اضحك مع الحرامي قليل البخت
السلام عليكم
كنت مستني واحد صاحبي في العربية و اتأخر عليا ربع ساعة و لما قابلني لقيته بيضحك و قال أحكي لك اتأخرت ليه، أصلهم مسكوا حرامي في شارعنا. قلت له و إيه يضحك في دي؟ قال أحكي لك
لما اتصلت بيا نزلت و مشيت شوية سمعت صوت واحدة بتصرخ في الشارع. بصيت لقيتها واحدة جارتنا و بتشاور ناحية واحد بيجري خطف شنطتها و دخل في شارع جانبي. الشارع ده يا سيدي هو اللي فيه بيتنا. المهم مافيش حد في الشارع ساعتها عشان يمسكه.
شوية ضحك عالماشي: الشارع مع أنه طويل لكن مالوش إلا مخرجين يعني يعتبر شارع سد
الضحك الجامد بقى: مع صويت الست و هتافات الناس من بعيد "حرامي، حرامي" و مع حظ الحرامي التعيس. مين يطلع للحرامي ساعتها؟؟؟؟
6-8 شباب خارجين من صالة الجيم اللي في نفس الشارع :C_laugh[1]: طالعين بعرقهم و كلهم أطوال و أجسام. واحد منهم مسك الحرامي من القميص و رفعه عن الأرض بإيد واحدة. و هاتك يا ضرب لما وشه بقى كله دم
المهم جابوا حبال و ربطوا إيديه في بعض من الخلف و ربطوا رجليه في بعض و ربطوه على بعضه في شجرة و هاتك يا ضرب و شتايم كمان مرة. و الناس بتتفرج من البلكونات، و راجل عجوز معدي قعد يضرب فيه و يشتم كان منظر مسخرة بصراحة
الشنطة رجعت للست و قالوا لها تجيب أخوها أو جوزها و يبلغوا القسم و سابوه مربوط لحد ما عربية الشرطة وصلت و أخدوه. :S_thum1[1]: