اخر أسعار قطع غيار ميجان 2005 , 2006
ازيكم يا شباب وحشتوني ( طب والله العظيم وحشتوني )
بما انني نويت انشاء الله اجيب ميجان 2005 قلت لازم أعرف كل حاجة عن العربيه دي وبعد مركبتها وسقتها وقرييييييت كتييييير عنها قلت لازم أعرف كل حاجة عن قطع غيارها ومع ثقتي الشديدة في كلام المنتدى لكن برضو التأكيد واجب متعرفش ايه اللي حصل في الدنيا ( مش عارف ليه انا رغاي كدا :3_3_102[1]: )
المهم يا معلمين وانا راجع النهارده من الكليه رحت كتبت لستة كدا وقلت أروح أسأل على أسعارها في التوكيل ( الي هوا في العبور )
بسسسسس
رحت يا معلم :fdsa:
مكان جميل وشيك ومعاملة راقية جدا
واديتو الورقة وهي كالتالي بالأسعار الي كتبهالي
تيل فرامل أمامي 500
تيل فرامل خلفي 450
بطارية vaganta تقريبا بــ 700
طنابيير أمامية 640
المقص الأمامي 750 * 2 يعني الجوز بــ 1500
جوز مساعدين أمامي 700 * 2
علبة دركسيون كاملة 1950
بارات دركسيون فقط 400 * 2
طقم بوجيهات كامل 30 * 4
موبينة بوجيهات 500
طرمبة بنزين 1800
فتيس كامل (ودي المفاجئة) كاتبلي 28700 مش عارف الكلام دا صح والا هوا يقصد 2870
وطقم سيور (الي هوا بتاع الماكينة والدنمو والتكيف ) 550
ودا كان الجزء الخاص بـ mechanical
بالنسبة للـ body
بص ياسيدي
فوانيس أمامية 855 * 2
فوانسي خلفية 440 * 2
رفرف أمامي 1380
اكصدام امامي 1990
اكصدام خلفي 2700
اشاره ( اللي هيا بتبقى على الرفرف ) 150
مرايات (ودي 3 أجزاء )
1- شاسيه 1600
2- مش عارف كاتب حاجة كدا معرفتش أقراها بس هوا تقريبن يقصد الجزء المجوف الي بتركب عليه جزء المرايا الزجاج ودا بـ 230
3- الجزء الزجاجي من المرايا 275
يا بلاش والله
وبرضو وانا في الطرق كدا وعمال اهرش بالقلم في شعري
افتكرت بعض الحاجات الى بعض الاخوة استفسرو عنها ومكنش في جواب وهما
- مفتاح العجل : وقاللي يا معلم دا مش موجود وهينبعت نجبهولك من برا يا (باشا ) DHL شحن يعني والمصاريف عليك طبعا يا (باشا ) والموضوع دا هيخدلو 40 يوم
وبمبلغ وقدرة 3000 وشويه
- كارت التشغيل : جه فبالى اننو ممكن يبوظ أو يضيع فقلت أشوف هيبقى ايه العمل ساعتها
قاللي دا برضو هيتبعت يتجاب من براا DHL
وهيكلف كلو كلو بالشحن 1500 جنيه
دلوقتي يا وحوش ياريت أسمع الاراء والاستفسارات وانا جاهز لاي حاجة
ولو في نصائح ليا أو لأي حد من الي ناوين يشترو ميجان قول متكسفش احنا اخوات برضو :ask:
اه صح شوفت كنت هنسى ازاي الكلام دا لميجان 2005 بالنسبة ل 2006 نفس الاسعار بالظبط بس بتفرق الفانوس بس بيبقى بألف وحاجو
والسلام عليكم ورحمة الله وبركاته