الموضوع: ليه شاهين ؟؟ { موضوع للمناقشة }

دلوقت انا من ملاك الشاهين من اكتر من 5 سنين والحمد لله العربية مريحاني ومقتنع بيها – وده مش موضوعنا ! – انا عامل الموضوع ده مش عشان نقول عربية حلوة او وحشة او مميزاتها وعيوبها .

انا بفكّر ليه موديل الشاهين نزل اساسا في تركيا يعني هما حابين الـ 131 ليه عملوا تعديلات – بسيطة كانت او كتيرة عليها ؟ هل كان ليها تأثير في الأداء – وقتها – او في الثبات aerodynamics ؟

انا متخيل – حسب معلوماتي المتواضعة عن موديل 1998 في الشاهين في مصر انها اختلفت عن ما قبلها – من موديل 1984 في الموتور اللي بقى احدث و 1400 و 1600 سي سي – اللي قبله كان بتاع الـ 131 قديم و 1300 سي سي –1600 برضه ، والشكل الفوانيس قدام بقت ارفع بسيط طلعت لفوق شوية بتاع 2 سم والشبكة اتغيرت

من موديل 2003 التابلوه اتغير بقى اعلى من النص وبقى الكاسيت عالي فيه وشكل المفاتيح والتكييف والنور بقى دراع multifunction ومرايات الجنب بقت البومبيه والاكصدام بقى زي الدوجان فيه فوانيس الشبورة

من موديل 2005 بقى نظام حقن الوقود احادي النقطة single point fuel injection بدل الكربراتير – اللي كان ثابت كفاءة – طبعا التطور مطلوب اللي اعتقد قلل استهلاك البنزين – بس ماليش تجربة بالأرقام – وبرضه شكل الطاسات البلاستيك اتغير بسيط وبقى فيه لوجو النسر – اللي معرفش مصدره او دلالته ؟؟؟ - وطبعا اللوجو قدام وورا وشكل الدريكسيون اختلف بسيط بقى مكعبر شوية :) ومقابض الابواب من جوة بقت طويله وبتستوعب الايد جواها والبابين اللي ورا بقى – من جوه من تحت – فيهم شبكة كده مش عارف لزمتها ايه؟

المهم انا ذكرت التفاصيل دي عشان في ناس بتقول ان الشاهين هي هي من ساعة مانزلت – وده كلام مش صحيح – لأن التغير مش لازم يبقى بالشكل الخارجي بس – ده بالرغم اني طبعا كان نفسي يكون في تغير شوية في الشكل

نرجع لموضوعنا :) الجماعة بتوع شركة توفاش لما جم يعدلوا ع 131 كبرو الشنطة شوية لما علوها بتاع 10 سم يبقى غيروا الشنطة – سؤال : ليه ؟؟؟ - نكمل غيروا شكل الفوانيس ورا والاكصدام يعني خامته وشكله شوية – البيبان هي هي – قوايم وسقف – الكبوت اتغير بقى اعلى من النص والرفارف قدام برضه شكل الفوانيس وفوانيس الاشارة والشبكة والاكصدام الامامي كمان اتغيرو

هل سابوا العفشة هي هي والموتور وكل حاجة جوه وتحت زي ماهي – عايز اعرف

طيب ايه سبب التغييرات اللي عملوها ومردودها على الاداء ؟

يعني ليه ما صنّعوش الـ 131 زي ما هي زي مصنع النصر ما بيعمل؟

طب ليه كان اللوجو بتاعها زمان – في مصر – الاول علم مصر بعد كده حرف الـ T بتاع توفاش – من امتى مش عارف بالتحديد – بعد كده النسر – ايه هو النسر ده وبيرمز لايه؟

سؤال كمان هما عملوا الشاهين 1300 والدوجان 1600 – هل في فروق جوهرية ما بين الاتنين؟ - اعتقد انهم نفس الشكل فرق الكماليات طب ليه موديلين نفس الشكل يبقوا بإسمين مختلفين ماكانوا قالوا شاهين عادة وشاهين فل اوبشن؟؟

استفسارات كتير وحاجات بتدور في دماغي ونفسي الاقي مناقشة مفيدة واجابات للحاجات دي وتفاعل من ملاكها ومحبيها

شكرا لكل اللي شارك
بس لسه في نقط محدش تطرق ليها