موقف طريف....و قولت له عيب عليك دا أنا من نايل موتورز

السلام عليكم... :D
كنت بتكلم النهاردة انا وواحد صاحبى فى العربيات
و جاءت سيرة البيجو الــ..405
و بقوله ان الايرانى طلعت جر خلفى

لقيته استغرب كده و قال لى طيب ما طول عمر البيجو الـ..405 جر خلفى

و عبثا أحاول أقنعه ( من قرائتى فى المنتدى هنا ) انها جر امامى و الايرانى هى اللى جر خلفى
و هو يقول لى أبدا
و الأنقح انه بيقولى ان واحد قريبه معاه 405 مو 96
و اتصل بيه و قال له انها جر خلفى


شكلى هيبقى وحش جدا لو طلعت البيجو 405 ( مش الايرانى)
جر خلفى

عايز بأه لو سمحتم اجابة قاطعة وواضحة و صريحة
البيجو 405 ( الفربساوى و المصرى مش الايرانى)
جر أمامى و لا خلفى
عشان احنا متراهنين على ان اللى غلط التانى هيسيحله فى الكلية و لن يعتد برأيه بعد الأن

منتظركم..

http://www.automobilemag.com/am/1991...fications.html

طبعا أمامى يا كريم :)

هيه..هيه..هيه :D :D :D

و الله لأروق الواد بس لما أشوفه...


شكرا يا ميمو باشا يا رافع راسى :D

ابتدى سيح له من ديلوقتى على ضمانتى ولو حصل حاجة تعالا سيح لى انا على المنتدى :lol:

البيجو ال 405 الفرنساوى جر امامى فقط،

كان فيه منها موديل دفع رباعى إسمه T16 واتعمل منه فى فرنسا 1046 سيارة فقط بالعدد ولا اظن ان اى منها شرفنا فى مصر

لكن كل ال جى إل والجى آر والجى إل إكس والإس أر كله كله دفع امامى

وهتطمن اكتر واكتر لما زمايلنا هنا على السايت اللى غيروا كبالن للبيجو 405 يؤكدوا كلامى

ده مين الزميل العزيز ده يا كريم :twisted:

ده واحد معايا فى سكشن خامسة و الله لأوريهولك يا معاذ أول ما الدراسة تبدأ

شكرا جزيلا يا بشمهندس سبعاوى... :D

ده شكله هيدربوا عليه تشريح

فكرة حلوة يا استاذ حسام.. :D :D

امااااااااااااااااااااااا اااااااامي نزل منها جر رباعي اه انما خلفي مفيش غير الايراني بس.
لما يجي قدامك بالعربيه خليه يطلع امريكاني و هو حيشوف العار بنفسه :D

ما هو أنا متفق معاه انى هعمل بيها امريكانى فى الكلية قدام كل أصحابنا
و هتبقى حاجة ميه ميه..... :D :D :D

العربيه بيجو 405 الفرنساوى والمصرى والبارس جميعهم جر أمامى بلا أى نسبه شك

خلي بالك لأن الرجل ممكن يكون متلخبط و قصده على الـ 504 اللي هيه فعلا دفع خلفي :mrgreen:

جر امامى يا باشا و ابقى خلية يطلع امريكانى زى ما الأخ حازم قال و صورها فيديو و تكون مركز على العجل الأمامى

اقتباس:

---

ما هو أنا متفق معاه انى هعمل بيها امريكانى فى الكلية قدام كل أصحابنا
و هتبقى حاجة ميه ميه..... :D :D :D

---

حيبقي موقف جامد ابقي قولي حيحصل امتي و انا آجي اشوفه و هو بينحرج :lol: :lol: بس اكد عليه 405 مش 504 علشان ما يتحججش.
يا خوفي يا كيمو تطلع من الكام عربيه اللي كانو نازلين جر رباعي ساعتها مش عارف مين اللي حيتحرج :mrgreen: :oops: :oops: :oops:

أمااااااااااااااااااامى على ضمانتى العربيه دى أبويا كان عايز يشتريها لكن أما عرف انها أمامى غير رأيه و مصر كلها عارفه إن ال 405 أمامى بكل موديلاتها GL و GR و SR و GLX زى ما سبعاوى باشا قال .. :lol: :lol: :lol:

الـ 405 جر امامي طبعاً مش دفع خلفي.

فى واحد صاحبى قاللى ان ال405 الاستيشن هى اللى جر خلفى... و الايرانى هى الات جر الاستيشن على بودى السيدان... مش عارف اذا كان الكلام دة صح ولا لا

تبقى وحشة اوى لو طلع صاحبك اللى حيطلع امريكانى معاه ستيشن و طلع صاحبى كلامة صح :oops: :oops: :oops:

MMamdouh

405 الإستيشن جر أمامى ولا خلاف على ذلك

لا.....احنا كنا بنتكلم غلى الـ....405 مش 504

و كمان كن بنقول السيدان مش الاستيشن...


و هروح دورلها على فيديو فى youtube
عشن بعهوله على ما أقابله


شكر لهتممكم جميعا

في نقطه احب اوضحها لما يكون موتور العربيه محطوط بالعرض وبيدي العجل الامامي عن طريق الكبالن فده بيبقي اسمه دفع امامي او جر خلفي front wheel drive وده حال اغلب العربيات حاليا وتشمل البيجو405 الفرنساوي
اما لو كان الموتور محطوط بطول العربيه وبينقل الحركه للعجل الخلفي عن طريق الكورونه فده يبقي اسمه دفع خلفي او جر امامي rear wheel drive وده حال ال131 و132 والبيجو ال504
انا طبعا فاهم ان انتو تقصدو ان 405 دفع امامي بس هي برضه في الواقع جر خلفي وغالبا صاحبك عارفها كده :roll:

ايه الكلام الغريب ده محدش بيقول كده خالص
العربيه سواء كانت دفع امامى او جر امامى معناها ان العجلتين الاماميتين هما اللى بيتنقل لهم الحركه
والعكس صحيح

الكلام ده لا غريب ولا حاجه ومش ذنبي ان محدش بيقول كده خالص دي مساله تعود مش اكتر انما الصح صح والغلط غلط
لو سيادتك متابع اي برنامج للسيارات علي جير وان او حتي اوتو كروس الي كان بيجي علي القناه التانيه بعد المسلسل هتعرف ان ال بي ام كان بيتقال عليها من فئه الجر الامامي (وعلي فكره كان مشهور اوي صاحب البي ام ده في الاوتو كروس كانت فئه تالته 2 باب)

بالنسبة لتعريف مكان المحرك والجر فأنا شايف لبس بسيط فى اللى انتم كاتبينه

عندما يتم تعريف التصميم العام للسيارة يتم تعريف مكان المحرك ومكان عجلات الجر

فمثلا البيجو 505 والشاهين واللادا تسمى محرك امامى دفع خلفى front engine rear drive (وليس دفع امامى جر خلفى كما ذكر البعض فهذة التسمية غير موجودة)

أما البيجو 405 والميتوسبيشى لانسر والفيات تيمبرا ومعظم السيارات الحديثة فتسمى :محرك امامى بجر أمامى front engine front drive

وسيارات الدفع الرباعى تسمى front engine 4 wheel drive

وهناك تصميمين آخرين غير شائعين ، احدهما هو المحرك الاوسط مع الدفع الخلفى mid engine rear drive وهذا التصميم مرتبط بالسيارات الرياضية ذات المقعدين وهو افضل تصميم من وجهة النظر الميكانيكية لكن يعيبه انه يضيع مساحة السيارة بالكامل لخدمة مكان المحرك وأمثلته البورشة والفيرارى

وتصميم آخر غير شائع وتقريبا انقرض من تصميمات السيارات الملاكى على كل كوكب الأرض وهو المحرك الخلفى مع الدفع الخلفى rear engine rear drive وهو التصميم المستخدم فى سيارات البيتلز القديمة والسيات 133 والفيات 126 والسكودا 120 ، وان كان هذا التصميم لا يزال مستخدم فى كل الأتوبيسات تقريبا

بالنسب لكلمة دفع او جر فكلاهما ترجمة لكمة drive الإنجليزية لكن الفرق بينهما جاء لتمايز الفعلين فى اللغة العربية ، فعندما نؤثر على شى بقوة ما من خلفه لنجعلة يتحرك فنحن ندفعه (مثال العامل الذى يحرك عربة يد محملة بالطوب والاسمنت هو يدفعها ولا يصح ان نقول يجرها لأن العربة امامه) لكن لو انعكست الآية واصبح المؤثر موجود امام الشئ المطلوب تحريكه( مثال الحصان والعربة الكارو) يصبح الامر جرا وليس دفعا، وعلى ذلك عندما نتكلم عن سيارة تتحرك بالعجلات الخلفية نقول عنها سيارة ذات دفع خلفى حيث ان العجلات الخلفية تدفعها ولا تجرها، اما عندما نتحدث عن سيارة تعمل بالعجلات الامامية فنقول سيارة ذات جر امامى حيث ان العجلات الامامية تجر السيارة ولا تدفعها

وبالتالى فإن الدفع او الجر هى مسألة لغوية صرفة واحدهما فقط هى التى تصلح لكل سيارة ولا علاقة لها بتصميم المحرك وإنما مكان العجلات المحركة للسيارة

يا سلام عليك 10\10

وتصميم آخر غير شائع وتقريبا انقرض من تصميمات السيارات الملاكى على كل كوكب الأرض وهو المحرك الخلفى مع الدفع الخلفى rear engine rear drive وهو التصميم المستخدم فى سيارات البيتلز القديمة والسيات 133 والفيات 126 والسكودا 120 ، وان كان هذا التصميم لا يزال مستخدم فى كل الأتوبيسات تقريبا



بس تعديل صغير كل عربيات لمبو جتي الان محرك خلفي فيراري انزو محرك خلفي كريرا جي تي محرك خلفي
اغلب العربيات ذات الاداء العالي دفع خلفي لقرب المحرك من عجلات الدفع :) والله شرحك ممتاز يا بشمهندس سبعاوي :)

إقتباس من تيربو 911 :

"بس تعديل صغير كل عربيات لمبو جتي الان محرك خلفي فيراري انزو محرك خلفي كريرا جي تي محرك خلفي
اغلب العربيات ذات الاداء العالي دفع خلفي لقرب المحرك من عجلات الدفع والله شرحك ممتاز يا بشمهندس سبعاوي"

انتهى الإقتباس

معلش اسمح لى اوضح ان انا فرقت فى رسالتى بين نوعين من انواع تصميم السيارات، واحد فيهم هو المحرك المتوسط mid engine وده اللى حضرتك تقصده وبالفعل يكون المحرك خلف السائق لكن أمام العجلات الخلفية وكما ذكرت فى رسالتى السابقة فهذا هو افضل تصميم من وجهة النظر الميكانيكية لكنه يضيع مساحة السيارة لصالح المنضومة الميكانيكية، وهذا هو الذى تنتمى اليه فئة الفيرارى واللامبورجينى

اما المحرك الخلفى المعنى بكلمة rear engine فهو المحرك الذى يقع خلف السائق وخلف العجلات الخلفية فى نهاية السيارة من الخلف مثل ال سيات 133 والفولكس بيتلز القيمة وهو تصميم يعتبر تقليعة تهدف الى تقليل التكاليف ابتكرها مصمم فولكس فاجن وقلدتها بعض السيارات ثم مات مع الوقت لكثرة مشاكله وهذا التصميم المنقرض فى الملاكى ولكنه باقى فى الأتوبيسات

ارجو ان اكون قد اوضحت الفرق بين الmid engine و ال rear engine

ابقى خليه يعمل دريفت بيها وهو يعرف مين اللى صح :D :D

احنا كان معنا بيجو 405 قديمة موديل 94 وكانت من غير تكيف ولا ازجاج كهرباء وكانت دفع افامي

ومعنا حاليا موديل 2002 سيارة والدتي وفيها ازجاج كهرباء وتكييف وبرضة دفع امامي

وانا كنت هشتري الايراني بس ناس كلها قالت مش حلوة بقولهم دفع خلفي احسن من اللي معانا قالولي ايراني ومش حلوة

بفكر في اسبرانزا علشان خلفي :D

انا معايا بيجو 405 فرنساوى و هى 100% جر امامى حتى بالمناسبة لسة مغير الكوبلن اليمين الاسبوع اللى فات

اقتباس:

---

بفكر في اسبرانزا علشان خلفي

---

مش خلفي شوف حاجه غيرها :D

اقتباس:

---

وتصميم آخر غير شائع وتقريبا انقرض من تصميمات السيارات الملاكى على كل كوكب الأرض وهو المحرك الخلفى مع الدفع الخلفى rear engine rear drive وهو التصميم المستخدم فى سيارات البيتلز القديمة والسيات 133 والفيات 126 والسكودا 120 ، وان كان هذا التصميم لا يزال مستخدم فى كل الأتوبيسات تقريبا

---

you missed Toyota MR2 :wink: and most of the Porches still have rear engines