الموضوع: يا صيادلة المنتدى.. هو صحيح الصيدليات كلها هاتقفل؟

الحكومة ما بيهمهاش أي حد
وبتعمل اللي هي عاوزاه.. ولا أكننا من الجالية المصرية

يا استاذ r0xer متضايقش نفسك انا مقدره موقف حضرتك جدا وفهمه انت عايز تقول ايه وحسيت بايه
هو كل واحد بيدافع عن موقفه
ويا رب ما يحوجنا لحد

المشاركة الأصلية كتبت بواسطة midnightman_74

هو دة الكلام المظبوط
الضريبة على الدخل مفروض تتطبق على كل فئات الشعب لان احنا كلنا عايشين مع بعض وبنستفيد زى بعض من الدعم على البنزين وخلافة ودة كلام مايزعلش حد وروح شوف الامريكان بيدفعوا كام والانجليز
كان المفروض ان اخوانا المثقفون الصيادلة يتفهوا الوضع دة ولو لهم طلبات او تعديلات لنسب الضرائب يبقى من خلال القنوات الشرعية زى مجلس الشعب والنقابة
المشكلة ان الناس بتبص للضرايب على انها فلوس ضايعة عليها ومسروقة
هو طبعا فى فساد ودة شىء واضح
بس لازم تبقى شايف النصف الاخر وهو ان الضرايب بتروح للدعم ومرتبات الموظفين فى الحكومة اخويا واخوك ورصف الطرق والتعليم والصحة

احنا متفقين قبل كدة ان فى فساد بس دة مش معناة ان احنا نتهرب من الضرايب
كل واحد فينا المفروض يبدا بنفسة وبعدين نطالب الحكومة بالاصلاح

عفوا انا مش بنتهرب من الضرايب
احنا كان فيه اتفاقيه مع الضرايب واتلغت
واحنا بنكالب بيها
لأنهم لغوها باثر رجعي 3 سنين ورا

دي المشكله ... يعني مش بنتهرب من الضرايب ولا حاجه

بس لازم تبقى شايف النصف الاخر وهو ان الضرايب بتروح للدعم ومرتبات الموظفين فى الحكومة اخويا واخوك ورصف الطرق والتعليم والصحة

مين قال لحضرتك ان الضرايب بيتعمل بيها الكلام دة هو حضرتك فاكر ان احنا عايشيين في دولة بجد

دعم ايه اللي على العيش اللي كله مسامير وزباله والناس بتموت في طوابيره

طرق ايه اللي معظمها خربان متكسر ؟؟؟

تعليم ايه اللي اصبح كل يوم سيئ الى اسوء ؟؟؟

صحه اية كفاية فضايح اكياس الدم الملوثه وانابيب الأكسجين اللي فيها كلور وفضيحه أطفال اسكندرية اللي دخلو المستشفى وهم عندهم سكر خرجوا وهم عندهم فيرس سي ده غير بهدله المصريين في مستشفيات الحكومة

الضرايب دي يا سيدي الفاضل عشان جيش الزلموكات بتاع السادة الوزراء والتابعين وفللهم اللي في مارينا

الضرايب دي لزيادة أعداد ظباط الأمن المركزي اللي بقى جيش لوحده في البلد لقمع المصريين

فاكرين جراج رمسيس اللي اتكلف 25 مليون جنية وامرت جهات سياديه بهدمه وتسويتة بالأرض لصعوبة تأمينه في حاله مرور اي شخصيه سياديه مش ده برضه اتبنى بالضرايب

اقولك ايه ولا ايه ولا ايه خلي الطابق مستورررررر

ممكن اطرح مثال بسيط ينطبق على نسبة كبيرة من صيدليات القاهرة، دى صيدلية فى امبابة

- مبيعاتها فى اليوم 3000 بحد اقصى، و ده رقم كبير على كتير من صيدلات الأرياف
- يبقى فى الشهر هيبيع ب 90000
- لو فرضنا انه هيعمل اكبر هامش ربح محدد للدواء، اللى هو 15%، مع ان اغلب الأدوية هامش ربحها مش اكتر من 10%
- يبقى صافى ربحه فى الشهر 13500
- بيدفع 4500 مرتبات ل 2 دكاترة صيادلة و 4 عمال فقط على الأقل غير شغله هو و ابنه فى الصيدلية و لازم العدد ده كله علشان اغلب المبيعات عبارة عن باكو فوار و بربع جنيه اسبرين و الخ الخ، يعنى محتاج عمالة كثيرة لمبيعات قليلة القيمة.
- بيدفع كهرباء و مياه و ايجار حوالى 2000 جنيه
- بيدفع حوالى 2500 جنيه ضرائب فى الشهر حسب الاتفاقية اللى عاوزين يلغوها
- هنفرض انه بيتسرق منه على الأقل 500 جنيه فى الشهر

يبقى دخله هو و ابنه فى الشهر حوالى 4000 جنيه، مش هتناقش الدخل ده كويس ولا وحش، كل واحد ادرى بحاله، بس ايه رأيكم؟ عايش فى يغمة ولازم نضاعف عليه المصاريف و الضرائب؟

الصيدليات الشيك الكبيرة اللى بتبيع البرفانات و لعب الأطفال و أغلب مبيعاتها روشتات نسبة ضئيلة جدا من ال 45 الف صيدلية اللى منتشرين فى مصر.