الموضوع: مهزلة فى الاسكندرية - تحذير للاسكندرانية

كل يوم احب اكتب الموضوع ده لكن للاسف بارجع متاخر من الشغل ونفسى احذر جميع سائقى المركبات بالاسكندرية
من اول الاسبوع الماضى هناك حملة شديدة جدا جدا بالاسكندرية من رجال المرور لتطبيق القانون الجديد وخاصة مخالفة السير عكس الاتجاه والحملة مستمرة حتى الان
المأساة ان الضابط ورجال الحملة متخفيين الضابط لابس بالطو اسود وواقف فى حته مستخبيه وفى اماكن وشوارع مجهولة نسبياً للسائقين والمهزلة انه مفيش تفاهم خالص
سواق عربية الشغل بتاعى طلع له الضابط فى شارع جانبى وهو لابس البالطو من غير الرتب ولا الكاب وسحب الرخص والاوتوبيس على طول وحرر محضر وحوله الى القسم وقال ان التصالح او دفع المخالفة الفورية جت تعليمات بالغاءها يعنى مفيش تصالح خالص والامر كله للنيابة تقول كلمتها والسواق اتحايل عليه وكل الركاب من الموظفين مفيش تفاهم خالص
وباقى المهزلة فى النيابة ناس محترمين والمدهش ستات محترمات جدا قابضيين عليهم طبعاً جبنا كل الوسايط اللى ممكن تتخيلوها الشرطة متقدرش تعمل حاجة والنيابة قالوا ملناش دعوى النائب العام هو اللى بيقرر فى هذه الحالات ويتم عرض المحاضر المحررة عليه شخصيا وهو اللى يقرر ويدى تعليماته لنيابه المرور وتقريباً كل التعليمات اللى جايه لوكلاء النيابة هى الحبس الاحتياطى لمدة 4 ايام على ذمة التحقيقات لحين العرض على محكمة جنح المرور بعد اليوم الرابع
هو غالباً القاضى بيحكم بغرامة 1001 جنيه ( مش عارف ليه) لكن المهم البهدلة لمدة 4 ايام فى الحجز مع المجرمين واصحاب السوابق ..والراجل سواق الشغل بتاعنا طلع من المحكمة انسان تانى بعد هذه البهدلة وهومريض بالسكر تخيل موظف محترم فى شركة كبيرة محتلرمة يبات مع المجرمين 4 ايام علشان دخل شارع غلط محدش بيمشى فيه اساساً
ايوه هو غلطان لكن هل العقوبة تساوى الجرم المرتكب

ياريت كل الاسكندرانية يخدوا بالهم اليومين دول محدش حمل البهدلة اللى حتحصله ومفيش وسايط والله ورجالة وستات مش فارقة انا من كتر البهدلة اللى حصلت للسواق بقيت اوقف المخالفين فى الشارع وانصحهم فمش معقول واحد محترم يقعد فى الحجز 4 ايام علشان السير عكس الاتجاه
خللى بالك وخليك فى السليم احسن