اية رأيكم فى البلطجة الى بتحصل دلوقتى

**samohaa1000** · 11-02-2009 12:19 AM

عندنا نوعين من البلطجة من ظباط المرور وموضوع الحزام الامان والخ طيب انا ليا سؤال هل احنا محتاجين حزام الامان داخل البلد هو اصلا بنمشى اكتر من سرعة 20كم فى الساعة وبعدين ناهيك بقى عن اى تلاكيك واى حاجة بس ياخدوا فلوس وخلاص والله انا بسميها بلطجة على الناس اية رأيكم انا كنت بتكلم مع ظابط صحبى والله وقالى ان احنا عندنا تارجت ولازم نحققه كل يوم بأى طريقة ولا قانون المرور الجديد وشنطة الاسعاف الوهمية والمثلث والحجج الفارغة الى بيشغلوا بيها الشعب وخلاص مين الصح ومين الغلط
ولا سواقين التكاتك والميكروباص الى اصبحوا فى حالة احتلال اجبارى علينا وغير الحوادث الى بيعملوها وطب احنا هتلاقية منين ولا منين والشوارع المكسرة والى بيتدفع عليها ملايين بتروح فين منعرفش اية رأيكم

**dode2002** · 11-02-2009 12:49 AM

ايه يا عم سامح هدي نفسك
ده انت من نرفزتك عمال جايب موضوع من الشرق وموضوع من الغرب هدي نفسك شويه
هذه هي مصر

**شاهين - بنز** · 11-02-2009 12:56 AM

معاك حق 100% زي اللجان إللي بتقبى في عز الزحمة والواحد يدوب جايب أول غيار ويقولك حزام
مش كفاية الزحمة والقرف حيخقنقونا كمان بالحزام

**magyver** · 11-02-2009 01:30 AM

معاك حق والله وفكرتني بموقف حصلي

مرة كنت واقف ولسة بدور العربية ومااشي والله لسة العربية ماخدت التاني لقيت واحد طلعلي كدة مش عارف والله طلعلي منين هههههههه
ويقلي رخصك علشان الحزام
تقلة اية بقي
حسبي الله ونعم الوكيل

**mo7a_mo7a** · 11-02-2009 01:34 AM

هي مش بلطجة ولا تلاكيك
بس هو النظام كله مهلهل ومحتاج يعاد ترتيبه
لكن انا مع حزام الامان لانه مش اجباري عندنا بس ده في العالم كله بغض النظر عن السرعة حتي لو ماشي 5 كيلو في الساعة بس احنا شعب متعودش علي النظام وثقافتنا صفر
فالحكاية جديدة علينا
لكن حكاية الترجت دي لو بجد تبقي مصيبة
بس هي مش منطقية اوي هم ممكن يكونو بيحاولوا يزودو مكافئاتهم يعوضو بيها ضعف المرتبات
والحل برضوا في اعادة ترتيب النظام
وكفاية بقي ظباط الشرطة اللي جايبين 50% والفشلة والجهلة احنا محتاجين ناس متعلمة وقسم خاص للمرور في كلية الشرطة وليست وظيفة والسلام

**zeyad1810** · 11-02-2009 03:34 AM

القانون حلو ومايزعلش بس لو يتطبق صح وعلى كل الناس
انما اكتر حاجة خانقانى موضوع الحبس للسير عكس الاتجاة الواحد دلوقت بيبقى خارج بعربيتة من البيت ومش ضامن اذا كان هينام فى سريرة وللا فى الحبس مع المجرمين والله انا بقيت طول مانا ماشى فى مكان جديد اول مرة اروحة اققف ادور على يفط على اول الشارع قبل مادخلة مالاقيش حاجة اقوم مستنى شوية لحد ما كام عربية يمشوا اودامى عاشان ابقى متطمن