مشكلة زيت البيتل

**amo400** · 10-02-2009 03:50 PM

اوعى الزيت الى بتحطه فى البيتل يزيد عن الحد المعقول الميكانيكى قالى العربية بتاخد 3 كيلو الا ربع
لما غيرت الزيت فى البنزينة حط 3 و ربع و من هنا بدأت مأساتى لمدة 3 ايام

الزيت الزيادة طبعا عرفت بعدين الكلام ده...... بيطلع من مكان البوجيهات بيعملها عازل و تقطع ده اول واجب طبعا ما فيش كهربا و ولا سحب و لا اى حجاة و ما طلعتش اى كوبرى و لا مطلع و كهرتها جدا المهم سايستها لحد ما وصلت عابدين لقيت عم صلااح الميكانيكى بتاع الفيات كان بيصلحلى ال 27 بتعتى قبل البيتل المهم قالى الماتور خلاص بيودع و نزلت عليا الخبر كالصاعقة و البوجيهات بتجيب زيت طقم شنبر يا حلو قولتله لا الزيت ذيادة سكت و قالى طبعا مش هايطلع نفسة غلطان لا الزيت كويس و الماتور خلاص و عمال يتفق معايا كانه هايعملها عمرة زبون بقى مشيت بالعربية طبعا بعد ما نضف البوجيهات من الزيت و برده لسة الزيت زيادة شوية و تبهدلت تانى و قطعت كان ليلة الاحد و جمال قافل الاحد قعدت فى البيت الاحد كله مال تحركتش و انا زعلان جدا جبت ميكانيكى البيت يوم اجازته برده كان بيصلحى ال 27 بص بقى يا ايمن الكاربيراتير ده منفسن العربية و بيرش بنزين فى كل حتع و هوا الى مخليها مبتسحبش و لقى صلا ماربطش الاسبراتير منه لله المهم قولتله انا عايزها توصلنى بس لحد مصر القديمة عند جمال و صحيت الساعة 10 صباحا يوم الاثنين و انا متنرفز جدا و هاروح اشوط جمال بجد كنت هامل حاجة واحدة ركبلى الكارتير بتاعى القديم وشكرا على التعامل و مش هاجى تانى عندك
...............................
واليكم مشهد اللقاء عند الوصول الى جمال
...................................
شكلى متنرفز جدا صباح الخير
جمال : اركن كويس
ايمن : مش هاركن كده حلو
جمال : هات شاى لايمن
ايمن : العربية ....انا بجد........
جمال و هوا بيبتسم و بفتح العربية : العربية بتقطع ليه
ايمن : استنى اقولك فيه ايه و انا متنرفز جدا
جمال : انا هاشوف
جمال للصناعيه : فك الكاربراتيرلا و ابعت هات 4 بوجيهات فك الكطاربيراتير كله و خير طقم كاوتش جواه و ربطه تمام و غير البوجيهات و عمل كراسى للبوجيهات بتتاعمل للمواتير الى خفت بس انا عشان الزيت الزيادة طبعا حد يقولى طيب ما نقصوش ليه مش عارف المهم وقالى تمام قولته لا اطلع جرب لوحدك و روح مشوار بعيد قالى مع انى ما بجربش عربيات حد بس حاضر على شرط نفطر الاول و كانوا حضروا الفطار و فطرنا ونسيت كل الزعل واحنا بنضرب الفول و طلع جرب و رجع قالى ارفا العربية من قدام و عمل شوية ربط فى الفرامل و رفع من وراه و كنت بشرب شاى ودورها من لمسة والله قولتله ايه كده دات بتهرج قالى امال بكدب عليك ديه لو مادريتش ابطل الصنعة و ضحكنا و بقت العربية الحمد لله تمام و ماكنش عايز ياخد فلوس خالص بس انا اديته 20جنيه بالعافية

**ابوهاشم** · 10-02-2009 06:31 PM

استاذ ايمن
الحمد لله انك اطمنت على عربيتك وطلعت بخير
بس ياريت بعد كده ماتتعاملش مع اى ميكانيكى غير البيتلز تحت اى ظرف لان العربيه دى مش بيفهم فيها اى ميكانيكى لاى سياره تانيه
مهما كان محترف وللاسف انه مابيقولش انا مش فاهم فيها لازم يفتيلك
ويعمل ابو العريف
ثانيا / فى حاجه مهمه جدا جدا
زيت البيتلز 2ك ونصف بالظبط وبالجرام كمان مابيزيد عن كده ابدا ولو زودت العربيه بتجيب زيت وتلاقى كل ماتقف تركن العربيه تحتها زيت
ولو راجعت مواضيعنا القديمه هتلاقى الكلام ده مذكور اكتر من مره منى ومن باقى الاعضاء وهتلاقينا كلنا متفقين على كده
وحتى انت ان شاء الله لما تغير المره اللى جايه حط 2 ونص وبعد شويه خد مقاس الزيت هتلاقى الزيت على العلامه التانيه بالظبط
وتقريبا معظم الاعضاء اتفقو على زيت شل اكس 100
وبرضو خلى بالك انك لما بتروح تغير زيت لازم الراجل اللى بيغير يفتيلك ويقولك لا دى بتاخد 3ك ولا 3 الا ربع مالكش دعوه بكلامهم
زى بتوع الكاوتش كل لما اروح ازود الكاوتش لازم بتاع الكاوتش يفضل يجادل معايا لما اقوله 22 ورا و20 قدام ويقوللى ماينفعش وكدا قليل
وفى الاخر اقوله لو سمحت اعمل اللى بقولك عليه وخلاص
عربياتنا الجميله ليها موصفات كتير مختلفه عن اى سياره
النظام الميكانيكى ونظام الجر ونظام العفشه ونظام التبريد وحتى الشكل العام
علشان كده انا دايما بسميها العربيه المختلفه

**amo400** · 10-02-2009 07:11 PM

شكرا للمعلومة القيمة و ربنا يخليك لينا

**ahit** · 10-02-2009 10:41 PM

السلام عليكم و رحمة الله و بركاته

معلش يا أيمن باشا على اللى حصل و ربنا يسترها معاك و معانا.
طبعا كلام الأستاذ/ هاشم ... سليم 100%
و المهم إن جمال الميكانيكى ظبط المسائل و بقت تمام و الحمد لله , و أنا كنت عندو إمبارح و حكالى كل الحوار.
بس نصيحة إسأل كتير قبل ما تعمل حاجة فى البيتل لأن ناس كتير مش فاهمة و بتفتى زى بتوع الزيت و بعض الميكانيكية.