استاذ شنورى المشاكس
كل تقديرى لخبرتك ورؤيتك فى الحياة اللى حصلت عليها من خبرات كتير ، بس مش ده اللى قصدته بالسؤال العقدة !!
حسب كلامك ان فلان مبيفهمش غير موسيقى روك ، أروح مطلع اسطوانة الروك واسمعهاله ، والتانى مبيفهمش غير الخبط والرزع بتاع الميتال ، أروح مشغله اسطوانة الميتال ، والآخر مبيفهمش غير الشعبى المبتذل ، أروح مشغله أسطوانة الشعبى المبتذل مع توصية بتعلية الصوت عالآخر !!!!
رغم انها طريقة فعالة عن تجاربك المختلفة ، الا انى شايف ان هويتك الحقيقية بتندثر شيئاً فشيئاً وتتلاشى لتتكون مكانها ما يسمى بالشخصية العامة ذات المفهوم الجمعى ، اللى زيها زى مليون حد زيها وتشوفها فى كل حتة وعلى كل مستوى .
بعامل الناس بشخصيتى وما اتكلت على الله فى اختياره ، وزى ماتكون ، ساعات بخسر وساعات ربنا بيوفقنى ويجيب لى حقى .
موقف ياشنورى مفيهوش أى حاجة من اللى انت قلت عليها تماما ويتسم بالغباء الاجتماعى الشديد قمت بيه من كام سنة مع 6 دكاترة بالعميد بتاعهم ، لم اتنازل عما رأيته حق وكرامة وعاملتهم بحزم وشدة ووضعت فصلى من العمل فى كفة وحقى وكرامتى فى كفة ، ولولا دعم ربنا لموقفى مكنش عدى على خير والحمد لله جالى حقى من غير ما أغير نفسى ولا اركب اسطوانة رئيسك فى العمل بيتعامل ازاى .
السؤال هو ازاى الناس اللى مش عوزة تكلم كل واحد بطريقته وتتعامل بطبيعتها ، ازاى تفضل على ما هى عليه وفى نفس الوقت تنال ماتريد ؟ ازاى نخلى ولادنا ليهم شخصية ويعاملوا الناس من غير مايتلونوا فى اليوم بميت لون.
يمكن فى المجتمعات الغربية فيه نظام ومنطق بيحكم الأمور الحياتية المعتادة وهو غالباً بيكون الحكم بين الناس فى أمورهم العامة ، لكن حينما يتلاشى هذا النظام والمنطق المشترك ، كل واحد بيخلق لنفسه نظام ومنطق خاص واللى عاجبه بقه ، وفى المقابل بتعم الفوضى.
المفضلات