نفسي أطير في السما زي الطيور كده بالظبط و أرفرف بجناحاتي و أتمايل مع الهوا..
نفسي أروح عند الشجر العتيق اللي في شوارع الزمالك وجاردن سيتي و اسألهم عن أيام زمان و يحكوا لي و اسرح معاهم..
نفسي أقضي يومين لوحدي على جزيرة ما اسمعش فيهم غير صوت البحر و الطيور و ألعب معاهم و مع السمك في المية و أقضي الليل لوحدي أبص في السما ع القمر و النجوم و انام وسط كل ده و انا مش خايفة..
نفسي أشوف حوت ع الحقيقة و خصوصا لما بيرش نافورة مية من ضهره.. عايزة أكون قريبة منه أوي ساعتها..
نفسي أعيش وقت الديناصورات و العب معاهم زي طمطم بتاع الكارتون اللي كان بييجي زمان..
نفسي في حاجات كتير بس صعب بل مستحيل تتحقق في الدنيا.. بس ان شاء الله تتحقق في الجنة.. كل شئ ممكن في الجنة.. كل شئ متاحة في الجنة.. طيب ما تيجوا نحلم بالجنة.. يا ترى نفسنا في ايه في الجنة؟ أي حاجة و كل حاجة.. تعالوا نحلم بالجنة و ما نحطش سقف لأحلامنا.