الموضوع: الان اسهل طريقة لتعطير سيارتك ......واو

بسم الله
انا عملت الموضوع الاولانى (اسهل طريقة لغسيل العربية وتنفع للبنات........)
وكنت سايبة كدة يمكن حد يحتاجة واتفاجئت ان معظم الاعضاء شكروا فية وكانوا محتاجينة فقلت انزل موضوع اسهل طريقة لتنظيف الصالون من جوة سهلة
وبرضة لقيت نجاح غير متوقع
والموضوع التالت دة عن تعطير العربية (فية جزء من الموضوع لازالة بقع الصالون دى خصيصا ل العضو x100 )

المهم نبتدى

انت ممكن كل شوية تشترى معطر جو للعربية بس الطريقة دى اقتصادية نوعا ما وتقدر تحط الريحة الى انت عاوزها حتى لو كانت العطر الخاص بيك

فية اكتر من طريقة اول واحدة وهيا اعادة استخدام معطرات الجو
ازاى يعنى لما تجيب الشجرة الورق الى بتتعلق فى المرايا لما تخلص و تنشف
جيبها وجيب زيت عطرى (ممكن المسك المركز الى بيتباع قدام المساجد يوم الجمعة الى زجاجتة قد الصابع وراسها بلية دوارة )
او ممكن زيوت الفواحات (الفواحة الى بتحط فيها شمعة من تحت ومن فوق الزيت وبتكون من الفخار)
هات اى زيت منهم الى رائحتة تعجبك
وغرق الشجرة (لما تتعبى تلاقيها طريت بعد ما كانت ناشفة )
وتعلقها تانى
وتركن العربية فى مكان ظل اكتر من 10 ساعات (يفضل بالليل )
وتيجى الصبح قبل ماتفتح الباب هاتشم الرائحة


ثانى طريقة
(للى بيشغلوا المكيف او المروحة او الدفاية)
اول ماتشغل المكيف والعربية تسقع
جيب قطنة فى حجم الليمونة وبلها زيت عطرى او كولونيا او برفان عادى واحشرها بين فتحات التكييف
هاتعبى العربية مع التكييف (بس عيب الطريقة دى انها يدوب تكمل يومين )

وثالث طريقة والى انا باحبها وباعملها وممكن تقعد بالاسابيع

هيا انك تقفل العربية كويس اوى
وتجيب بخور (الى ريحتة تعجبك )
وتولعة فى العربية (هههههههه ماتولعش فى العربية لا ولع البخور وحطة فى العربية وتحطة فى علبة ولا حاجة معدن علشان ماتحرقش الفرش )
وتقفل العربية على البخور وتسيبها على قد ماتقدروالعربية مقفلة تماما وانت برة المهم لازم تكون جنب العربية اوعى تسيبها لحسان ترجع تلاقيها بقت فحمة يعنى خلى بالك وماتولعش البخور وتتطلع فوق مهما حصل خليك جنبها

وكدة تبقا تميزت برائحة عطر عربيتك الشرقى (على فكرة دخان البخور رائحتة بتمسك فى العربية بالاسابيع ) زى رائحة السجاير (طبعا المدخنين فاهمين )


وكدة كل شمة والريحة حلوة


نيجى بقا لجزء تنظيف البقع فى الصالون
علشان العضو x100
ي
عموما لو الفرش جلد او قطيفة ممكن تشيل اى بقعة من انك نجيب ليفة اسفنج ناعم وتبلها ماء +صابون+سبرتو
ولكل كوب ماء ملعقة صغيرة صابون سائل وملعقة كبيرة سبرتو(ماتخافوش بيطير بسرعة)
وتبل الاسفنجة بيهم وتعصرها وتسيبها فوق البقعة لمدة 10 دقايق وبعدين تدعك بيها البقعة وكدة تكون خلاص ان شاء الله

لباقى انواع الاقمشة
اول حاجة اما البقعة عندك دهنية (زيت ..شحم..او) زى الى عند x100
تجيب فرشة اسنان ومعجون حلاقة او فوم حلاقة او معجون اسنان(معجون اسنان مش معجون جيل )
وتحط ملعقة معجون (اى واحد ) +5 ملاعق ماء
وتمزجهم مع بعض وتدعك البقعة كويس اوىىىىىى
وتمسحهم بفوطة مبلولة كويس بعد الدعك لمدة 10 دقايق ولا حاجة
ان شاء الله البقعة تروح (ممكن تروح تدريجى يعنى اول مرة تروح شوية سيبها تنشف خالص وبعدين جرب تانى )



او بقعة بودر جافة زى بقعة اسمنت او جبس او طباشير او...
دى سهلة بل قماشة او اسفنجة وامسح البقعة لو مطلعتش سيب القماشة عليها شوية علشان تطلع البقعة
وجرب تانى
او بقعة صلصة شيكولاتة اى حاجة (يمكن كنت بتطبخ فى العربية ولا حاجة هههههه)
دى من اصعبهم بتحتاج مزيل بقع كميائى هاتة من اى سوبر ماركت كبيير وشوف

او بقعة عصير او بيبسى
دة بتجيب ماية دافية وتحط لكل كوب ملعقة صغيرة خل ابيض وتدعك البقعة بفرشة اسنان والبقع هاتطلع ان شاء الله


لو الطرق دى ما نفعتش يبقا عليك ومركز تنظيف بقا


وانا كدة خلصت الموضوع لو لقيت ردود حلوة هاحط موضوع ازاى ................(مش هاقول اسم الموضوع غير لما اشوف الردود).........

لا لا براحه علينا بقي احنا مش ملاحقين هتخليني انزل اعمل العربيه كلها دلوقتي وانا تعبانه مش قادره
الف الف الف شكر الموضوع جامد جامد جامد