الموضوع: هل عشت شبابك واستمتعت بيه ولا.....

يعنى ايه تعيش حياتك

انا فى 4 صيدله السنه دى
عندى شركه مستلزمات طبيه مفتوحه من سنه بالظبط

بنزل من بيتنا الساعه 8 او 7 الصبح برجع بيتنا زى دلوقتى
بنام علشان ارجع انزل تانى الصبح

قمه متعتى اما بروح الجامعه مش علشان حاجه علشان ببقى فى مكان واحد لفترة كبيرة انام فى المحاضرة ازوغ واروح بدرى يوم وانام

اقصى طموحى انام 24 ساعه

ياما يبقى عندى امتحان

الايام اللى مفيهش جامعه فيها شغل ساعات كتير جدا بتوصل من 8 الصبح لحد 3 بالليل وانا برة البيت

يانهار ابيض ده انتو خوفتونى من موضوع الجواز ده انا فى سنه رابعه كليه وابويا عاوز يجوزنى فى اجازه اخر السنه يعنى استلم الشهاده والقسيمه وانا عمال اقوله اصبر انا لسه صغير طب اما اشتغل ولكن يقولى اشياء من عينه اتجوز صغير ولادك يبقو اخواتك ونربيهم معاك ونجوزك واحنا عايشين
ربنا يستر ولو حصل هابقى اعزمكو وكلنا لها

علي قد ما انا في عز شبابي "18 سنة " بس حاسس اني مش عايش حياتي و مخنوق و كلها كام سنة و هتجوز و ابقي مكنة انزل الصبح اشتغل ارجع مقتول انام و في اول الشهر ادي المرتب للمدام و شكرا علي كدة انسي حياتي انا
لدرجة اني اخدت قرار اني لو اتجوزت مش هيبقي سن 32 سنة
و العيال مش قبل سن 40
رايكم قرار موفق

أعتقد إن إحنا لو فكرنا شوية بهدوء هنقدر نوصل للأسباب اللي خليتنا بقينا كده . يعني مثلا من ضمن الأسباب ( النظام الإقتصادي الرأسمالي ) اللي إحنا فية وده مش عيب الرأسمالية . لأ ده عيب المكان اللي بتتطبق فيه الرأسمالية يعني عندنا هنا في مصر دولة من دول العالم الرابع ولا الخامس ما ينفعش يكون فيها رأسمالية لإن في النهاية هتلاقي 80 مليون بيشتغلو عند 100 واحد ويمكن أقل من 100 بكتييير كمان ( شوف أسعار الحديد قبل ما يتفتح الإستيراد وشوف أسعار الأسمنت دلوقتي عاملة إزاي والعربيات اللي مكسابها بيزيد علي الـ 100 % وشوف وشوف شوف وشوف ...... ) هتلاقي نفسك بتشتغل وبيطلع عينك وعين اللي خلفوك عشان في الأخر تروح تدفع في حديد أو أسمنت أو عربية أو..... أو......أو..... أو...... إلخ وكل سلعه بتشتريها أنت بتدفع فيه أضعاف ثمنها أصلا . سبب تاني برضو هو إن الناس ما بقتش زي زمان . مابقتش بترضي بقليلها وأنا في إعتقادي إنهم معزورين في ده لإنهم ما بقوش سواسية زي زمان أيام الستينات. الأيام اللي كان بيتقال عليها إنها أيام البال الرايق والمزاج العالي والضحكة المصهلله . بس أيامها كانت الناس بترجع من شغلها الساعة 2 أو 3 باكتييير . مين النهارده عايش كده . اللي حاله حلو أوي بيرجع من شغله الساعة 7 . الحياه بقت كلها جري في جري في جري وراء لقمة العيش .

يا جماعة انا مستمتع نوعاَ ما فا مش عايز أعكنن عليكم!

بس موضوع الخنقة و عدم الإستمتاع في الحياة في رأيي سببه الأتي :

1) إن كتير مننا بيبقي عايز يبقي دايماَ في safe side حتي لو مش بتلبي طموحه بالكامل .

2) كتير مننا مبيحبش الشغلانة اللي بيشتغلها .
3) كتير مننا شغله أهم من حياته الإجتماعية .
4) كتير مننا ممكن يقضي أجازته بالكامل في النوم و بالتالي اما بيرجع الشغل بيبقي أكنه مواصل ولا خد أجازة ولا حاجة .
5) كتير مننا شايف اللي انا كتبته ده كله رفاهية و إتلهي و أقعدلنا علي جنب !

بس من تجربتي المتواضعة .. انا كنت شغال في جرنال كبير إلي جانب الكلية و بمجهودي بدون واسطة ولا حاجة في سن صغير جداَ .. و لكن بعد فترة مبقتش مبسوط .. قمت سايبه ! بدون ما أزبط شغل تاني و كنت أيام ببقي مفلس خالص يعني .. و بعد كدة اما إشتغلت في الصحافة التليفزيونية بقي الشغل + الجامعة بيعدوا ال 16 ساعة في اليوم شغل .. بس اليومين الأجازة لازم أقتلهم ! بمعني لازم أخرج أو أسافر .. و ساعات صحابي مش بيبقوا فاضيين .. بتعرف علي ناس و أسافر معاهم أو بحجز في مكتب و أتعرف عالناس اللي طالعين .. و لو قفلت أوي بسافر لوحدي و خلاص .. المهم يبقي فيه تغيير .

و أهم مبادئ الإستمتاع بالحياة - في رأيي المتواضع - إن لازم يبقي فيه risk دائم .. لازم الواحد يبقي مستبيع !

if you want to be safe, you'll not know what it means to be happy