موضوع مهم لماذا نكرة اصحاب المعارض

**wesam_salom** · 08-02-2009 04:14 PM

المشاركة الأصلية كتبت بواسطة samohaa1000

بص يا باشا انت غلطان فى الموضعين
1-ازاى تشترى سيارة وتتطلع مقلوبة مكشفتش عليها لية وبعدين ممكن دة يحصل من تاجر او من شخص عادى
2-الناس بتوع طنطا دول جولك منين طب ما فى اساليب كثيرة فى البيع كويسة بعيد عن ان حد يزايد عليك وبعدين مبلغ الفين جنية دة بسيط جدااا فى الى بيحصل احمد ربنا وبعدين ماهو لازم يكسب امال يبيع ويشترى ببلاش
3-لازم يعمل كدة اى صاحب نشاط زيو زى اى حد فى اى مهنة بحلى بضاعتو مش شايف فى كدة جريمة
4-انا معاك ان معظم المهنة صنيعية ولاكن دول بيبيعوا فى الشارع والجراجات وسوق الجمعة ولاكن فى معارض كبيرة واصحابة ناس كتير محترمة دول الى انا بقصدهم مش مكتب تحت السلم تقولى دول تجار
اولا لازم يكون معرض كبير وعندو اوراق مثل السجل التجارى ورخصة نشاط و(جواب مرور)ودى بالذات مهمة جدااا لانو دة الى بخاف على نفسة وسمعتة

انا غلطان فعلا وانا بقولك على اللى غلطت فيه

انا غلطان انى مكشفتش على العربيه كويس بس انا كان عندى شويه ثقه وكمان كان فيه وسيط سمسار كنت بعتبره معرفه وبرده هياخد عمولته بس يقول الحق وهو اللى لبسنى فيها لانها كانت عامله 12000 كيلو ولسه بأكياسها ومش اى حد يهرشها يعنى كتير شافوها ومعرفوهاش
وزى ما قلت ان فيه واحد محترم هو اللى قاللى على الموضوع ده وكان هو اللى بايعهالهم وكان تاجر زيهم بس قاللى قبل ما اسجلك لازم اقولك علشان ربنا يباركلى مش مهم المكسب وهو اللى وقف البيعه واتأدبت ب 1000 جنيه ورجعت بس ده واحد من ضمن 10 نصابين

2- طبعا من حقهم يكسبوا بس مش ينصبوا يعنى يقولى السعر كذا وعمولتنا كذا مش ينصبوا علينا
وبعدين هما عمولتهم مش صغيره
يعنى خدوا منى 250 جنيه ومن المشترى الف جنيه
ده اسمه نصب مالوش اسم تانى

وبعدين انا من طنطا علشان كده اتعاملت معاهم

3 اى حد يحلى بضاعته ده الصح بس لو فيها عيب خطير او مهم يقول عليه
لانه لو انكره او داراه يبقى كده هياخد فلوس حرام
وهما مبتفرقش معاكم ياكلوا حرام

4- وده المهم ان انا مكنتش بتعامل مع معرض تحت السلم
انا كنت بتعامل مع معرض من اكبر المعارض عنده مالا يقل عن 20 عربيه تمنهم فوق المليون جنيه واقل حاجه عنده لانوس وكان بيبيع لى الاكسيل ومحسسنى انه مكسوف لانه بيتعامل فى العجل القديم(الله يرحم بعد كده لما سألت عنه عرفت انه كان نقاش)

وطبعا معرض كبير وفخم وكل اللى انت بتقول عليه
لان دى عده النصب

انا مش عاوزك تزعل منى بس انت فتحت موضوع هيجيبلك كلام كتير عن نصابين كتير

منهم عدد قليل محترم
بس صعب انك تلاقيه وتعرفه

يعنى انا هقولك على حاجه خدها حكمه
العربيه اللى فى المعرض
90 فى الميه منهم فيه مشاكل
عاوز تشترى من المعرض اشترى من صاحب العربيه اللى الرخصه بأسمه وصاحب المعرض يجيبه ويتفق على عمولته

متهيألى انت كده عرفت الناس بتكره المعارض ليه ولسه فيه ناس كتير هترد بس انت متزعلش انت اللى سألت ومحدش وجه ليك اى كلمه احنا بنتكلم عن دروس اتعلمناها بفلوس

اخوك وسام

**amir** · 08-02-2009 05:02 PM

المشاركة الأصلية كتبت بواسطة mobitek

انت متزعلش انت اللى سألت ومحدش وجه ليك اى كلمه احنا بنتكلم عن دروس اتعلمناها بفلوس

اخوك وسام

بالظبط كده
و من واقع الفلوس اللي خسرناها علشان شويه عالم #ّ!@ّ# و من ارض الواقع معنديش اي استعداد اتعامل مع تاجر سيارات سواء بيع او شراء

**pro_samir** · 09-02-2009 03:00 AM

اكيد مش كلهم وحشين فى كدة وفى كدة

الموقف الزبالة اللى حصل معايا منهم كالأتى

كنت هشترى عربية 128 من كام سنة وكنت مجمع فلوسها بالعافية

المهم واحد المفروض انة معرفة صاحبى معرفنى علية ، وقالى قدامة عربية واحد وكيل نيابة ولا مانا فاكر كان اية ، المهم العربية بقى فابريكة ومفيهاش الهوا وهوا اللى كان شاريهالة اصلا وعارف اصلها وفصلها

المهم كل ما احدد معاة موعد يصمم انة يكون بالليل ويقولى هتفرق اية بالنهار من بالليل يعنى ، وبيتكلم بتلقائية برضو كانى عبيط يعنى

واحسن حاجة مع العالم دى تعمل انك عبيط بجد علشان ياخدو راحتهم فى الكلام قدامك

اخر ما زهقت قلتلة اوك وروحتلة اتفرج ، خدنا العربية وروحنا عند ميكانيكى بقى ال اية هيبصلى عليها

المهم جربت العربية فى المنطقة اللى عند الميكانيكى وبعدين قلتلة الدبرياج زى الزفت قالى هخلية يظبطة دلوقتى ، جة الميكانيكى بص علية قالة هوا كدة على الأخر

قالة يعنى الموضوع من عندنا يعنى ، قالة ايوا يا بية

طبعا بيتكلم معاة على اساس ان اللى واقف هيشترى دة هندى مش فاهم حاجة ، والعربية كانت عايزة ديسك اصلا

المهم جربت العربية وقلتلة ماشى معقولة وهجيب والدى ونيجى نتفرج عليها بكرا ان شاء الله وخدت منة موعد بالنهار

جة بقى والدى اتفرج عليها وكان الأتى

أولا القايم اليمين معلم في البوية بتاعتة مكان الشدادة بتاع الزرجينة ، يعنى العربية تقريبا كانت مقووسة ومعدولة على الزرجينة

الدواخل اللى فى الشنطة والحتة اللى رابط فيها المساعدين فيها بارومة فظيعة لدرجة ان والدى كان بيقطع الصاج بإيدة

بارومة فى أرضية الشنطة

بعض النظر عن الموتور اصلا لأنة اتفرج من غير ما ندورها اساسا

دة اللى فاكرة من اللى كان فى العربية

وما أكثر المواقف مع اصحابى و مع قرايبى

**maka** · 09-02-2009 02:25 PM

المشاركة الأصلية كتبت بواسطة ahmed1981

الخلاصة أن هناك أزمة أمانة منتشرة في مجتمعنا بالكامل تجار ومستهلكين
وأصبح الإنسان الأمين الذي يرضى بالحلال حتى لو كان قليلاً إنسان شبه منعدم الوجود

بمعنى أننا أصبحنا في آخر الزمان

عَنْ اَبِي هُرَيْرَةَ، قَالَ بَيْنَمَا النَّبِيُّ صلى الله عليه وسلم فِي مَجْلِسٍ يُحَدِّثُ الْقَوْمَ جَاءَهُ اَعْرَابِيٌّ فَقَالَ مَتَى السَّاعَةُ فَمَضَى رَسُولُ اللَّهِ صلى الله عليه وسلم يُحَدِّثُ، فَقَالَ بَعْضُ الْقَوْمِ سَمِعَ مَا قَالَ، فَكَرِهَ مَا قَالَ، وَقَالَ بَعْضُهُمْ بَلْ لَمْ يَسْمَعْ، حَتَّى اِذَا قَضَى حَدِيثَهُ قَالَ ‏"‏ اَيْنَ ـ اُرَاهُ ـ السَّائِلُ عَنِ السَّاعَةِ ‏"‏‏.‏ قَالَ هَا اَنَا يَا رَسُولَ اللَّهِ‏.‏ قَالَ ‏"‏ فَاِذَا ضُيِّعَتِ الأَمَانَةُ فَانْتَظِرِ السَّاعَةَ ‏"‏‏.‏ قَالَ كَيْفَ اِضَاعَتُهَا قَالَ ‏"‏ اِذَا وُسِّدَ الأَمْرُ اِلَى غَيْرِ اَهْلِهِ فَانْتَظِرِ السَّاعَةَ ‏"‏‏رواه البخاري.‏

عَنْ حُذَيْفَةَ، قَالَ حَدَّثَنَا رَسُولُ اللَّهِ صلى الله عليه وسلم حَدِيثَيْنِ قَدْ رَاَيْتُ اَحَدَهُمَا وَاَنَا اَنْتَظِرُ الآخَرَ حَدَّثَنَا ‏"‏ اَنَّ الأَمَانَةَ نَزَلَتْ فِي جِذْرِ قُلُوبِ الرِّجَالِ ثُمَّ نَزَلَ الْقُرْانُ فَعَلِمُوا مِنَ الْقُرْانِ وَعَلِمُوا مِنَ السُّنَّةِ ‏"‏ ‏.‏ ثُمَّ حَدَّثَنَا عَنْ رَفْعِ الأَمَانَةِ قَالَ ‏"‏ يَنَامُ الرَّجُلُ النَّوْمَةَ فَتُقْبَضُ الأَمَانَةُ مِنْ قَلْبِهِ فَيَظَلُّ اَثَرُهَا مِثْلَ الْوَكْتِ ثُمَّ يَنَامُ النَّوْمَةَ فَتُقْبَضُ الأَمَانَةُ مِنْ قَلْبِهِ فَيَظَلُّ اَثَرُهَا مِثْلَ الْمَجْلِ كَجَمْرٍ دَحْرَجْتَهُ عَلَى رِجْلِكَ فَنَفِطَ فَتَرَاهُ مُنْتَبِرًا وَلَيْسَ فِيهِ شَىْءٌ - ثُمَّ اَخَذَ حَصًى فَدَحْرَجَهُ عَلَى رِجْلِهِ - فَيُصْبِحُ النَّاسُ يَتَبَايَعُونَ لاَ يَكَادُ اَحَدٌ يُؤَدِّي الأَمَانَةَ حَتَّى يُقَالَ اِنَّ فِي بَنِي فُلاَنٍ رَجُلاً اَمِينًا ‏.‏ حَتَّى يُقَالَ لِلرَّجُلِ مَا اَجْلَدَهُ مَا اَظْرَفَهُ مَا اَعْقَلَهُ وَمَا فِي قَلْبِهِ مِثْقَالُ حَبَّةٍ مِنْ خَرْدَلٍ مِنْ اِيمَانٍ ....‏" ‏رواه مسلم

الله يفتح عليك يا باشمهندس احمد

فعلا مفيش حد بقى راضى

انا لسه واحد صاحبى امبارح بيقولى عيب الناس فى مصر

عاوزة تشترى اى حاجة بالرخيص وتبعها بالغالى

**Hussein_Ramdan** · 09-02-2009 02:30 PM

انا اول عربية اشترتها ماذا 323
اضحك عليا فيها واشترتها ب 24 الف وبعتها بعديها بشهر 19 الف
عشان كان الماتور مفوت
وكان فى بارومة فى العربية
والعفشة كان مبهدله
طبعا اضحك عليا عشان انا كونت ساعتها 19 سنة
وكونت متسرع
لكن دلوقتى لما اجى اشترى حاجة بيبقا ناقص اخوش انام جوة العربية ولما صاحب العربية بتكلم معايا اقولو اية يااباشا هونا هشترى حاجة بخمسة جينة دى حاجة بالوفات
ولازم اقلب برحتى واخد واحد معايا مرة واتنين وتلاتة

**amir** · 09-02-2009 02:36 PM

خلاصه الموضوع
لا لسماسره العربيات و تجار المستعمل
لا بيع ولا شراء

**wesam_salom** · 09-02-2009 04:00 PM

المشاركة الأصلية كتبت بواسطة amir

خلاصه الموضوع
لا لسماسره العربيات و تجار المستعمل
لا بيع ولا شراء

لاء طبعا مش هتقدر تبعد عنهم

بس خد بالك كويس وانت بتعاملهم

وافتكر اسلوبهم وحرص منهم

من الاخر
عد صوابعك قبل وبعد ما تسلم عليهم

واتعامل معاه على انه كداب الى ان يثبت العكس

ومع ان فيهم ناس محترمين

بس متديش اى حد فيهم الامان لانك بتتعامل مع وسط الوحش فيه اكتر من الحلو بكتير

يعنى احتمال انك تلاقى واحد منهم محترم زى كده ما تلاقى العنقاء والخل الوفى وسيجاره كليوباترا مش منفسه