تجربة التسارع في النيو أكسنت

**firstknight216** · 10-02-2009 02:35 AM

السادة الزملاء .... العوافي
اولا happy valentine وانتم طييبين
طبعا انا اتشرفت من وقت قريب اني بقيت هيونداوي بالسيارة اللذيذة جداً النيو اكسنت
بدون ما اطول عليكم
انا جربت محاولة التسارع بالنيو اكسنت
احب الفت نظر الزملاء اني مش خبير لكن انت بتكلم من وجهة نظري المتواضعة
اولا: مناخ التجربة
1 - السيارة نيو اكسنت اتوماتيك
2 - الوقود المستخدم: بنزين 95
3 - زيت 10000 توتال ( من مركز الخدمة والله مش بخل
4 - الاطارات: كومهو مملؤه بغاز نتروجين
5 - على الطرق المصرية بتعاتنا وتجربة شخصية
وكانت ملاحظاتي كالآتي:
1- السيارة ممكن تجيب بيها اي سرعة انت عايزة
سحب عالي نظراً لقوة الموتور
2 - لحد سرعة 120 السيارة انت لا تشعر بها بالمرة حتى في الملفّات.... نقّول الملفات الحادة ممكن 110 وده حد الامان
3- السرعة على الطريق الطوالي 140 ممتازة وايضا لا تشعر بشئ
4- بعد الـ 140 هنا بيكون الوضع خطر ايها الزملاء وده اللي انا عايز اتكلم عنه بالبلدي الثبات مش موجود لو عربية مرت بجوارك يحدث ازاحة للسيارة من مكانها
لو سرعة 160 نقول السيارة يدوب لمسة الارض وده طبعا كان واضح ان العربية بتعوم على الطريق
اختصار للقول ان انت ممكن تجيب 180 و 200 بالعربية
لكن الخلاصة ان فوق الـ 140 ده انتحاااااااااااار لأن السيارة في المرحلة ديه خارج السيطرة
وطبعا في انتظار تعليق السادة الزملاء والخبراء في المنتدى
واخيراً ..... اقعدوا بالعافية

**buzzy** · 10-02-2009 05:12 AM

شكراً ليك جداً

و يا ريت تقولي بشكل عام العربية اخبارها ايه

عشان انا بقارن بنها وبين الريو

و مش عارفة ارسى لحد دلوقتي

**حماده المصري** · 10-02-2009 11:36 AM

بصراحه انت بتتكلم صح جدا عن موضوع الثبات
مع اختلاف امكانيات السواق

انا في عربيتي ببهدل الدنيا حتى في الملفات بس العربيه بتدخل عايمه وتطلع عايمه

بس طبعا في مواقف بتبين فروق العربيات

انا عربيتي مانيوال

كوبري اكتوبر بالليل بجري مع m40 وهو طبعا طلعه وانا يادوب وراه بسنه من مدينه نصر لحد نزله ميدان الشهيد بتبقى يمين وفي الشمال تكمل للمنهدسين طبعا مكان النزله لو كملت شمال بتلاقي ملف متخلف جدا جدا والله العظيم البي ام دخلت 180 وطلعت من الملف ولسه في نفس حارتها ولا اتهزت
وانا اتبدلت وراه داخل في اول حاجه طلعت اخر حاجه قبل الرصيف
وربنا ستر

عموما النيو اكسنت بظروفها ممكن طريق نضيف تجيب عليه 200 وانت مش قلقان وممكن طريق زي الصحراوي ده فعلا بيخوف بعد 160
وحد في الاعتبار الهوا لو معاك او ضدك بتفرق في الثبات

وعامه لو حطيت جنط 15 او 16 هتفرق معاك جدا جدا
ومن رايي بيحافظ شويه على المساعدين عشان معظم المطبات الجنط الي بيشيلها مش المساعد

وانا مجنط 15 وفارقه معايا جدا

والعيب الوحيد الي شايفه في العربيه انها بتتنطط شويه خصوصا في ناس ورا

**حماده المصري** · 10-02-2009 11:38 AM

بالنسبه للمقارنه بينها وبين الريو

وضعيه الركوب في السياره بالنسبه للاكسنت اريح من الريو

العفشه هيا هيا وفي ناس بتقول ان الريو انعم عشان مساعدين غاز على زيت مش زيت بس

قطع الفيار هيا هيا مع العلم ان توكيل هيونداي بيبعها اغلى
تيل نيو اكسنت 330 تقريبا والريو 280
وانا علطول بجيب قطع غيار الريو عشان ارخص وهيا هيا بالضبط

تسارع النيو اكسنت مانول 1.6 من 9 ل 10 ثواني
الريو تقريبا مفيش منها 1.6 دلوقتي

بس النيو اكسنت فعلا عربيه كويسه جدا بالنسبه للعربيات الصغيره وتحط راسها براس عربيات اكبر منها

وثباتها فعلا صحابي راكبين كورولا القديمه ويارس ولانسر والتلالته شهدوا لثبات النيو اكسنت افضل من 3 عربيات دول خصوصا بعد الجنط

**buzzy** · 10-02-2009 11:55 AM

المشاركة الأصلية كتبت بواسطة حماده المصري

بالنسبه للمقارنه بينها وبين الريو

وضعيه الركوب في السياره بالنسبه للاكسنت اريح من الريو

العفشه هيا هيا وفي ناس بتقول ان الريو انعم عشان مساعدين غاز على زيت مش زيت بس

قطع الفيار هيا هيا مع العلم ان توكيل هيونداي بيبعها اغلى
تيل نيو اكسنت 330 تقريبا والريو 280
وانا علطول بجيب قطع غيار الريو عشان ارخص وهيا هيا بالضبط

تسارع النيو اكسنت مانول 1.6 من 9 ل 10 ثواني
الريو تقريبا مفيش منها 1.6 دلوقتي

بس النيو اكسنت فعلا عربيه كويسه جدا بالنسبه للعربيات الصغيره وتحط راسها براس عربيات اكبر منها

وثباتها فعلا صحابي راكبين كورولا القديمه ويارس ولانسر والتلالته شهدوا لثبات النيو اكسنت افضل من 3 عربيات دول خصوصا بعد الجنط

شكراً لاهتمامك وردك

طب معلش..

أصل الريو 2009 بيقولوا فيها Air bag للسواق

+ ميزة التوكيل

و انا عجباني الأكسنت 2009 أوي

رأي حضرتك اضحي عشان التوكيل وال air bag

ولا اخليني في الأكسنت أحسن؟؟

**حماده المصري** · 10-02-2009 12:09 PM

بص اي توكيل في الجمهوريه كلها بيفهم في العربيات بتاعته شيء لا محاله فيه الموضوع كله موضوع حظ وزحمه ومزاج المهندس
المهندس لو مزبطه وعندك عيب زوايا ممكن يفقع تقرير يغيرولك فيه العربيه وشخصيا انا توكيل ابو رواش مع انه زحمه بس صيانته 10/10 احيانا في عيوب بتطلع منهم بيصلحوها على حسابهم بس مشكلتهم الاساسيه الزحمه الي مالهاش مثيل الي بيخليهم يكروتوا الناس
ليا صديق جاب e280 زيرووووو وجابت مساعد في اقل من شهر
بسبب نقره كلنا بدون استثناء بناخدها على 120 ومحلصش حاجه
وهو خدها على 40 وجابت مساعد وفوووق كده خنااااقااااات بالهبل مع التوكيل ومش عايزين يعتبروه عيب صناعه
========
بالنسبه للريو ف انت تسالهم في التوكيل عن موضوع المساعدين هل هي غاز فقط ولا غاز على زيت زي الخيار التاني يبقى هتبقى انعم من النيو اكسنت لذا انصح بهااا
-----------
بالنسبه لوضعيه الركوب الكلام ده جبته من سايت مشهور بيجرب العربيات اركب الاتنين شوف مين ارييح
========
الريو الي فيها ايرباج دي كميه محدوده بس مش كل الريو كده
========
بالنسبه للاختيار ده يرجع لك
ريو وتاخد ايرباج وكم ميزه قصاد موتور اضعف من الاكسنت
او اكسنت وتخسر الايرباج وكم ميزه
عند بيع العربيه موضوع الكماليات مش بيفرق اوي في السعر هو فقط بيشجع المشتري

انا رايي لو الريو زي النيو اكسنت في المساعدين هيبقوا زي بعض في العفشه بالضبط يبقى تختار الي شكلها يحلى لك
لو الريو غاز على زيت يبقى اختارها هتبقى انعم في المطبات
ومتهيالي الريو اوطى سنه من الاكسنت لذا ممكن تبقى مش بتتنطط زي الاكسنت

**حماده المصري** · 10-02-2009 12:13 PM

لو العربيه هتبقى عائليه

بلاش منهم الاتنين وخليك في السيراتو او النترا

واي حاجه تاني احنا كلنا تحت امرك ياباشا

**buzzy** · 10-02-2009 12:31 PM

المشاركة الأصلية كتبت بواسطة حماده المصري

لو العربيه هتبقى عائليه

بلاش منهم الاتنين وخليك في السيراتو او النترا

واي حاجه تاني احنا كلنا تحت امرك ياباشا

بجد ربنا يخليك أفدت وزيادة

و هي مش عائلية و كمان انا بنت يعني استعمالي مش تقيل

بس أكيد في ناس هتركب معايا و منهم والدي ووالدتي

يعني لازم تبقى مريحة..

بالنسبة للأكسنت سمعت أن الجنط بيظبطها شوية..

و ربنا يسهل ..انا مستنية يمكن حاجة تحصل في الأسعار

**histfox_2** · 10-02-2009 05:44 PM

الأستاذ حمادة المصرى ..

تصحيح بسيط لمعلومة حضرتك ..

"الريو الي فيها ايرباج دي كميه محدوده بس مش كل الريو كده"

الكلام ده اتغير فى 2009 وأصبح كله كده (ايرباج للسواق)

**حماده المصري** · 10-02-2009 05:49 PM

هو مدام كده يبقى هات السيراتو افضل بمليوون مره

الاكسنت صغييره وكمان مش هتستحمل اوزان كبيره

هي العربيه معموله لاستخدام المدينه فقط لاغير والمشاوير البسيطه

والناس بتستخدمها للجري والسفر ويحمله عليها بس برضو بتادي وزي الفل

انت مدام ممكن يبقى معاك الاهل يبقى هات السيراتو واهو بالمره انت برضو مستفيد في التوكيل الي انت مرتاحله
ومعاك عربيه اكبر وعائليه وناااااعمه جدااا مش ناشفه زي الاكسنت
وبرضو جنطها هتبقى زي الفل ويزيد الثبات معاك كمان بالاضافه العربيه ناعمه بعد الجنط مش هتبقى ناشفه قوي ولا هيتعب العفشه

انما النيو اكسنت انا رايي انها حراام تتجاب الا لشباب صغيرين في الوزن والجنط فعلا بيزبطها بس هي كده كده مش مريحه لاهل تماما
هي اخرها تبقى مع شاب تبقى فعلا حلوه وصغيره ليه