل شهر 2500كم متوسط و لاصلاح من اكتر من سنة)
3- صوت الكرونة بان بشكل خفيف بعد ستة اشهر و قللت الصوت بمانع الونة من موبيل
4- مع الوقت الصوت نفسة قل جدا
5- على فكرة الصوت الى انا بحكى علية ممكن يحس بية صاحب العربية او ميكا نيكى لانة ضعيف جدا جدا ( مش ونة عالية كل الشارع يسمعة)
وفى الاخر البطل رجع للبطلة وعاشو فى تبات و نبات
اتمنى اكون افتكم وانا مستعد لاى استفسار