النهاردة حصل معايا موقف بايخ, عاوز اعرف رايكم فيه, و تعملوا ايه لو كنتم مكانى. الموقف ده حقيقى مش زى بتوع بايو :D
ماشى فى امان الله فى شارع عبد العزيز ال سعود فى المنيل, بدور على مكان اركن علشان اروح الكلية
لقيت مكان مقفول عليه بعربية, ركنت على جنب و نزلت زقيت العربية, ولاحظت ان فى ست فى العقد الخامس من عمرها سايقة عربية ريتمو وقفت قريب من المكان ده. قمت قلتلها حضرتك انا بركن هنا.
يدوب بركب العربية, و ببص فى المراية لقيتها بتركن برده فى المكان ده :shock: .
نزلت, و سيبت السايس يكلمها, و لما لقيت مفيش فايدة دار بينا هذا الحوار
انا (المغلوب على امرى :x ): حضرتك انا قلت لحضرتك انلى بركن هنا, و ميصحش الكلام ده
العجوز الشريرة : ماليش دعوة, انا ساكنة فى الشارع ده, و بعدين انا ست
انا: بعد اذن حضرتك عندك اماكن كتير انا مليش دعوة بالموضوع ده و انا اللى زقيت العربية
العجوز: مليش دعوة انا ركنت, دور ليك انت على مكان تانى, خلاص كده
انا: على فكرة حضرتك ده قلة احترام
العجوز: انت هتغلط و لا ايه
انا: حضرتك لولا ان اهلى ربونى, و ان حضرتك فى سن جدتى كان يبقى فى تصرف تانى (بحب اوى فى سن جدتى فى المواقف دى)
العجوز: تتلفظ بالفاظ نابية
انا: باين جدا فرق التربية بينى و بينك
بعد كده مشيت و انا شايط, و نفسى اخنقها او ادوسها او اعمل اى حاجة. ركنت بعيد, و انا فى طريقى للكلية شفتها فى وشى
انا: بقى ده اللى هتعلميه لاحفادك, هتقوليلهم يعملوا زيك كده
العجوز: انا مش هرد عليك , بعد اما سمعتنى ابشع الالفاظ :(
انا: اكيد مش هتردى, هتقولى ايه يعنى, اللى زيك لازم وشه يبقى فى الارض من الكسفة
العجوز: بتقولى يا جزمة
انا: كل واحد بيسمع حسب تربيته, و الظاهر ان دى الكلمات اللى انت متعودة عليها
العجوز: اعادة الفصل الاول بتاع الشتايم تانى, مع بعض الاضافات
الناس قعدت تتفرج عليها, و سيبتها و مشيت.
يا ترى بقى اللى عملته ده صح؟
لو كان حد مكانى كان ممكن يعمل ايه؟
مشكلتى فى السواقة او ما يخصها, ان لو حد كسر على, زنق على , بعتبره ثأر و لازم اخده :evil: .
بس اظن يعنى انها تاخد الركنة دى قلة زوق منها و قلة تربية بجد