مهزله حفله تامر بيه حسنى !!!
شائت الظروف والاقدار انى اقوم بتغطيه فعاليات اسبوع شباب الجامعات اللى نظمته جامعه المنصوره الاسبوع ده وكان نهايته امس الاربعاء وكانت كل حاجه ماشيه تمام وفيه تعاون جميل من الناس المسئولين عن المهرجان معانا ومع طاقم العمل اللى جاى معايا من القاهره وكان من المفترض ان يكون حفل ختام المهرجان امس باقامه حفله للفنان الروش صاحب القلب الحنون تامر بيه حسنى .. وكان من المقرر اقامتها الساعه 8 مساء فى استاد جامعه المنصوره وطبعا مطلوب منى انى اخد حوالى 10 الى 15 دقيقه من الحفله لاضافتها الى التغطيه الاعلاميه للمهرجان .. والساعه 8 بالضبط كنا قدام الاستاد انا والطاقم اللى معايا وحدث ولاحرج ... مشاحنات وخناقات واصابات لاحصر لها بين الشباب اللى عاوز يدخل وبين الامن المركزى اللى واقف على الباب ولما دخلنا جوه لقيت الاستاد كله مليان عن اخره واستمر انتظارنا للمطرب النحنوح لمه تقارب ساعه ونصف وكل ده الامور كانت عاديه ومافيش اى حاجه تنبىء ان الوضع هايخرج عن السيطره ... الى ان ظهر المطرب فهاجت جماهير الشباب وتدافعوا بشكل غريب الى ارض الاستاد وحدثت تحرشات وخناقات رهيبه بين الشباب والبنات علشان يقربوا من المنصه اللى بيغنى عليها المطرب المذكور وحدث اغماءات للكثير من الفتيات ودخول لعربيات الاسعاف حتى يخيل للى بيشوف الموقف انه فى غزه من كتر عربيات الاسعاف اللى دخلت ارض الملعب واصوات الصراخ والعويل اختلطت مع صوت المطرب النحنوح اللى رفض الاستمرار فى الغناء وخاف على نفسه وجرى من الملعب على عربيته ومنها الى خارج الجامعه
اللى يغيظ فى الموضوع مدى تفاهه الشباب والشابات اللى المفروض انهم هيبقوا اباء وامهات المستقبل وهيكون منهم اللى ممكن يمسك مناصب قياديه .. يعنى والله اذا طلب من الناس اللى راحت الحفله دى انها تشارك فى ندوه دينيه او مؤتمر لدعم الناس الفقراء ولا المحتاجين مش هاييجى واحد على عشره من العدد اللى كان موجود منهم .. الى هذا الحد وصلنا الى التفاهه والسطحيه ؟