السفارة المصرية

**eng.octooo** · 15-02-2009 03:54 PM

النهاردة اتصلت بالسفارة المصرية للاستفسار عن توثيق عقد العمل، لعمل بعد الاجراءات فى مصر

المهم زى الشاطر اتصلت بالدليل وجيبت النمرة

اتصلت محدش بيرد

دخلت على موقع وزارة الخارجية ، والحمد لله اقدرت اجيب نمر السفارة المصرية فى أبوظبي

طبعا استبعدت النمرة اللى كانت معايا

اتصلت ، والحمد لله واحد رد عليا

هوا: الو ( طبعا المفروض يقول السفارة المصرية ، اى خدمة ، اى مساعدة مش معقولة يعنى ، هوا مش بيرد من تليفون بيتهم)

انا : السفارة المصرية

هوا : ايوا

انا : لو سمحت عاوز استفسر ازاى اوثق عقد العمل علشان...

هوا : "من قبل ما أخلص كلامى" استنى شويا

انا : حاضر

هوا : "بعد شويا" الو

انا : لو سمحت عاوز استفسر عن توثيق عقد العمل

هوا : اتصل شويا علشان التليفون مشغول

انا مش عارف تليفون ايه المشغول، وبعاادين اللى بيرد على التليفون مش المفروض يكون مؤهل انه يرد على الاستفسارات البسيطة وايه الاوراق المطلوبه

ما علينا

طبعا اتصلت بصديق ليا عرفت ايه المطلوب

ههههههه يبقا انت اكيد فى مصر

**tutankhamoun** · 15-02-2009 04:04 PM

مرة أتصلت بالسفارة المصرية في لندن بعد ما جبت النمرة من على الأنترنت ( الموقع أصلا بدائي جدا )
المهم
التليفون يرن ....... يرن .......... يرن
و محدش بيرد ....... و لما واحد رد
نفس اللي حصل معاك يا أستاذ محمد
ألو ............................ أكني أتصلت بفرن بلدي
و الله العظيم مسخرة
و طبعا برضه قالي أتصل بعدين علشان عايزين التليفون
يا إما تيجي القنصلية بنفسك
تخيل بقى لو واحد قاعد مثلا في مانشيستر
لازم ينزل مشوار للبهوات ............ و دي زي شرم الشيخ للقاهرة في المسافة تقريبا
طبعا و تخش بقى مقر القنصلية
لوز ......... لوز يا معلم
أكنك دخلت عيادة تأمين صحي في بلد أرياف في مصر
و صورة الزعيم المبجل بتاعنا على الحائط أو ما تخش
و علشان تمضي ورقة جننوني
روح المكتب اللي جنبي خاليه يعملك مش عارف أيه و أبقى أرجعلي علشان أختملك ختم النسر و يكون بعد ما تدفع في الخزنة

و الله العظيم مسخرة و أنا في اليوم ده كنت مقضيها ضحك على التخلف اللي هما عايشين فيه

مشكلة مصر مفيش تخطيط ....... و فيه محسوبية وواسطة تخلي ناس لا تستحق الوظيفة تشتغل في أفضل الوظائف .
و هي دي مصر ...................... و تحيا ج ع ع

في حين إن المقارة الحكومية البريطانية كلها شغالة بالأنترنت و القليل منها اللي بيحتاج تواجدك
تروح بقى هناك ........... فيه دور و أرقام بيتم توزيعها على المواطنين و تاني حاجة هو موظف واحد يقعد معاك و يخلصلك كل حاجة

و ده الفرق بين دولة متقدمة ............و دولة متخلفة
و عمار يا مصر يا أم الدنيا
و تعظيم سلام ل ج ع ع

**MoToRiZeR** · 15-02-2009 04:11 PM

المشاركة الأصلية كتبت بواسطة tutankhamoun

مشكلة مصر مفيش تخطيط ....... و فيه محسوبية وواسطة تخلي ناس لا تستحق الوظيفة تشتغل في أفضل الوظائف .

+++++++++++++++

**نور القمر** · 15-02-2009 04:15 PM

استاذ محمد عز انا عشت في ابو ظبي حوالي 8 سنين واكيد اضطريت اروح السفارة مش فاكرة عشان تجديد الاقامة ولا ايه
بجد والله اسوأ موظفين تتعامل معاهم هم الموظفين المصريين
لا في احترام للغير ولا انجاز للعمل ولا احترام للمواعيد
وشوف حضرتك اتعاملت مع كام جنسية هناك وقارن بنفسك
واسوأ موقف حقيقي مر عليا معاهم كنت محتاجة اصور ورقه وطبيعي مكنة التصوير اللي بالدرهم مش شغاله
اسأل اعمل ايه ولا اروح فين محدش يفيدني وزي ما حضرتك عارف السفارة في الصحراء والمسافه بينها وبين كل سفارة تانية كبيرة وحر ورطوبة وكانوا عايزني اروح اصور معرفش في سفارة باكستان ولا ايه
لولا واحد اماراتي موظف في السفارة المصرية الله يكرمه اخد ورقي صوره في مكتبه
طبعا الامارتي ده مسئول عن تخليص اوراق الاماراتين اللي عايز يجو مصر

**M.Osman** · 15-02-2009 09:01 PM

سفارتنا فى الإمارات ... لا تعليق!!!!!!

حصل مواقف .. نكت مع الوالد هناك

سفارة اية بس ... ؟ مش عارف !!

**محمد عز** · 16-02-2009 06:52 AM

يبقى السفارات المصرية ظاهرة سلبية فعلا

وده شىء طبيعى

ما هى امتداد لكل ما هو مائل فى مصر

حسبى الله ونعم الوكيل

احنا النهاردة ، 30 % من المصريين أميين

و 20 % بيعيشوا تحت خط الفقر المدقع

وتشابك الجهات القضائية والتنفيذية

ودستور مهلهل

شيء طبيعى اللى احنا وصلنا ليه النهارده!!!!!!!!