فات 30 يوم علي توقيع كمشتري علي العقد

**roky** · 15-02-2009 09:38 AM

أصدقائي الأعزاء ...

يبدو كده أني أتورطت

أشتريت العربية (لوحات القاهرة) بعقد مسجل بالشهر العقاري (مش بتوكيل) . و كان السيد الوالد هو اللي سجل العقد (بأسمي) في المنيا و أتفق مع المشتري. و قالي لما تيجي انت علي المهل تبقي توقع مشتري (من غير مانعرف اني لازم أنقل الملكية خلال 30 يوم من توقيعي علي العقد، لأني أصلا مكنتش ناوي أنقل الرخصة بأسمي دلوقتي لاني كنت هاضطر انقلها لمرور المنيا، خصوصا ان الرخصة لسه سارية لحد 2011).

و فعلا في أول زيارة لي للبلد أخدني السيد الوالد الي الشهر العقاري و وقعت مشتري رغما عن أنف الموظف اللي كان معاند و عمال يحلف ميت يمين انه ممكن أنقل الملكية في المرور عادي جدا من غير توقيع مشتري ولا حاجة ، لكن انا الحقيقة كنت خايف يكون فيه أي قلق عشان العقد موقع عليه البايع بس !! و ياريتني سمعت كلام الموظف.

المهم بعد ما عرفت موضوع التلاتين يوم ده رجعت لنفس الموظف عشان اسأله ايه الوضع ... قالي ممكن أعملك حاجة أسمها "تجديد توقيع" بتتكلف تلاتين جنيه بس، و لو المرور مارضيوش (وكل الناس قالولي مش هايرضو) يبقي تعمل عقد جديد برسوم جديدة خالص ... بس ماتوقعش مشتري المرة دي.

المهم كلمت بايع العربية قالي ماينفعش أمضيلك علي عقد جديد ، بعد ما خلاص بعتلك العربية .

يا تري أيه موقفي دلوقتي .. هل لو وقفتني لجنة ابقي كده سايق عربية مش بتاعتي ؟!
ثانيا : أيه العمل ... أزاي ممكن أنقل الرخصة ... و نقل الملكية من مرور لمرور ده ظروفه أيه ... لاني كده هاضطر أخد أجازة مخصوص و أسافر البلد عشان انقل العربية (لاني بطاقتي علي المنيا).

ربنا ما يرميكم في ضيقة

**karimone** · 15-02-2009 12:00 PM

انا تقريباً كان حصل معايا نفس الموضوع و عدي 30 يوم علي العقد بس لما روحت المرور ماقلوش حاجه... دفعوني 20 جنيه غرامه و الورق مشي و نقلت الملكيه و كله تمام...

الكلام ده كان من 4 سنين مش عارف الوضع اتغير دلوقتي ولا ايه... روح المرور و اسأل...

**roky** · 15-02-2009 12:14 PM

يا رب يا كيمو يطلع الموضوع واقف علي غرامة

المشكلة ان المرور عندنا صعب تفهم منهم اي حاجة ... انت بس عشان توصل للموظف المطلوب يكون النهار ضاع منك ... عموما أسافر الجمعة اللي جاية و نشوف ايه اللي هايحصل ، مع أني اصلا صعبان علي انقل الملكية دلوقتي

و شكرا يا باشا

آاااه علي فكرة ... الصورة الرمزية تبعك تجنن ... الفيلم ده انا بعشقه

**أبومعاذ** · 15-02-2009 12:21 PM

عادي جدا هتروح وتنقل ملكية عادي في المرور من غير مشاكل
عن تجربة انا كان فات 30 يوم على العقد وكمان رخصة العربية كانت منتهية و رحت نقلت ملكية عادي بس لو الرخصة منتهية هتحتاج شهادة بيانات

**zeyad1810** · 15-02-2009 12:51 PM

ماتقلقش انت كدة العربية بتاعتك
بس لما تروح المرور ممكن يدفعوك غرامة علشان اتاخرت عن شهر لانك وقعت مشترى
لو ماكنتش وقعت ماكانش هيكون فى مشكلة وتروح فى اى وقت

**wesam_salom** · 15-02-2009 01:51 PM

انا هقولك على المفيد عن اكتر من تجربه

متقلقش من الموضوع ده

انت هتروح عادى المرور بالعقد اللى معاك والرخصه وبقيه الورق(الفحص ووصل الطفايه وشهاده المخالفات بس ميكونش فات عليها شهر)
هتدفع التأمين وهينقلوا لك الملكيه بحد اقصى شهر من تاريخ العقد
يعنى مش هيبقى تاريخ النقل يوم ما انت هتروح
هيبقى بعد شهر من تاريخ العقد
وكل المشكله انك هتدفع الضريبه بتاعتها+تلت الضريبه
يعنى لو عربيه من 1100 الى 1500
هتدفع 216 جنيه بدلا من 175
هى دى كل المشكله
بس كده بقى انقل الملكيه لانك مش هتستفاد بالمده اللى باقيه فى الرخصه

واى خدمه او استفسار انا فى الخدمه

**roky** · 15-02-2009 02:06 PM

ربنا يطمن قلوبكم يا جماعة

بس يا باشمهندز mobitek

معلهش عاوزك توضحلي شوية نقط عشان انا أول مرة أرخص عربية :-

1. يعني ايه هاينقلو الملكية بتاريخ شهر من بعد التوقيع ؟؟ قصدك بأثر رجعي ؟ ودي تفرق في أيه !
2.هو انا لما أنقل الملكية هادفع ضريبة ليه و الرخصة لسه سارية ؟ أنا اللي فاهمه ان الضربية كده دفعها صاحب العربية الأساسي ، اللي الرخصة بأسمه.
3 ثالثا و اخير ، قصدك أيه بـ : مش هاستفيد بالمدة اللي باقية في الرخصة ...

وهل برضه انقلها دلوقتي ؟لاني علي الأقل عاوز أسيبها لوحات القاهرة بدل ماغيرها المنيا .. لحد ما الرخصة الحالية تخلص .. أو علي الأقل لحد ما أغير عنوان بطاقتي علي مصر... و أيه خطورة الموضوع ده؟

متشكر جدا علي ردودكم يا جماعة ... ريحتم قلبي الهي يريح قلوبكم

**ameen_ra** · 15-02-2009 02:25 PM

المشاركة الأصلية كتبت بواسطة mobitek

انا هقولك على المفيد عن اكتر من تجربه

متقلقش من الموضوع ده

انت هتروح عادى المرور بالعقد اللى معاك والرخصه وبقيه الورق(الفحص ووصل الطفايه وشهاده المخالفات بس ميكونش فات عليها شهر)
هتدفع التأمين وهينقلوا لك الملكيه بحد اقصى شهر من تاريخ العقد
يعنى مش هيبقى تاريخ النقل يوم ما انت هتروح
هيبقى بعد شهر من تاريخ العقد
وكل المشكله انك هتدفع الضريبه بتاعتها+تلت الضريبه
يعنى لو عربيه من 1100 الى 1500
هتدفع 216 جنيه بدلا من 175
هى دى كل المشكله
بس كده بقى انقل الملكيه لانك مش هتستفاد بالمده اللى باقيه فى الرخصه

واى خدمه او استفسار انا فى الخدمه

كلام مظبوط لانه في الحاله دي بيسقط العقد وتعيد توثيقه او المدة المتبقيه في الرخصه وانت بتختار الايسر لك

**wesam_salom** · 15-02-2009 02:38 PM

المشاركة الأصلية كتبت بواسطة roky

ربنا يطمن قلوبكم يا جماعة

بس يا باشمهندز mobitek

معلهش عاوزك توضحلي شوية نقط عشان انا أول مرة أرخص عربية :-

1. يعني ايه هاينقلو الملكية بتاريخ شهر من بعد التوقيع ؟؟ قصدك بأثر رجعي ؟ ودي تفرق في أيه !
2.هو انا لما أنقل الملكية هادفع ضريبة ليه و الرخصة لسه سارية ؟ أنا اللي فاهمه ان الضربية كده دفعها صاحب العربية الأساسي ، اللي الرخصة بأسمه.
3 ثالثا و اخير ، قصدك أيه بـ : مش هاستفيد بالمدة اللي باقية في الرخصة ...

وهل برضه انقلها دلوقتي ؟لاني علي الأقل عاوز أسيبها لوحات القاهرة بدل ماغيرها المنيا .. لحد ما الرخصة الحالية تخلص .. أو علي الأقل لحد ما أغير عنوان بطاقتي علي مصر... و أيه خطورة الموضوع ده؟

متشكر جدا علي ردودكم يا جماعة ... ريحتم قلبي الهي يريح قلوبكم

لو انت مكنتش وقعت على العقد مشترى
كنت تفضل عادى بالرخصه
او تنقل الملكيه باسمك من غير ما تدفع الضريبه
يعنى تكمل المده اللى فى الرخصه ولو معاك صوره وثيقه التأمين كمان هتعمل لها ملحق ب 6 جنيه وتنقل باسمك بدون اى مصاريف غير الاوراق العاديه وتأمين اللوحات

المشكله بقى فى حاله من ثلاثه
ان صاحب العربيه يتوفى ويمر عليه 6 شهور
او يتم البيع والتوقيع على العقد ويمر اكتر من شهر
او يكون فيه اكتر من عقد
يعنى العقد المسجل التانى بيكون كأنه موقع يعنى مدته شهر

فى الحالات دى بتعتبر الرخصه منتهيه فى خلال شهر
لانك وقعت على العقد معناه انك اشتريت وعرفت ولازم تنقلها
ده من تجربتى مش قانون انا قريته

بس ده اللى حصل معايا اكتر من مره علشان انا متعود انى انا اللى دايما بروح اخلص ورق العيله فى المرور

علشان كده بقيه المده اللى فى الرخصه هتضيع عليك
ليها حل واحد
لو العقد بتاعك رخيص (على حسب موديل العربيه)
وانت عارف اللى بايع لك
ممكن يروح معاك ويعمل لك عقد جديد ومتوقعش عليه
وتكمل المده عادى

ده من خبرتى
واى خدمه تانيه انا موجود

الموضوع: فات 30 يوم علي توقيع كمشتري علي العقد

LinkBack

أدوات الموضوع

عرض

فات 30 يوم علي توقيع كمشتري علي العقد - انشر الموضوع فى :

-

-

-

-

-

المواضيع المتشابهه

مدت العقد المسجل

سعر العقد المسجل لدايو جوليت 99

استفسار عن مصنعية تشطيب شقة ( العقد مرفق )

العقد المسجل

العقد المسجل للسيارة

الكلمات الدلالية لهذا الموضوع

المفضلات

المفضلات

ضوابط المشاركة