أنا كنت قولت قبل كده إن إحنا بدأنا الحملة بدري شويه ويمكن شويتين كمان . يا إخوانا لازم نعرف كويس إن آثار الأزمة الإقتصادية العالمية على مصر لسه لم يأتي بعد ولن يأتي قبل شهر 7 أو 8 من هذا العام . واضح جدآ إن إحنا مستعجلييييييييييييييين أوييييييييييييييييي . يا جماعه إحنا بنتكلم في سلعه غالية مش رخيصة . مش شويه جبن وألبان عند بقال أو تاجر كبير هيخاف عليهم لاحسن يفسدوا فيضطر يبعهم ويقول خسارة قريبة ولا مكسب بعيد . إحنا بنقول (خلوها تصدي وموديلها يعدي) ولازم نحط ألف خط تحت تصدي دي . العربية ( أي عربية ) مش هتصدي في تلات أربع شهور . وبرضه نحط مليون خط تحت كلمة موديلها يعدي وموديلها يعدي دي معناها إن موديل 2009 هو اللي يعدي وييجي علية موديل 2010 لإن موديل 2008 طبعا عدى وفلت بمبيعاته واللي أتبقي منه ولم يباع ده مكسب للحملة لكن الحملة ماكانتش تقصد إنها تكسبه . لأ لازم نكزن واضحين مع أنفسنا ونعرف إن المكسب ده جه للحملة (بالصدفة) لكن الشغل الحقيقي والهدف الحقيقي للحملة هو موديلات 2009 . لازم نفهم الأول معني الكلام اللي إحنا إختارناه علشان يكون شعار لحملتنا (خلوها تصدي وموديلها يعدي ) . سؤال؟ هي فين العربيات اللي صدت دي وهي فين الموديلات اللي عدت دي ؟ في حد يقدر يجاوبني على السؤال ده . طبعا مفيش لإن لسه بدريييييييييييييييييييي أوييييييييييييييييي على الكلام ده . وعموما مجرد إن رئيس مجلس الوزراء يطلع ويقول الكلام ده فأنا عن نفسي شايف إن ده مكسب للحملة ومكسب كبيييير كمان ودليل على إن الحملة ماشية صح وتأثيرها واضح وقوي لحد دلوقتي . المفروض نصبر على الأقل لحد ما موديلات 2010 تنزل علشان في الوقت ده بس هتكون موديلات 2009 فعلا عديت زي ما إحنا بنقول ( خلوها تصدي وموديلها يعدي )