حبس أول سيدة مصرية لقيادتها السيارة عكس الاتجاه

**speed demon666** · 07-02-2009 06:38 PM

قررت النيابة العامة في مصر حبس أول سيدة مصرية 4 أيام احتياطياً ، وتقديمها إلي محكمة المرور السبت 7 فبراير بتهمة السير عكس الاتجاه وفي حالة سكر.

وكان الرائد أحمد زكي قد ضبط المتهمة نانسي فاروق محمد "28 سنة" تقود سيارتها عكس الاتجاه ، وفي حالة سكر ولا تحمل أي رخص أو بطاقة شخصية، وأدعت أنها سكرتير ثالث بوزارة الخارجية وتبين أنها حاصلة علي بكالوريوس تجارة، بحسب صحف محلية صادرة الجمعة.

وفي وقت سابق ، دعا النائب العام المصري المستشار عبد المجيد محمود إلى تطبيق عقوبات قانون المرور الجديد الذي تم تطبيقه في بداية أغسطس 2008 بكل حزم دون تهاون.

وخص النائب العام في تعليماته لأعضاء النيابة، البند الخاص مخالفات السير عكس اتجاه المرور، والذي جاء فيه ان العقوبة لن تكون بالغرامة المالية فقط وإنما ستصل للحبس لمدة لا تزيد عن ثلاثة سنوات.

تفتكرو الكلام ده صحيح ولا لتبرير حبس سيده لبسوها قضيه سكر و عدم حمل رخص و خلافه

انا واحد من الناس معترض أشد الاعتراض على قرارات الحبس , ممكن لو عايز تحجز العربيه احجزها بس مكونش انا طول عمري مقربتش من السجن و أكون محترم و أتساوى باللي قتل ولا سرق ولا.......
هتقول طب في ناس لو مشيناها فلوس هتفضل تدفع و مش هاممها الفلوس هروح انا رادد عليك و أقولك اعمل نظام النقط .... عند عدد معين من النقط اوقف تجديد الرخصه و ريح دماغك من واحد زي ده

يا جماعه ايه رأيكم في اللي انا بقوله ده

**م.محمد علاء** · 07-02-2009 06:55 PM

انا معاك فى عدم تطبيق الحبس فعلا بس لو فى حالة ان الواقعة كانت مثلا على طريق سريع انا اعتقد ان لازم تكون العقوبة شديده.لان ساعات الواحد بيلاقى عربيه ماشيع على الطريق باليل مخالف عشان اليوترن 100 متر ادام وهو مكسل مثلا

**OlaOsman** · 07-02-2009 06:58 PM

انا عن نفسي مع حكم الحبس و بشدة للي يمشي عكس الاتجاه.. انما طبعا لما يكون ده في طرق رئيسية أو سريعة، مش جانبية، و لو جانبية يبقى لازم يكون فيه يافطة أو إشارة بتقول ان الشارع ده اتجاه واحد او ممنوع الدخول مثلا. يعني حكم الحبس ده للناس اللي بتعرض حياة غيرها للخطر، انما غير كده يبقى استعباط.

**مدحت منيب** · 07-02-2009 07:12 PM

مزيد من تعليمات مضاعفة الضغط على الشعب .. اذا خرج من بيته

كله يزحف على وشه .. و يتلهى على عينه

م الاخر .

**Busquets** · 07-02-2009 07:36 PM

على رأي عمر أديب إرسملي خط وانا أمشي عليه
يقول إن الشارع دا ممنوع ماشي ياعم أنا معك ولو هتحبس أوك لأن غلطان
مش أتفاجيء بظابط طالعلي يقولي رخصك على شارع مفهوش شئ يثبت إنه إتجاه واحد
للأسف الشرطة تستخدم القانون بشكل زبالة
ف الظابط بيلم فلوس ومخلفات على أي حاجة وبسبب وبدون سبب
وكمان الشعب فيه مشكلة
إنه ممكن يبيع أهله عشان ميدفعش الغرامة
يقولك مختدش بالي ولا دانا يادوب بعدل العربية
يعني احنا الحمدلله شعب مبيغلبش من الحجج
عشان كدا محدش هيصدأك فالقسم لو إتمسكت !! حتى لو مظلوم
ربنا يستر
والواحد بقى خايف ينزل من بتو ميرجعش

**bee** · 07-02-2009 08:28 PM

المشاركة الأصلية كتبت بواسطة OlaOsman

انا عن نفسي مع حكم الحبس و بشدة للي يمشي عكس الاتجاه.. انما طبعا لما يكون ده في طرق رئيسية أو سريعة، مش جانبية، و لو جانبية يبقى لازم يكون فيه يافطة أو إشارة بتقول ان الشارع ده اتجاه واحد او ممنوع الدخول مثلا. يعني حكم الحبس ده للناس اللي بتعرض حياة غيرها للخطر، انما غير كده يبقى استعباط.

+10000000000000000000000000000

**ehab** · 07-02-2009 08:43 PM

مبالغ فيه بشدة و انا عاجبني نظام النقط يا ريت لو يطبق فعلا بس الاهم من دا هو ان شوارعنا تكون مؤهلة لتطبيق القانون دا و تنفيذه يكون مضبوط .

**M.Osman** · 07-02-2009 09:46 PM

انا موافق على الحبس لو على طريق سريع ...

**ahit** · 07-02-2009 09:51 PM

كنت الول مع قرار الحبس و لكن بعد اللى سمعتو عن اللى بيحصل للمسجونين على ذمة قضية سير عكس الإتجاة فغيرت رأى بصراحة.
غالبية الشوارع بدون يفط إرشادية و كملن يعملو كماين و مصايد للعربيات !!!! دا شىء غريب جداً.
كمان بيتحبسو مع الشمامين و الحرامية و القتله و النصابين و مسجلين خطر !!!
و لو أى عسكرى أو أمين شرطة حب يغلس يلبسك تهمة سير عكس الإتجاة عشان يقبض عليك !!!!!!!
و العربية تتحجز عليها و تطلع تلاقيها منهوبة و مسروقة من كل حاجة !!!
لا بد من وجود ضوابط و أسس لتنفيذ هذا القانون و إلا نص الشعب هايكون معملو قواضى و يبقى سوابق و طبعاً فيه اللى يستاهل و فيه اللى مظلوم !!!
و ربنا يسترها معانا جميعاً